Yesu lu a myen shio, nahan yange tagher a akaa agen kpishi a a ne uumace ve ye ican shi a nyian ve ishima la ga. Nahan kpa, yange mhôônom ma kôr un a ior tsung. Yange a de ér akaa agen a kar un sha er una wase ve yô, shi yange a er di ve kwagh u i gbe hange hange u una er ve la tseegh ga, kpa a er kwagh i hemba nahala. Mhôônom yange ma mgbegha Yesu u wasen mbagenev. Nenge ase ikyav i kwagh ne ken Ityough 32 man 37 man 57 man 99.

Mbayev kua mbaganden yange ve va ikyua a Yesu sha ci u Yesu nengen ér un gba kwagh shin un ngee a akaa a eren yum ga. Er ior nenge kwagh ve gba Yesu ishima yô, i doo ve u lun vea na. Wea soo u nengen ikyav i kwagh ne yô, nenge Ityough 25 man 27 man 95.

Hanma shighe yô, Yesu yange a er msen hen Ter na a ishima i môm, una lu tswen shin una lu vea mba civir Aôndo sha mimi mbagen kpaa. Yange eren msen hanma shighe, luun di hen shighe u a soo u yan kwagh tseegh ga. Yesu yange a er msen a sugh shi a wuese Ter na. Shi yange una soo u tsuan akaa a vesen kpa, a er msen ér Ter na a wase un. Nenge ase ikyav ken Ityough 24 man 34 man 91 man 122 man 123.

Ashighe agen yange a lu shighe u Yesu ma a mem je kpa, a de ér ian la i kar un sha er una wase mbagenev yô. Yange hemba soon iyol na a mbagenev ga. Sha vegher ne kpa, a ver se ikyav i se dondo yô. Nenge ase er i pase kwagh ne ken Ityough 19 man 41 man 52 yô.

Yesu yange tesen ior ér ve deen mbagenev kwaghbo tsô ga, yange mbahenen nav kua ior mbagenev vea er kwagh u sha mi ga yô, a de ve a kwaghbo. Time sha akav a a lu ken Ityough 26 man 40 man 64 man 85 man 131 la.

Yange i tsenga ôron ér Mbayuda kpishi vea venda Mesiya shi mbaihyomov nav vea wua un. Sha nahan yô, Yesu yange una soo yô, ma kera waan ior ikyo ga. Nahan cii kpa, Yesu wase ior sha gbashima ér ve va civir Aôndo sha mimi. A ver mbahenen nav ikyav i eren kwagh sha gbashima shighe u ior ve soo u keghen ato a ve ga shin i lu hendan a ve je kpaa. Nenge Ityough 16 man 72 man 103.

Yesu yange hemba uumace mba ve yen ne sha igbenda kpishi, er sha kwaghfan nahan. Er Yesu lu a myen ga yô, kwaghfan na man tahav nav hemba mbu ior mba ve luun a na la yem zende zende. Nahan kpa, hiden a iyol ijime, eren akaa sha ci u mbagenev. U fatyô u nengen a ikyav i kwagh ne kenItyough 10 man 62 man 66 man 94 man 116.

Yesu yange a wa ishima a mbaapostoli nav shighe u i taver ve u dondon ikyav na shin eren kwagh u a tese ve yô. Yange a wa ishima a tese ve akaa a gba u vea fa la kwa kimbir kimbir, sha er vea hemba lun kôôsôô a Yehova yô. Nenge ikyav i tesen er Yesu yange waan ishima la ken Ityough 74 man 98 man 118 man 135.