U tsahan wanye la inja na yô, ka u wan nan kwagh shin tesen nan. Ashighe agen kwagh la ka a wa u kôôm wanye sha u nana de u bumen. Nahan kpa, ashighe kpishi kwagh ne ka a wa u tesen wanye aeren a wang a aa wase nan ve nana hen u palegh akaabo, geman tsuan akaa a i doo u nana eren la yô.

I de u tsahan mbayev hen uya mbagenev ica gba hegen, sha ci mbamaren ka ve cian ér aluer ve mba tsahan mbayev yô, mbayev vea hingir u nengen ayol a ve ér ve gba kwagh ga. Nahan cii kpa, mbamaren mba fan kwagh yô, ka ve wa mbayev vev atindi akuma akuma, shi ve tesen ve er vea kura atindi shon yô.

“Gba u u tesen mbayev ou kwagh u i doo u vea eren man u i doo vea er ga yô, sha er shighe u ve va we ikyondo kpa vea fatyô u eren hanma kwagh sha inja yô. Aluer u ngu tsahan mbayev ga yô, fa wer, mba inja er tso u a lu a ikpande i kôôm un a mi ga, u mngerem ma a fatyô u daase a na yemen a mi pe gen shin una ur je kpaa nahan.”—Mkaanem ma kwase ugen, iti na ér Pamela.

De gbe nen uwer ga. Aluer wan wen ngu vendan u dondon atindi a ne we un la yô, tsahan nen un hanma shighe sha igbenda i ne tsough la kpee. Kpa aluer ngu dondon atindi a ne we un la yô, wuese nen un hanma shighe cii.

“Ka m wuese mbayev av hanma shighe, er ve lu ungwan kwaghwan ken tar u ior kpishi ve ongo kwagh ga ne yô. Er m wuese ve yô, ka a gba u me kôôm ve kpa i kera taver ve u ngohol kwaghwan wam la ga.”—Mkaanem ma kwase ugen, iti na ér Christine.

KWAGHWAN U BIBILO: “Kwagh u or nan lôô cii, ka un shi nana sunda ye.”—Mbagalatia 6:7.

Eren nen kwagh a mbayev enev sha kwaghfan. Shighe u i gbe u ne tsaha ma wan wen yô, nenge nen er anyom a nan a lu la, shi hen nen sha akaa a i lu u nana fatyô u eren man a nana fatyô ga la, shi nenge nen aluer kwagh u doon ga u nan er la ka kwagh u vesen shin u cuku yô. Ka a tsaha wanye sha kwagh u doon ga u nan er la jighilii yô, kwagh la a hemba wasen nan. Ikyav i tesen yô, aluer wan wen nan ngu eren kwagh a hanseeti sha gbenda u vough ga yô, ne fatyô u ngohol hanseeti shon hen a nan kera, tamber ayange imôngo cii hiden nan nan ye. Aluer wan wen nan er kwagh u doon ne ga man ka ankwagh u cuku yô, de vihin nen ishima a nan ga.

“Wan wam ka una er kwagh u m vande tan un icin sha mi yô, m nôngo mer me fa aluer ka sha apera a er kwagh shon shin ka sha apera ga yô. Aluer wan wou nan ngu a ieren i doon ga i u soo wer nana de yô, ngura ka kposo a kwagh u doon ga u ka i kar a kar ve nan za er la.”—Mkaanem ma orgen, iti na ér Wendell.

KWAGHWAN U BIBILO: “De ne nen ônov enev ishimavihin ga, sha er iyol ia kpe ve ga yô.”—Mbakolose 3:21; ngeren u shin kpe.

Eren nen kwagh a mbayev enev sha dooshima. Mbayev ka vea fa ér ormaren ve nan ngu tsahan ve ka sha ci u ve doo nan ishima yô, ve hemba keghen iyol u lumun gbenda u ormaren ve la nan tsahan ve la shi dondon kwaghwan u nan.

“Wan wase yange una er kwagh u shami ga yô, se pase un wang ser akaa a yange tsua u eren la yange doo se kpishi. Shi se pase un ser, aluer a kera kimbir kwagh la ga shi a lumun ér se wase un una kera kimbir ga yô, kwagh u doon ga u a er la una fatyô u vihin un iti ga.”—Mkaanem ma orgen, iti na ér Daniel.

KWAGHWAN U BIBILO: “Dooshima we ishima shi tesen erdoo.”—1 Mbakorinte 13:4.