మార్కు 3:1-35
3 యేసు మళ్లీ ఓ సభామందిరంలోకి వెళ్లాడు. అక్కడ చేయి ఎండిపోయిన* ఒక వ్యక్తి ఉన్నాడు.
2 విశ్రాంతి రోజున యేసు అతన్ని బాగుచేస్తే, ఆయన మీద నిందలు వేయవచ్చనే ఉద్దేశంతో పరిసయ్యులు ఆయన్నే జాగ్రత్తగా గమనిస్తూ ఉన్నారు.
3 చేయి ఎండిపోయిన* వ్యక్తితో ఆయన ఇలా అన్నాడు: “లేచి మధ్యలోకి వచ్చి నిలబడు.”
4 తర్వాత ఆయన వాళ్లను ఇలా అడిగాడు: “విశ్రాంతి రోజున ఏమి చేయడం న్యాయం? మంచి చేయడమా, చెడు చేయడమా? ఏది ధర్మం? ప్రాణం కాపాడడమా, ప్రాణం తీయడమా?” దానికి వాళ్లు ఏమీ మాట్లాడలేదు.
5 వాళ్ల హృదయాలు ఎంత కఠినంగా ఉన్నాయో చూసి ఆయన చాలా బాధపడ్డాడు. వాళ్లందరినీ ఓసారి కోపంగా చూసి, ఆ వ్యక్తితో “నీ చేయి చాపు” అన్నాడు. అతను చేయి చాపాడు, అది బాగైపోయింది.
6 దాంతో పరిసయ్యులు బయటికి వెళ్లిపోయి, యేసును చంపాలనే ఉద్దేశంతో వెంటనే హేరోదు అనుచరులతో చర్చలు మొదలుపెట్టారు.
7 కానీ యేసు తన శిష్యులతో కలిసి సముద్రం దగ్గరికి బయల్దేరాడు. గలిలయ, యూదయ ప్రాంతాల ప్రజలు చాలామంది ఆయన వెనకాలే వెళ్లారు.
8 ఆయన చేస్తున్న ఎన్నో పనుల గురించి విని యెరూషలేము, ఇదూమయ ప్రాంతాల నుండి, యొర్దానుకు తూర్పున ఉన్న ప్రాంతం నుండి, తూరు, సీదోను పరిసర ప్రాంతాల నుండి కూడా చాలామంది ఆయన దగ్గరికి వచ్చారు.
9 జనం తన మీద పడకుండా ఉండడానికి తన కోసం ఒక చిన్న పడవ సిద్ధంగా ఉంచమని ఆయన తన శిష్యులకు చెప్పాడు.
10 ఆయన చాలామందిని బాగుచేశాడు కాబట్టి, పెద్దపెద్ద జబ్బులు ఉన్నవాళ్లంతా ఆయన్ని ముట్టుకోవడానికి ఆయన చుట్టూ మూగారు.
11 అపవిత్ర దూతలు కూడా ఆయన్ని చూసినప్పుడల్లా ఆయన ఎదురుగా కిందపడి, “నువ్వు దేవుని కుమారుడివి” అని కేకలు వేసేవాళ్లు.
12 కానీ, తానెవరో చెప్పొద్దని ఆయన చాలాసార్లు ఆ దూతలకు గట్టిగా ఆజ్ఞాపించాడు.
13 యేసు ఓ కొండ మీదకు వెళ్లి, తాను ఎంచుకున్న వాళ్లను తన దగ్గరికి పిలిచాడు, వాళ్లు వచ్చారు.
14 ఆయన 12 మందితో ఓ గుంపును తయారుచేశాడు.* వాళ్లకు ఆయన అపొస్తలులు అనే పేరు కూడా పెట్టాడు. ఆ 12 మంది ఆయన వెంటే ఉన్నారు, ఆయన వాళ్లను ప్రకటించడానికి పంపాడు.
15 చెడ్డదూతలను వెళ్లగొట్టే అధికారాన్ని కూడా ఆయన వాళ్లకు ఇచ్చాడు.
16 ఆయన తయారుచేసుకున్న* గుంపులోని 12 మంది ఎవరంటే: సీమోను (ఇతనికి ఆయన పేతురు అని పేరు పెట్టాడు),
17 జెబెదయి కొడుకు యాకోబు, అతని సోదరుడు యోహాను (వీళ్లకు ఆయన బోయనేర్గెసు అనే పేరు పెట్టాడు. ఆ పేరుకు “ఉరుము పుత్రులు” అని అర్థం),
18 అంద్రెయ, ఫిలిప్పు, బర్తొలొమయి, మత్తయి, తోమా, అల్ఫయి కొడుకు యాకోబు, తద్దయి, కననేయుడైన* సీమోను,
19 ఇస్కరియోతు యూదా. ఇతనే ఆ తర్వాత యేసుకు నమ్మకద్రోహం చేశాడు.
తర్వాత యేసు ఓ ఇంట్లోకి వెళ్లాడు,
20 మళ్లీ జనం రావడంతో, కనీసం భోజనం చేయడం కూడా వాళ్లకు కుదరలేదు.
21 ఆయన బంధువులు ఇది విన్నప్పుడు, “అతనికి పిచ్చి పట్టింది” అంటూ ఆయన్ని పట్టుకోవడానికి వెళ్లారు.
22 యెరూషలేము నుండి వచ్చిన శాస్త్రులు కూడా “ఇతనికి బయెల్జెబూలు* పట్టాడు, చెడ్డదూతల నాయకుడి వల్లే ఇతను చెడ్డదూతల్ని వెళ్లగొడుతున్నాడు” అని అన్నారు.
23 అందుకు ఆయన వాళ్లను పిలిచి, ఉదాహరణలు ఉపయోగిస్తూ వాళ్లతో ఇలా అన్నాడు: “సాతాను సాతానును ఎలా వెళ్లగొట్టగలడు?
24 ఒక రాజ్యం దానిమీద అదే తిరగబడి చీలిపోతే, ఆ రాజ్యం నిలవడం అసాధ్యం;
25 ఒక ఇంట్లోవాళ్లే ఒకరిమీద ఒకరు తిరగబడి విడిపోతే, ఆ ఇల్లు నిలవడం కష్టం.
26 అలాగే, సాతాను కూడా తన మీద తానే తిరగబడి విడిపోతే, అతను నిలవలేడు కానీ నాశనమైపోతాడు.
27 అంతెందుకు, ఓ బలవంతుని ఇంట్లో దూరిన దొంగ, అతని సామాన్లు దొంగతనం చేయాలంటే ముందు ఆ బలవంతుణ్ణి కట్టేయాలి. అప్పుడే ఆ ఇల్లంతా దోచుకోగలడు.
28 నేను నిజంగా మీతో చెప్తున్నాను, మనుషులు ఎలాంటి పాపాలు చేసినా, ఎంత అవమానకరంగా మాట్లాడినా అన్నిటికీ క్షమాపణ ఉంటుంది.
29 కానీ, ఎవరైనా పవిత్రశక్తిని దూషిస్తే మాత్రం వాళ్లకు ఎప్పటికీ క్షమాపణ ఉండదు, వాళ్ల పాపం ఎప్పటికీ పోదు.”
30 “ఇతనికి అపవిత్ర దూత పట్టాడు” అని వాళ్లు అంటున్నారు కాబట్టి ఆయన అలా అన్నాడు.
31 యేసువాళ్ల అమ్మ, తమ్ముళ్లు వచ్చి బయట నిలబడి, ఆయన్ని పిలవమని ఒకరిని లోపలికి పంపారు.
32 ఆయన చుట్టూ జనం కూర్చొని ఉన్నారు కాబట్టి వాళ్లు ఆయనకు ఇలా చెప్పారు: “అదిగో మీ అమ్మ, మీ తమ్ముళ్లు బయట ఉన్నారు, వాళ్లు నీ గురించి అడుగుతున్నారు.”
33 కానీ ఆయన వాళ్లతో, “మా అమ్మ ఎవరు? నా తమ్ముళ్లు ఎవరు?” అన్నాడు.
34 ఆ తర్వాత, ఆయన తన చుట్టూ కూర్చొని ఉన్నవాళ్లను చూసి, “ఇదిగో మా అమ్మ, నా తమ్ముళ్లు!
35 దేవుని ఇష్టాన్ని నెరవేర్చే వ్యక్తే నా తమ్ముడు, నా చెల్లి, మా అమ్మ” అన్నాడు.
అధస్సూచీలు
^ లేదా “పక్షవాతం వచ్చిన.”
^ లేదా “పక్షవాతం వచ్చిన.”
^ లేదా “నియమించాడు.”
^ లేదా “నియమించుకున్న.”
^ లేదా “ఉత్సాహవంతుడైన.”
^ సాతానుకు ఉన్న ఓ బిరుదు.
