మోషే ఇశ్రాయేలీయులను ఐగుప్తు చెరనుండి సీనాయి పర్వతం దగ్గరకు నడిపించాడు, అక్కడ దేవుడు వాళ్ళకు తన నియమాలను ఇచ్చాడు. తర్వాత మోషే కనాను దేశాన్ని వేగు చూడడానికి 12 మందిని పంపించాడు. అయితే వారిలో 10 మంది చెడ్డ సమాచారం తీసుకొని వచ్చారు. వాళ్ళు మళ్ళీ ఐగుప్తుకి వెళ్ళిపోవడమే మంచిదని ప్రజలు భావించేలా చేశారు. ఇశ్రాయేలీయులు విశ్వాసం లేకుండా ప్రవర్తించినందుకు దేవుడు వాళ్ళను 40 సంవత్సరాలపాటు అరణ్యంలో సంచరించేలా చేసి శిక్షించాడు.

చివరకు, ఇశ్రాయేలీయులను కనాను దేశానికి నడిపించడానికి యెహోషువ ఎన్నుకోబడ్డాడు. వాళ్ళు ఆ దేశాన్ని ఆక్రమించుకోవడానికి సహాయం చేసేందుకు యెహోవా అద్భుతాలు చేశాడు. ఆయన యొర్దాను నది ప్రవహించకుండా ఆపుచేశాడు, యెరికో గోడలు కూలిపోయేలా చేశాడు, ఓ రోజంతా సూర్యుడు నిలిచిపోయేలా చేశాడు. ఆరు సంవత్సరాల తరువాత కనానీయులనుండి ఆ దేశం స్వాధీనపర్చుకోబడింది.

యెహోషువతో ఆరంభమై ఇశ్రాయేలు దేశం 356 సంవత్సరాలు న్యాయాధిపతులచేత పరిపాలించబడింది. వాళ్ళలో బారాకు, గిద్యోను, యెఫ్తా, సమ్సోను, సమూయేలులతోపాటు అనేకమంది గురించి మనం తెలుసుకుంటాం. రాహాబు, దెబోరా, యాయేలు, రూతు, నయోమి, దెలీలా వంటి స్త్రీల గురించి కూడా మనం చదువుతాం. మొత్తం 396 సంవత్సరాల చరిత్ర మూడవ భాగంలో వివరించబడింది.