Tena mahaliagne ty raha rehafe o andinin-teny iohoe. Izao ty voarehake ao: “Ko atao’o mahalatsa azo ty mahatrea ty fampijaleagne o mahantrao naho ty tsy firaharahagne ty rare’e naho ty raha vantagne amo o taneo eo, fa i [manam-pahefagne] ambone ze amboney, le magnara-maso ty raha miseho, sady mbe misy aza ty ambone noho ireo.”—Mpito. 5:8.

Naho vaho mamaky o andine’e iohoe tika, le va’e hieretseretse tie ty ndaty manam-pahefagne agnivo o fitondragneo eo ty rehafe’e. Faie mirehake miomba i Jehovah ka o andine’e iohoe naho tena dinehegne soa, sady mampionogne naho magnomey toky antikagne ty fahafantaragne izay.

Mirehake miomba ty mpitondra raike masiake, raty fagnahy naho tsy midare vaho tsy magnomey rare’e ty ndaty rarake ty Mpitoriteny 5:8. Faie toko’e ho tadidie’e fa misy ndaty managne fahefagne ambone noho ireke ty amy fitondragneo eo sady mandineke ze raha atao’e. Va’e hisy manam-pahefagne ambone noho ireo aza. Fa ty raha mampanahelo le izao, va’e sambe hanao raha tsy mete ndra tsy rare’e iaby o ndaty manam-pahefagne rehoe, le manjare mijale ty ndaty fehe iareo, lohotsie fa ty ndaty ambane.

Faie ndra tie hoe tsy misy raha azontikagne atao aza, le mampahery ty mahafantatse tie dinehe i Jehovah ndra o ndaty manam-pahefagne amboneo aza. Azontikagne atao areke ty mitaraigne amy i Jehovah, le ankinentikagne ama’e ze kila raha magnavesatse antika. (Sal. 55:22; Fil. 4:6, 7) Haintikagne tie ‘mivazoho ze kila raha miseho ambone tane etoy ty fihaino i Jehovah, mba hanehoa’e ty heri’e hamonjeagne ze manompo aze amy ty fo’e.’​—2 Tan. 16:9.

Maniahy antika areke o Mpitoriteny 5:8 iohoe, fa ndra ia ndra ia ndaty manam-pahefagne, le lava misy avao ty manam-pahefagne ambone’e. Faie maniahy antikagne ka io fa i Jehovah ro Manam-pahefagne Fara Tampo’e. Fa manjaka reke amy izao, le i Jesosy Kristy Ana’e ty ampiasae’e hinday i Fanjakà’ey. Mahery Fara Tampo’e ty Jehovah faie manao ty rare’e naho raha vantagne avao reke, sady lava manao hoe izay ka amy ze kila o ndaty. Manao ty rare’e naho tea raha vantagne hoe izay ka i Ana’ey.