1, 2. Inogne ty fagnonteneagne toko’e hodinehe’o, sady inogne ty maha lahibey izay?

NANJARY fanta’o amy ty fianara’o Baiboly fa maro ty fivavahagne manao manompo an’Andrianagnahare, faie mampianatse ndra manao ty raha heje’e iareo. (2 Korintianina 6:17) Izay ty mahavy i Jehovah mandily ty hisintahagne o fivavahan-disò, ndra i “Babylona jabajaba.” (Apokalypsy 18:2, 4) Akore ty ama’o? Misy safily tsy maintsy atao. Toko’e handineke tika tie: ‘Magniry hanompo i Jehovah amy ty fomba teà’e vao raho, sa mbe fahazaragne avao ty anompoako aze?’

² Fa mete ty natao’o naho nisintake amy ty fivavahan-diso rehe. Faie va’e mbe sarotse ama’o ty misintake amy ty raha fanoe ty fivavahan-diso naho ty fombafomba’e. Andao handineke ty ila’e amy ireo naho ty maha lahibey ty fanagnantika ty fomba fivazohoa i Jehovah aze.

3. a) Nagnino ro va’e ho sarotse amy ty ndaty ila’e ty tsy hampiasa sare naho fa mivavake? b) Inogne ty rehafe ty Baiboly miomba ty fampiasagne sare amy ty fanompoagne an’Andrianagnahare?

³ Fa an-tao’e maro ty nampiasà ty ndaty ila’e sare, ndra alitara hivavahagne an-tragno’e ao. Naho izay ty natao’o, le va’e ho hafahafa ama’o ty tsy hampiasa aze naho fa mivavake aman’Andrianagnahare. Faie ko haligno, fa i Jehovah ty mampianatse ty fomba hivavahagne  ama’e. Rehafe ty Baiboly tie tsy teà i Jehovah hampiasagne sare ty fanompoagne aze.—Vakio Eksodosy 20:4, 5; Salamo 115:4-8; Isaia 42:8; 1 Jaona 5:21.

4. a) Nagnino tika ro tsy toko’e hivavake amy ty mate? b) Ino ty nahavy i Jehovah nandrara ty mpanompo’e tsy hirehake amy ty mate?

⁴ Va’e handany fotoagne naho hery mba hampifaleagne ty mate ty ndaty ila’e. Va’e hivavake amy i ndaty nimatey iareo. Faie fa nianarantika tie tsy afake magnampe, ndra magnisy raty antika ty mate sady tsy misy toeragne iveloma’e sasa. Magnoho-doza ty fifandrambesagne ama’e. Naho ty maregne, le boake amo o demoniao ty hafatse nao nirehafe o longo fa nimateo. Izay ty nahavy i Jehovah nandily o Isiraelitao tsy hirehake amy ty mate ndra hifandrambe amy ty ndaty itobohan-draha.—Deoteronomia 18:10-12; henteo ty Fagnazavagne 26 naho 31.

5. Ino ty hagnampe azo tsy hampiasa sare amy ty fanompoagne an’Andrianagnahare naho tsy hivavake amy ty mate?

⁵ Ino ty hagnampe azo tsy hampiasa sare amy ty fanompoagne an’Andrianagnahare naho tsy hivavake amy ty mate? Toko’e hamaky Baiboly naho handineke ty fomba fivazohoa i Jehovah o raha rehoe rehe. “Mampangorigne” aze o raha reo. (Deoteronomia 27:15) Mivavaha lognandro amy i Jehovah mba hagnampea’e azo tsy hanao o raha rehoe sady hanompo aze amy ty fomba teà’e. (Isaia 55:9) Matokisa rehe fa homey i Jehovah ty hery paliae’o mba hagnafahagne ty raha misy ifandrambesa’e amy ty fivavahan-diso.

6. Nagnino ty 25 Desambera ro finily ho andro niterahagne i Jesosy?

⁶ Agnisa ty fete malaza amy ty tontolo toy ty Kirisimasy, sady maro ty manao aze ho fankalazagne ty  niteraha i Jesosy. Faie misy ifandrambesa’e amy ty fivavahan-diso zay. Rehafe ty boke raike fangalan-kilala, fa nankalaza ty andro niboaha i masoandroy ty mpanompo sampy Romana naho fa 25 Desambera. Teà ty mpitarike fivavahagne ho Kirisitianagne ty mpanompo sampy, le nankalazae iareo ho andro niterahagne i Jesosy ty 25 Desambera ndra tie tsy naterake tamy io reke. (Lioka 2:8-12) Tsy nankalaza Kirisimasy o mpiana i Jesosy reo. Hoe ty boke Fiatombohagne Masigne ze Raha Laleke (angilé), 200 taogne tafara ty niterahagne i Jesosy: “Tsy nisy nahafantatse sady tsy nikokoa o ndaty ty date niterahagne aze.” An-jato taogne tafara ty niterahagne i Jesosy ty nanomboha ty fankalazagne Kirisimasy.

7. Nagnino ty Kirisitianagne maregne ro tsy mankalaza Kirisimasy?

⁷ Maro ty mahafantatse fa boake amy ty mpanompo sampy ty nifotora o Kirisimasio, agnisa izay ty fete atao ama’e naho ty fanoloragne fagnomezagne. Nirarà ty faritse Angiletera agne naho ty faritse ila’e Amerike agne ohatse ty fankalazagne Kirisimasy, fa fanompoan-tsampy. Nisazeagne ze nankalaza aze. Faie nankalaza Kirisimasy indraike o ndatio. Tsy mankalaza Kirisimasy ty Kirisitianagne maregne. Nagnino? Te hampifale i Jehovah amy ty raha atao’e iareo.

8, 9. Nagnino ty Kirisitianagne taloha ro tsy nankalaza andro nahaterahagne?

⁸ Fete malaza ankalazae o ndatio ty andro nahaterahagne. Mankalaza izay ka vao ty Kirisitianagne? Rehafe ty Baiboly fa ndaty tsy nanompo i Jehovah ty nankalaza ty andro niterahagne aze. (Genesisy 40:20; Marka  6:21) Natao hagnomezam-boninahitse ty andrianagnahare diso ty fankalazagne izay. Izay ty mahavy ty Kirisitianagne taloha “nihevetse ty fankalazagne ty andro nahaterahagne ho fomba ty mpanompo sampy.”—Ty Fahaian-draha ty Tontolo Toy (angilé).

⁹ Nino ty Romana naho ty Girìke taloha, fa misy fagnahy miseho naho fa misy ndaty aterake, le miaro aze amparake ty iaigna’e. Hoe ty boke Talilin-drazagne Miomba ty Andro Niterahagne (angilé): “Nisy fifandrambesagne hafahafa tamo o fagnahy iohoe naho ty andrianagnahare terake tamy ty andro niterahagne i ndatỳ.”

10. Nagnino ty Kirisitianagne ro tsy mankalaza andro nahaterahagne?

¹⁰ Teà i Jehovah vao ty fankalazagne fete mifandrambe amy ty fivavahan-diso? (Isaia 65:11, 12) Tsy teà’e. Izay ty mahavy antika tsy mankalaza andro nahaterahagne, ndra fete mifandrambe amy ty fivavahan-diso.

11. Ino ty mahavy o ndatio hankalaza fete, le ino ty toko’e ho lahibey ama’o?

¹¹ Misy ndaty mahafantatse fa boake amy ty mpanompo sampy o Kirisimasio naho ty fete ila’e, faie le mbe mankalaza aze avao. Eretserete’e fa io ty fotoagne soa hiharoagne amy ty keleiagne. Izay ka vao ty heve’o? Tsy raty ty manokagne andro mba hiharoagne amy ty keleiagne. I Jehovah ty namorogne o keleiagneo, le teà’e hifandrambe soa amy iareo tika. (Efesianina 3:14, 15) Faie ty fifandrambesantika amy i Jehovah ro toko’e ho lahibey, fa tsy ty hampifale ty longontika amy ty fankalazagne ty fete atao ty fivavahan-diso. Izay ty nahavy i apositoly Paoly nirehake tie: “Fantaro lognandro ze teà i Tompo.”—Efesianina 5:10.

12. Inogne ty va’e hahavy ty fete raike tsy ho teà i Jehovah?

 ¹² Maro ty ndaty mieretseretse tie tsy magnino ty niavia o feteo. Faie tsy izay ty fihevera i Jehovah aze. Tsy mahafale aze ty fete boake amy ty fivavahan-diso, ndra magnambone ndaty, ndra ty mareke famantaragne firenena. Nanao fankalazagne maro hoahy ty andrianagnahare diso iareo ohatse o Ejipisianao. Nankalaza ty fete ty mpanompo sampy o Isiraelitao naho fa niala boake Ejipita agne. “Fete hoahy i Jehovah” ty nirehafa iareo aze. Faie nisazea i Jehovah iareo naho fa nanao izay. (Eksodosy 32:2-10) Izay ty nahavy Isaia mpaminany nirehake tie, “ko mitsapa ze maloto!”—Vakio Isaia 52:11.

13. Ino ty va’e ho fagnontenea’o naho fa tapa-kevetse tsy hankalaza fete rehe?

¹³ Va’e ho maro ty fagnontenea’o naho fa tapa-kevetse tsy hankalaza fete. Ohatse: Ino ty toko’e hataoko naho agnontenea ty mpiharo miasa amako ty anto’e tsy anoako Kirisimasy? Ino ty toko’e hataoko naho misy magnomey fagnomezagne ahy naho fa Kirisimasy? Ino ty hataoko naho teà ty valiko hankalaza fete raho? Akore ty hagnampeako ty anako mba tsy hanahelo naho fa tsy mankalaza fete ndra ty andro niteraha’e iareo?

14, 15. Inogne ty azo’o atao naho misy miarahaba ndra magnomey fagnomezagne azo?

¹⁴ Raha lahibey ty fahaiagne mandineke ty toko’e hatao naho fa hirehake miomba ty fete raike tsy ankalazae’o. Va’e hisy ndaty ohatse hiarahaba azo, faie tsy toko’e handrara aze rehe, fa hireheke tie: “Misaotse  azo.” Faie naho misy ka ty te hahafantatse ty anto’e tsy anoa’o fete, le hazavao ama’e. Misoà fagnahy, magnajà aze sady mahaia manahatsahatse naho fa manao izay. Hoe ty Baiboly: “Manoa rehake fanjaka naho mafiry sira lognandro, soa tie ho hai’areo ty mamale ty ndaty tsikiraidraike.” (Kolosianina 4:6) Mete ho afake hagnazava rehe tie tea manokagne fotoagne miharo amy ty hafa naho magnomey fagnomezagne. Faie ndraleo’o amy ty andro hafa ty anoagne izay.

¹⁵ Akore ty atao’o naho misy ndaty manolotse fagnomezagne azo? Tsy misy lisitse ty miomba izay ty agnate Baiboly ao, faie rehafe’e fa toko’e halio vetsevetse tika. (1 Timoty 1:18, 19) Va’e tsy fanta i ndatỳ, fa tsy mankalaza i fetey rehe. Va’e hirehake reke tie: “Fantako rehe tie tsy mankalaza ty fete toy, faie teàko homeigne azo toy.” Ndra izay ty miseho, mbe azo’o atao ty manapa-kevetse ndra handrambe i fagnomezagney ndra tsy handrambe aze. Ndra inogn’ino ty fanapaha-keve’o, le anò azo antoke fa halio ty vetsevetse’o. Tsy te hanao raha hanimba ty fifandrambesantika amy i Jehovah tika.

16. Ino ty toko’e hatao’o naho te hankalaza fete ty keleia’o?

¹⁶ Akore ty toko’e hatao’o naho te hankalaza fete ty keleia’o? Ko haligno, fa managne zo hanao ze raha teà’e iareo, fa tsy toko’e hialia’o. Toko’e ho soa fagnahy naho hagnaja ty safily iareo rehe naho teà’o hanao izay ama’o ka iareo. (Vakio Matio 7:12.) Faie, akore ty hatao’o naho teà ty keleia’o hanokagne fotoagne hanoagne fete amy iareo rehe? Mivavaha amy i Jehovah, aloha ty handrambesa’o fanapaha-kevetse. Mieretsereta  miomba o raha iohoe sady manoa fikarohagne. Ko haligno, fa teà’o ty hampifale i Jehovah lognandro.

17. Ino ty hatao’o mba hagnampeagne ty ana’o tsy hanahelo naho fa mahatrea ty hafa manao fete?

¹⁷ Ino ty azo’o atao mba hagnampeagne ty keleia’o naho te hankalaza fete iareo? Afake manao raha miambake hoahy iareo rehe ndra tie tsy andro fete. Azo’o meagne fagnomezagne amy ty fotoagne tsy ampoize’e iareo. Fagnomezagne tsy misy hoe’e ty fagnomea’o ty fotoa’o naho ty hatea’o ty ana’o.

18. Nagnino tika ro toko’e hagnatreke fivoriagne Kirisitianagne?

¹⁸ Toko’e hisintake amy ty fivavahan-diso naho ty fombafomba’e vaho ty fete’e tika mba hampifaleagne i Jehovah. Toko’e hagnorike ty fivavahagne maregne ka tika. Akore ty anoagne izay? Magnatreke tsy tapake ty fivoriagne Kirisitianagne. (Vakio Hebreo 10:24, 25.) Lahibey amy ty fivavahagne maregne ty fivoriagne. (Salamo 22:22; 122:1) Mifampahery tika naho fa mivory.—Romanina 1:12.

19. Nagnino ro lahibey ty firehafa’o ty raha nianara’o amy ty hafa?

¹⁹ Ty firehafa’o amy ty hafa ty raha nianara’o agnate Baiboly ao ty fomba azo’o agnorihagne ty fivavahagne maregne. Maro ty ndaty kivy amy ty raha raty miseho an-tane etoy. Va’e mahafantatse ty ila’e amy iareo rehe. Rehafo amy iareo ty raha soa tamae’o amy ty hoavy. Tsy hagniry handrambe anjara amy ty fivavahan-diso naho ty fombafomba’e sasa rehe naho fa magnatreke fivoriagne Kirisitianagne sady mirehake ty hamarenagne nianara’o agnate Baiboly ao. Azo antoke fa ho fale rehe sady ho tahie i Jehovah ty kezake atao’o amy ty fagnorihagne ty fivavahagne maregne.—Malakia 3:10.