Bibilo Gem Ior

KA NYI yange i wase or u gbidyen do shi iin ve, de ieren na la, shi geman uma naa? Ôr ase kwagh u or ne a er sha zwa na yô.

“Ayem a gban sha anyinya . . . lu kwagh wam kpen kpen.”​—RICHARD STEWART

I MAR UN KEN INYOM I: 1965

TAR NA: JAMAICA

INJAOR I YANGE LU YÔ: ORMBAIV MAN OR U GBIDYEN DO

YIASE YAM: M vese ken gar u Kingston, gartamen u tar u Jamaica hen ijiir i mbaatsanev, í ior ngee her kpishi yô. Tom u eren yange u ban hen ijiir ne shi ifer kpa dumbur. Ior cian agumaior a hen ijiir ne, a wan tswam shi eren afer la. Hanma iyange yô, m nôngon u ungwan imo-gbuuka.

Ngôm lu kwase u eren tom kpoghuloo, u yange nôngo kwagh kpishi sha ci wam man anmgbianev av mba kiriki, u nomso man u kwase yô. Yange nôngo tsung sha u se hen makeranta tsembelee. Makeranta yange u doom ishima ga, kpa ayem a gban sha anyinya gema lu kwagh wam kpen kpen. Yange m bunde makeranta, m yem m za lu hen agirigi u gban ayem sha anyinya. M hendan anyinya iyol yam je kpaa.

Ica gba ga tsô, m hii u gbidyen do u ayem a gban sha anyinya kpoghuloo je. M wa dang shi m hingir or u keren kasev kpishi. M maan ikya shi m numun gbenda sha u me zua a inyaregh ki zan hemen a uma wam ne yô. M lu a ugbuuka kpishi, kpa doom er sha ayange a m numun gbenda kpoghuloo la cii m wua or môm ga nahan.

Ken masejime yô, dasenda va hingir u kôron mo sha afer a m lu eren la, ve za wuhem ken purusu. Yange m due purusu je kpa, kwagh gema ga, m za hemen a uma wam la her. Jighilii yô, yange m vihi hen shighe ne hemba ave a tse. Shin er m lu sha ishigh er m ngu or u jighilii nahan kpa, m gema m lu or u hiden ijime sha kwagh ga, u vihin ishima fele shi vihin tu kpaa. M waan orgen môm ikyo ga, saa iyol yam tseegh.

GBENDA U BIBILO GEMA UMA WAM LA: Sha shighe u uma wam hingir kpelegh kpelegh ne, ngôm hen Bibilo, hingir Kwaseshiada u Yehova. Yange m nenge a mbamgem mba dedoo kpishi ken a na, nahan hangem kpishi u fan kwagh u a ze hemen yô. Tsô m hii u tôvon mer me fa kwagh u a gem ngôm yô, nahan m hii u henen Bibilo vea Mbashiada mba Yehova.

Yange m nenge mer atesen a Mbashiada mba Yehova kaha kposo a atesen a ukwaghaôndo mbagenev shi a due ken Bibilo kpaa. Lu nongo u kwaghaôndo ne tseegh m fa mer ngu pasen kwagh sha uya uya, er Mbakristu mba sha ayange a tsuaa la kpa eren nahan ye. (Mateu 28:19; Aerenakaa 20:20) M va nengen er ve doo ayol a ve sha mimi yô, m na jighjigh mer m zua a kwaghaôndo u mimi hegen.—Yohane 13:35.

Akaa a yange m hen ken Bibilo la wasem u nengen mer gba u me gema uma wam vindi vindi. M mase kaven mer Yehova Aôndo kôr idya i eren ihyom, shi aluer m soo u eren ishima na yô, a  gba u me de u eren akaa a hôngor mo. (2 Mbakorinte 7:1; Mbaheberu 13:4) Er m va fa mer kwagh doon Yehova shin vihin un, nahan aeren a am a fatyô u nan un ishimavihin shin msaanyol yô, mfe ne kôrom sha mtema kpen kpen. (Anzaakaa 27:11) Tsô m kange ishima mer me de ikya i man shi me haa ugbuuka av kera shi me sôr inja yam kpaa. Akaa a yange taver mo kpishi u den yum yô lu kasev mba keren man shi do u gbidyen.

Sha hiihii la, m soo mer azende am a fa ér m ngu henen Bibilo vea Mbashiada mba Yehova ga. Kpa yange m va er Mateu 10:33 yô, mnenge wam gema sha kwagh ne; ivur la ôr mkaanem ma Yesu man, ér: “Hanma or u nana nyiman Mo sha ishigh ki iorough yô, ka di nan je Me nyiman nan sha ishigh ki Terem u A lu Sha kpaa ye.” Mkaanem man mgbeghan u ôron azende am mer m ngu henen Bibilo vea Mbashiada. Kwagh ne kpiligh ve iyol. Taver ve u lumun ér mo nahan m soo u hingir Orkristu. Kpa m kaa a ve mer m kera soo u eren akaa a m vanden eren la ga.

IWASEN I M ZOUGH A MI LA: Yange saan ngôm iyol kpishi zum u a nenge m hii u dondon atindiakaa a Bibilo yô. Hegen ne, ishima kera ze un iyol ér alaghga mo m ngu eren akaabo ga. Ka se lam sha kwagh u mdoo u Yehova a doo se ishima la. Ashighe agen, ka mea hen sha imbaor i yange m lu la nahan, i kpiligh mo iyol kpishi er m fetyô u geman uma wam sha iwasen i Aôndo nahan. Ka kera saren mo u eren aeren a jimbagh shi keren uyôughyôughmbaakaav er ngise m keren nahan ga.

Luun er yange mea lumun loho u Bibilo ga yô, ma m kera lu uma nyian ga shin ma m lu ken purusu. Kpa hegen ne, m gema m ngu a tsombor u dedoo, u lun saan saan. Saan mo iyol kpishi er m lu civir Yehova Aôndo vea kwase wam u a lum uwegh ku yanegh kua wan wam u kwase u a taver mo ityough ga la nahan. M sugh Yehova kpishi er a nem ian u lun ken mzough u anmgbianev mba ken Kristu mba ve doo ayol a ve ne nahan. Doom kpishi er yange i tesem mimi u ken Bibilo la nahan. Aan a m zough a mi a tesen mbagenev Bibilo la gbam kwagh kpen kpen. M hemba wuese Yehova Aôndo cii, er a er a mo doo doo, a urugh mo a ve a mo hen a na nahan.

[Mkaanem ma sha peeji 27 la]

‘Yange m va fa mer kwagh doon Yehova shin vihin un, nahan aeren a am a fatyô u nan un ishimavihin shin msaanyol’

[Foto u sha peeji 27 la]

Mo vea kwase wam man wan wam u kwase

[Foto u sha peeji 27 la]

Yange m nenge a mbamgem mba dedoo kpishi ken ngôm