Jesus komprende terus neʼebé ita sente tanba krime no hahalok la justisa. Uluk, ema duun matak nia, sira kontra lei hodi baku nia, ema tesi-lia ba nia la ho justisa, fó-kastigu ba nia maski nia la halo sala, no oho nia iha dalan neʼebé aat tebes. Maski nia la halo sala, nia la hanoin an no prontu atu fó “ninia moris hodi sosa fali ema barak”. (Mateus 20:28; João 15:13) Lakleur tan, Jesus neʼebé agora sai Liurai ba Maromak nia Ukun sei lori justisa ba mundu tomak, no nia sei halakon krime ba nafatin.—Isaias 42:3.

 Bíblia esplika kona-ba situasaun iha mundu neʼe sei sai oinsá depois Jesus halo buat ruma:

•   “Ema aat sei la iha ona; ó sei hateke ba sira-nia fatin, maibé sira la iha neʼebá. Maibé ema laran-maus sei simu rai nuʼudar sira-nian, no sira sei hetan ksolok boot ho dame neʼebé barak.”—Salmo 37:10, 11.

 Oinsá ita bele hatudu agradese ba buat neʼebé Jesus halo ona no lakleur tan sei halo ba ita? Dalan ida mak atu aprende liután “liafuan diʼak kona-ba Maromak nia Ukun”, neʼe mak mensajen neʼebé uluk Jesus haklaken. (Lucas 4:43) Atu hatene liután, lee informasaun “Saida mak Maromak nia Ukun?”