Hen Kwagh Ken Mkaanem Ma Aôndo

Ka Nyi ia Er sha Iyange i Jirigh Laa?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Ka Nyi I Lu Iyange i Jirighi?

Er i tese ken foto u a lu ken iyan ne nahan, ior kpishi hen ér sha Iyange i Jirigh la, a va a uumace ubiliôn ubiliôn sha ishigh ki ikyônough ki torough ki Aôndo, a va ôr ve ijiir sha aeren a ve a tse la, mbagenev vea zua a injar i yemen sha, mbagenev yô, a kende ve ken igyamusu. Nahan kpa, Bibilo yô tese ér awashima u Iyange i Jirigh la, ka u yiman ior ken iferkwagh i i tser ve la. (Pasalmi 96:13) Aôndo tsua Yesu ver un Orjir sha er una ôr uumace ijir sha mimi, shi una bee a ifer kera yô.—Ôr Yesaia 11:1-5; Aerenakaa 17:31.

2. Iyange i Jirigh la, ia bee a ifer kera nena?

Zum u Adam, or u Aôndo hii gban la, hemba un ato sha apera yô, a va a isholibo kua ican man ku sha ônov nav cii. (Mbaromanu 5:12) Yesu una va nder ior ubiliôn ubiliôn shin ku, nahan una bee a mzeyol u Adam va a mi la. Takerada u Mpase kaa ér Yesu una er kwagh ne shighe u una tema tor anyom dubu la.—Ôr Mpase 20:4, 11, 12.

A ôr mba a nder ve mbara ijir sha akaa a yange ve er cii ve, ve mase kpen la ga, kpa ka akaa a vea er zum u a pase ve kwagh u i nger ken “uruamabera” mba i er kwagh ve ken Mpase ityough 20 la, a ôr ve ijir sha mi ye. (Mbaromanu 6:7) Apostoli Paulu kaa nahan ér, a nder “mbaperapera kua mba ve lu perapera ga” la shin ku, vea zua a ian i henen kwagh u Aôndo.—Ôr Aerenakaa 24:15.

  3. Iyange i Jirigh la ia va a nyi?

Ior mba yange ve fa kwagh u Yehova Aôndo ga, shi ve civir un ga zan zan ve kar kpen la, vea zua a ian i geman ishima eren kwagh u dedoo. Aluer ve er akaa a dedoo shighe u a nder ve la yô, vea za ken “mnder u uma.” Kpa mbagenev ken mba a nder ve la, vea soo u henen kwagh u Yehova ga. Ve yô, mnder ve la una lu “mnder u ijirôron.”—Ôr Yohane 5:28, 29; Yesaia 26:10; 65:20.

Shighe u anyom dubu a a lu Iyange i Jirigh la aa bee la, Yehova una wase uumace cii vea hide a lu vough er sha hiihii la nahan. (1 Mbakorinte 15:24-28) Ka kwagh u dedoo u una va er uumace mba ungwan imo i Yehova je ne! Sha shighe u ikyaren i masetyô la, Aôndo una pase Satan Diabolo u a wuhe un anyom dubu shin ihungwa i zan kweng la. Satan shi una nôngo ér una mee ior ve de u civir Yehova, kpa mba vea hendan a Satan mbara cii, vea lu uma gbem sha won shin tar.—Ôr Yesaia 25:8; Mpase 20:7-9.

4. Ka iyange i jirigh igen i han ia va uumace a mbamtsera?

Ashighe agen Bibilo ka ia ôr kwagh ia ter ishember i “iyange i jirigh” la yô, i̱ ôron kwagh u mkurtar. Iyange i jirigh ngin ne ia va bur a bur ior er Mngerem ma Deemee ma sha ayange a Noa, ma yange ma va tim mbaaferev la nahan. Mtim u a sôôn van sha “mba ve vende Aôndo” la, una gema a va a tar u he u “perapera una tema ker” la.—Ôr 2 Peteru 3:6, 7, 13.

Wea soo u seer zuan a iwanger yô, ôr takerada Bibilo Tese Ér Nyi Jimi?, u i tese foto u ú heen ne, peeji 213 zan zan 215, ka Mbashiada mba Yehova ve gber u ye.

[Foto u sha peeji 24 la]

“Ijirôron i masetyô,” foto u gustave doré, 1832-1883

[Ngeren u pasen orngeren]

Ufoto mba Doré