KWASECÔGHOL ne yange kuve wan na u nomso, u lu wan na môm tseegh yô. Yange kpiligh un iyol kpishi. A sember kôron wan ne sha ikyum shighe u lu kpenegh la. Mba nderen wan ne shin ku ngur sen yô, saan kwasecôghol ne iyol kpishi. Orvannya u kwasecôghol la maa kaa a na ér: “Nenge, wan wou ngu uma!”

Yange i nder wan ne shin ku anyom kar hegen nôngo u kuman 3,000. U fatyô u ôron kwagh u mnder u shin ku ne ken 1 Utor ityough 17. Orvannya la lu Eliya, profeti u Aôndo. Kwase la di ye? Lu kwasecôghol u ken gar u Sarefati, u i fe iti na ga yô. Mnder u i nder wan na u nomso la shin ku la lu môm ken akaa a yange er un, a yange seer taver jighjigh na yô. Aluer se time sha kwagh na yô, se hen akaa a wasen se kpishi.

Yehova yange kaa ér icegh kia za ken tar u Iserael shighe gôgônan sha ayange iferor, Tor Ahaba hemen la. Eliya yôôn kwagh u icegh kira kera yô, Aôndo yer un ér Ahaba a de nengen a na ga, shi tindi ugugôô sha ivande, ve lu nan profeti Eliya inyam man bredi. Maa Yehova kaa a Eliya ér: “Mough za ken Sarefati u ken tar u Shidon, za tema ker; nenge, M kaa kwasecôghol u ker, Mer, a̱ koson we.”—1 Utor 17:1-9.

Eliya za nyer ken Sarefati yô, a nenge a kwasecôghol ugen u lun ican ican, lu sangen ayeghelaikyon. Lu kwase ne gba u una koso profeti Eliya yee? Er kwase ne kungu ican yô, una koso Eliya nena? Eliya yange una ta akpelan shin una ta ga kpa, á hii u lamen a kwasecôghol la. A kaa a na ér: “Shi za kese anmnger shin ishegh va nam m̱ ma.” Ngur zan u za kesen yô, a yila un, a kaa er: “Shi vam a ankwaghyan kpaa.” (1 Utor 17:10, 11) Yange taver kwasecôghol la u nan orvannya  na ne mngerem ga, kpa gema taver un u nan un kwaghyan.

Nahan a kaa a Eliya ér: “Er [Yehova], Aôndo wou, A lu u uma ne, m ngu a anivurkwaghyan ga saa anmwe shin itye kua anmkure ciôn shin tum tsô; nenge, m ngu sangen ayeghelaikyon kpuaa mer, me za naha sha ci wam kua wan wam, sé ya, maa sé kpe.” (1 Utor 17:12) Ka nyi se fatyô u henen sha iliam ve nee?

Kwasecôghol la yange kav er Eliya lu Oriserael u civir Aôndo yô. Kwagh u ôr a Eliya la tese mimi u kwagh ne. A kaa ér: “Er [Yehova], Aôndo wou, A lu u uma ne.” Ikyav tese ér yange wa lun a mkav sha kwagh u Aôndo u Iserael, kpa lu a gba civir Yehova er una yila un ér “Aôndo wam,” shighe u lu ôron kwagh na la ga. Yange lu ken gar u Sarefati, ‘u ken’ tar u Fenishia, u a̱ shi nan kpa suur sha gar u Shidon yô. Ikyav tese ér Sarefati yange lu gar u mbacivir Baal lu her yô. Nahan kpa, Yehova nenge kwasecôghol ne lu kposo.

Shin er kwasecôghol u ken Sarefati u kungu ican ne lu hen atô u ior mba civir akombo nahan kpa, yange na Yehova jighjigh. Yehova tindi profeti Eliya hen kwase la sha ci u iwasen i kwase la kua Eliya cii. Se fatyô u zuan a ityesen i vesen ken kwagh ne.

Ka ior mba ken Sarefati cica cii yange ve civir Baal ga. Er Yehova tindi Eliya hen kwasecôghol ne yô, tese ér a fa kwagh u mba lun a ishima i dedoo mba ve lu a hii u civir Un ga la. Sha kpôô yô, “ken hanma ikyurior yô, or u nan cie [Aôndo], nan eren perapera kpaa yô, Una lumun nan.”—Aer. 10:35.

Ka iorov ume hen haregh wou ve lu er kwasecôghol u ken Sarefati laa? Shin er alaghga vea lu hen atô u ior mba eren kwaghaôndo u aiegh nahan kpa, adooga a sar ve u civir Aôndo sha mimi. Alaghga vea wa fan kwagh u Yehova shin vea fa ga kuaa, nahan a gba u a wase ve ve vea civir Aôndo u mimi la ye. U ngu keren ambaaior la shi wasen ve kpa?

Hen sha kwagh u Eliya yange kaa ér kwasecôghol la a er la. A ôr a Eliya ér un shi a anivurkwaghyan u una mase yan vea wan na, maa vea kpe yô. Nahan kpa, Eliya kaa a na ér nyi? A kaa a na ér: “De cie ga; za, za er kwagh u u kaa la, kpa vande panden eren mo anakpekpa a mi, va nam, tsô ú mase za eren sha ci wou kua wan wou. Gadia TER, Aôndo u Iserael, ngu kaan nahan er: Ityegh ki mweegh kin kia bee ga, tumugh ku mkure kpaa kua yina ga, zan zan iyange i TER Una kar nôôn ura shin tar” la.—1 Utor 17:11-14.

A lu ior mbagenev yô, alaghga vea kaa ér: ‘M tôô ankwaghyan u m mase shin a mi ne m na u waa? De asenge la.’ Kpa kwase la yô ôr nahan ga. Shin er wa lun a mkav sha kwagh u Yehova kpuaa nahan kpa, yange na Eliya jighjigh shi er kwagh u Eliya kaa ér a er la. Kwagh ne lu gbenda u vesen u karen jighjigh u nan u kwasecôghol la, shi kwagh u er la tese kwaghfan kpishi!

Aôndo yange undu kwasecôghol u kungu ican la ga. Yehova yange seer anivurkwaghyan u kwasecôghol ne mase shin a mi la, nahan a koso iyol na man wan na kua Eliya zan zan icegh kar been, er Eliya tôndo zwa a na nahan. Sha kpôô yô, yange “ityegh ki mweegh bee ga, tumugh ku mkure kpaa yina ga, sha imo i TER, i A kaa Eliya la.” (1 Utor  17:16; 18:1) Kwasecôghol la yange una er kwagh u Eliya kaa un la ga yô, anivurkwaghyan u shi a mi la ma lu kwaghyan na u masetyô. Kpa yange er kwagh sha jighjigh u nan, a suur sha Yehova, nahan a vande nan Eliya kwaghyan.

Ityesen i se fatyô u zuan a mi ken kwagh ne yô, Aôndo veren mba ve ne un jighjigh la doo doo. Shighe u ú tagher a imeen kpa u ne jighjigh yô, Yehova una wase u. Una lu Orkoson we man Orkuran we kua Ijende you sha er u fatyô u wan ishima a imeen la yô.—Eks. 3:13-15.

Ken inyom i 1898 la, magazin u Zion’s Watch Tower, u i gem yilan ér Iyoukura la ôr kwagh u injaa, u se fatyô u henen ken kwagh u kwasecôghol ne er la yô, ér: “Er kwasecôghol la na jighjigh shi er kwagh u Eliya kaa un la yô, Yehova wase un. Yange una ne Yehova jighjigh ga yô, ma i zua a kwasecôghol ugen u ma nan na Yehova jighjigh yô. Kape se kpa i lu je la. Ashighe agen Yehova ka a de ér i kar jighjigh u se ne un la. Aluer se mba a jighjigh u nan yô, una ver se doo doo; aluer se mba a mi ga yô, iveren la ia kar se.”

Shighe u se tagher a atsan agen yô, gba u se ker kwaghwan u Aôndo ken Ruamabera man ken ityakerada yase i pasen Bibilo la. Nahan se er kwagh u Yehova a tese se la, a̱ taver se nan nan kpaa. Yehova una ver se doo doo, aluer se er kwagh sha mkav, er injakwagh ne i tese nahan yô, ér: “Suur sha [Yehova] a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.”—Anz. 3:5, 6.

Shi lu u kwasecôghol la una tagher a kwagh ugen u karen jighjigh na la. Bibilo kaa ér: “Ken masetyô u akaa ne yô, wan u kwase shon u ya lu u na la, gba angev; angev nav taver je, a kera lu uma ga.” Ngô u lu zungwen ku u wan na ne nguren keren u fan ityôkyaa i wan a kpe un yô, a kaa a Eliya ér: “Ka nyi i zoughom a we, we or u Aôndo? U va her a mo wer, m̱ umbur asorabo am, shi u̱ wuam wan kpaa!” (1 Utor 17:17, 18) Kwagh u kwasecôghol ne ôr sha ishimavihin ne tese nyi?

Kwasecôghol la yange umbur ma isholibo i ishima na lu zan un iyol sha mi yôô? Yange hen ér Aôndo kimbi un injar i isholibo na sha ku u wan na la, shi ka Eliya Aôndo a tindi un ér a va wua un wan yee shinii? Bibilo pase se ga, kpa ka kwagh u se fe je ne: Kwasecôghol la yange na Aôndo ibo ér a er un ma kwagh u ifer ga.

Ka keng ku u wan u kwasecôghol la yange ua kpiligh Eliya iyol, kua kwagh u kwase shon hen ér ka mve u un ve hen ya na la i hingir u wan a kpe un ye, la kpaa. Eliya tee ikyom i wan la gbeda gbeda, za veren sha iyou i yaven i sha yô, a vaa a Yehova, a kaa ér: “TERE, Aôndo wam, U va a ican sha kwasecôghol u m tem her a na ne je, U wua wan na?” Yange vihi Eliya kpishi er ku u wan u kwase u fan kwagh, u lu eren a na dedoo ne ua va a ilyahan sha iti i Yehova yô. Tsô a zamber a Yehova, a kaa er: “TERE, Aôndo wam, uma u wanakiriki ne a̱ shi a̱ nyôr ker a na, a̱ hingir uma.”—1 Utor 17:20, 21.

Yehova lu ungwan. Kwasecôghol la koso profeti u Yehova shi lu a jighjigh u nan. Ikyav tese ér Aôndo yange de ér wan la a kpe, sha ci u yange fa ér ken hemen yô, mnder u wan la shin ku, u a lu mnder u shin ku u i hii teren ken Ruamabera la una na ior umiliôn umiliôn ishimaverenkeghen. Er Eliya zamber a Yehova yô, A nder wan la hide lu uma. Zum u Eliya kaa ér: “Nenge, wan wou ngu uma!” la, hide hen er yange a saan kwasecôghol la iyol kpishi yô. Kwasecôghol la maa kaa a Eliya ér: “Hegen yô, m fa u ngu or u Aôndo je, kwaghôron u TER u ken zwa wou ka u mimi je.”—1 Utor 17:22-24.

Takerada u 1 Utor ityough ki sha 17 kira kera ôr kwagh u kwasecôghol la za hemen ga. Nahan kpa, er Yesu ôr kwagh ter kwase ne sha gbenda u injaa yô, alaghga yange hingir kwase u civir Yehova ken ayange a á mase lun uma la cii. (Luka 4:25, 26) Kwagh u kwasecôghol ne tese ér Aôndo veren mba ve eren a ior nav dedoo la doo doo. (Mat. 25:34-40) A tese ér Aôndo koson mba ve civir un sha jighjigh mbara, ka vea nyôr ken ican nan nan kpaa. (Mat. 6:25-34) Kwagh ne shi tese er i sar Yehova u va nderen ior shin ku shi a lu a tahav mbu eren nahan yô. (Aer. 24:15) Sha kpôô yô, atôakyaa ne ka a doon tsung, a se umbur kwasecôghol u ken Sarefati la a mi yô.