VEGHER U SHA 6
Tom u Suen Tartor
U VA nyôr ken Iyou i Tartor you nahan u nenge a kwagh u kpiligh we iyol. U te ave vanger a imaagh kin. Alaghga je yô, u umbur er we kpa yange u er tom u maan i̱ anyom a karen ken ijime la yô. Man hegen je yô, u hemba tan ave vanger a Iyou i Tartor ne cii, gadia i gema i̱ hingir ijiir i nan mba aahe a er ve la iwasen her sha anshighe kpuaa. Zege uraahumbe sember eren tahav hen ijiir you la vihi ior akaa caveraa, nahan Kômatii u Nengen sha Branci mough sha fese sha u nan mba aahe shon a er ve la iwasen sha kwaghyan man akondo man mngerem ma dedoo, kua akaa agen kpaa. I sôr akaa a i ne sha u i na ior iwasen a mi la i ver sha inja sha inja. Anmgbianev mba nomso man mba kasev tim nongo van u va ngohol akaa a kwagh a gbe ve a mi la, man mbakpishiv je yô, doo ve je mba haan mliam ashe.
Yesu yange kaa ér kwagh u vesen u a fa ior nav sha mi yô, ka mdoo u ve doo ayol a ve la. (Yoh. 13:34, 35) Ken vegher ne, se lu timen sha gbenda u Mbashida mba Yehova ve tese dooshima u Mbakristu, sha tom ve u maan ayou man u nan mba aahe a er ve la iwasen la. Dooshima ve ne ka ikyav i tesen wang ér se mba sha ikyev i Tartor u Yesu.
KEN VEGHER NE
ITYOUGH 19
Tom u Maan Kwagh u Ú Ve Yehova a Icivir La
Ajiir a i civir Aôndo her la nga ve un a icivir, nahan kpa kwagh ugen ngu u a hembe doon un yô.
ITYOUGH 20
Tom u Wasen Mba Aahe a Er Ve La
Er nan se fe ser tom u wasen mba aahe a ve la kpa ka môm ken akaa a se eren ken mciviraôndo wase?
