Kporom hen Aôndo

Dooshima u Vesen u Aôndo a Tese Se La

Genese 22:​1-​18

AÔNDO yange doo Aberaham ishima. Isaka, wan u tertamen u lun a jighjigh ne mar ken iyolbeen na la kpa, doo un ishima kpishi. Kpa zum u Isaka kuma anyom 25 yô, Aberaham tagher a ikyaren i gba u una er kwagh a Isaka er ka wan na ga yô. Aôndo kaa a na ér a kôr wan na a nagh a mi. Nahan kpa, kwagh ne yange kure nahan ga. Zum u Aberaham za uwegh tôô ihô ér una sôngo wan na yô, Aôndo tindi ortyom na za yange un. Kwagh u i nger ken Genese 22:​1-18 la tsenga tesen er se doo Aôndo ishima kpishi yô.

Ivur i sha 1 la kaa ér, “Aôndo kar Aberaham.” Aberaham yange lu or u jighjigh, kpa hen shighe ne lu u a kar jighjigh na la sha gbenda u i lu a vande karen un ga yô. Aôndo kaa a na ér: “Tôô Isaka wan wou u môm môm u a doo u ishima la, yem . . . za na nagh ku nanden a mi sha uwo ugen u Me tese u yô.” (ivur i sha 2) Umbur wer, Aôndo una lumun ér i mee mbacivir un i hemba agee ve ga. Nahan ikyaren ne tese ér Aôndo lu a vangertiôr ken Aberaham.​​—⁠1 Mbakorinte 10:⁠13.

Aberaham lumun u eren kwagh u Aôndo kaa un la fese je. Bibilo kaa ér: “Tsô Aberaham mough pepe pepe kange jaki na shidi; a mough a mbayev nav uhar kua Isaka wan na; a ar ikyon sha ci u nagh ku nanden; a gba zan hen ijiir i Aôndo tese un la.” (Ivur 3) A shi nan kpa, Aberaham ôr orgen môm kwagh u Aôndo kaa ér a er jighilii ga.

Lu zende u ayange atar, nahan ian na Aberaham i una hen sha kwagh ne kpoghuloo yô. Nahan kpa, Aberaham hide ijime ga. Mkaanem ma ôr a mbayev nav la tese jighjigh na u nan. Shighe u Aberaham ta ashe nenge a uwo u Aôndo tese un la ken ica yô, a kaa a mbayev nav mbara ér: “Lu nen heen . . . , mo vea wanakiriki ne sé za shara, sé za civir Aôndo man sé hide sé va kohol ne ye.” Zum u Isaka pine un kwagh u waniyôngo u nanden nagh a mi yô, Aberaham kaa ér: “Aôndo Una na waniyôngo.” (Ivur 5, 8) Aberaham yange lu a vangertiôr ér una hide vea wan na. Sha ci u nyi? Sha ci u “fa ken ishima er Aôndo ngu a agee a nderen un [Isaka] shin mbakpenev je kpaa.”​​—⁠Mbaheberu 11:⁠19.

Zum u Aberaham za uwegh “tôô ihô sha u una sôngo wan na” sha uwo yô, ortyom yange un. Aôndo maa tese Aberaham nomiyôngo ugen u wever akor ken ageva ér a kôr a na nagh “sha ityough ki wan na.” (Ivur 10-13) Sha ishigh ki Aôndo yô, lu inja er Aberaham na nagh sha Isaka nahan. (Mbaheberu 11:17) Orfantakerada ugen kaa ér, “sha ishigh ki Aôndo yô, ishima i Aberaham lu a mi i nan nagh sha Isaka la lu vough er a na nagh sha Isaka kpôô kpôô nahan.”

Vangertiôr u Yehova lu a mi ken Aberaham la saa un dang ga. Aberaham kpa, Yehova na un injar sha jighjigh u na un la, gadia Aôndo hide kimbir ikyur i vande yan a na ér akuraior a sha won cii aa zua a iveren ken tsombor na la shi bum ér una er kwagh ne kpaa.​​—⁠Ivur 15-18.

Aôndo yange venda a Aberaham ér a de ne nagh a wan na ga, kpa lu u ken hemen yô, Aôndo iyolna una na nagh sha wan na. Ishima i Aberaham lu a mi i nan nagh sha Isaka la tile sha nagh ku Aôndo na sha Yesu, Wan na u môm-môm sha ci u asorabo ase la. (Yohane 3:16) Ka nagh ku Kristu la ku lu dooshima u vesen u Aôndo a tese se ye. Er Aôndo a ne nagh kun sha ci wase yô, doo u se pine ayol ase ser, ‘Ka akaa a nyi nahan m kegh iyol mer me de a karem sha er me er ishima i Aôndo?’