Karta husi Rai-Papua Giné Foun

Ahu-ruin iha foho leten

IHA loron-tersa, tuku lima dadeer neʼebé manas ona iha sidade ida naran Lae, iha rai-Papua Giné Foun, haʼu ho haʼu-nia feen prepara hela atu bá fatin ida naran Lengbati, iha Foho-Rawlinson nia leten iha Provínsia Morobe. Ami bá neʼebá atu vizita grupu ida husi Testemuña ba Jeová.

Atu bá fatin neʼebá, ami saʼe aviaun kiʼik durante minutu 30. Dala barak kuandu haʼu saʼe aviaun hanesan neʼe, haʼu tuur besik pilotu, ka ema neʼebé kaer aviaun, no tanba lian makaʼas, ami tau headphone iha tilun atu bele rona malu. Pilotu hatudu mai haʼu buat hotu iha aviaun laran neʼebé hatudu oinsá atu lori aviaun, no nia koʼalia halimar katak se buat ruma akontese ba nia, haʼu mak tenke kaer aviaun. Ida-neʼe halo haʼu hanoin-hetan kedas buat neʼebé akontese ba katuas ida seluk neʼebé uluk mós vizita kongregasaun husi Testemuña ba Jeová iha rai neʼe. Kuandu katuas neʼe saʼe aviaun hamutuk ho nia feen, pilotu neʼebé kaer aviaun dezmaia tiha. Maibé aviaun nia komputadór automátiku mak lori aviaun toʼo pilotu hadeer fali. Haʼu kontente katak la iha buat ida neʼebé akontese ho ami no katak buat hotu sai diʼak.

Agora ami-nia aviaun semu besik foho sorin, depois ami liu kalohan ida, derrepente ami-nia aviaun semu maizumenus metru 100 deʼit husi foho-tutun. Kuandu ami besik atu tun ba aldeia Lengbati, ami haree uma sira neʼebé halo husi duʼut maran. Nuʼudar ami semu haleʼu aviaun tun-fatin, pilotu haree se buat hotu diʼak, katak labarik husi aldeia neʼe la halimar bola iha neʼebá, no katak fahi la halo kuak ruma iha fatin neʼe. Nuʼudar nia fila atu tun, nia hatete: “Buat hotu diʼak, ita bele tun ona.” Depois, ami tun iha aviaun-fatin neʼe. Fatin neʼe, ema husi aldeia mak halo iha foho sorin no foin taka ho ahu-ruin rahun husi foho neʼebé besik sira.

Uluk, kuandu haʼu mai iha fatin neʼe, haʼu haree ahu-ruin rahun no hanoin foho neʼe iha tinan hira ona. Haʼu hanoin kona-ba forsa boot neʼebé presiza atu halo ahu-ruin kilómetru atus ba atus husi tasi saʼe atu sai foho ida neʼebé aas kilómetru haat! Tun tiha husi aviaun, ami hamriik iha ahu-ruin neʼe nia leten.

Hanesan baibain, ema barak husi aldeia halai ba aviaun-fatin kuandu haree katak aviaun ida atu tun. Kuandu aviaun para tiha, haʼu haree mane ida husi ema-lubun neʼe hakbesik ami. Ninia naran Zung. Nia ho maluk balu seluk iha knaar atu tau matan ba programa hanorin nian iha área neʼe neʼebé Testemuña ba Jeová halaʼo semana-semana iha mundu tomak. Ema iha aldeia koñese nia nuʼudar ema  neʼebé moris moos no laran-moos. Nia sai hanesan neʼe tanba nia aprende atu halo tuir Bíblia nia matadalan sira iha ninia moris. Depois kumprimenta malu no kaer liman, ami laʼo tun uitoan iha rai-lolon hamutuk ho Zung no ema seluk neʼebé Testemuña ba Jeová. Joven no labarik sira tuir ami, sira haksesuk malu kona-ba sé mak sei lori ami-nia pasta.

Ami toʼo iha uma kiʼik ida neʼebé Testemuña ba Jeová iha neʼe mak halo. Uma neʼe halo ba katuas neʼebé mai vizita sira maizumenus kada fulan neen. Maski Papua-Giné Foun mak rai neʼebé manas, maibé iha neʼe malirin tebes tanba iha foho leten. Iha kalan kuandu ami halo lakan lampu neʼebé uza mina-rai, dala barak haʼu haree kalohan neʼebé neineik-neineik saʼe husi foho-leet no tama uma liuhusi kuak sira. Ami hakfodak katak oras balu liubá, ami sente manas tebetebes iha rai besik tasi, maibé agora ami tenke hatais faru mahar no kalsa naruk tanba malirin tebes.

Maizumenus tinan 30 liubá, señór ida husi aldeia neʼe estuda Bíblia ho Testemuña ba Jeová iha sidade Lae. Kuandu nia fila fali ba ninia aldeia, nia hamutuk ho ema balu kontente atu harii reuniaun-fatin kiʼik ida. Maibé, pastór husi igreja Luterana husi rai neʼe hamutuk ho ema neʼebé apoia nia sunu reuniaun-fatin neʼe toʼo rahun hotu. Sira hakarak hatudu katak área neʼe ba ema Luteranu deʼit. Maibé, husi tempu neʼebá Testemuña ba Jeová harii fali reuniaun-fatin ida seluk. Maski ema kontra hasoru sira beibeik, maibé agora Testemuña ba Jeová maizumenus ema naʼin-50 ona. Ema balu neʼebé uluk kontra Testemuña ba Jeová no lakohi sira atu halo sira-nia serbisu haklaken, agora sira mós tuir no haklaken ho laran-manas.

Ohin loron, ema husi aldeia neʼe simu ho diʼak Testemuña ba Jeová neʼebé hanorin sira husi Bíblia. Maski iha aldeia neʼe ema uitoan deʼit mak hatene lee, maibé ema barak neʼebé sai Testemuña ba Jeová aprende ona atu lee, hodi nuneʼe sira mós bele haklaken fali ba ema seluk kona-ba mensajen husi Bíblia. Semana-semana, maizumenus ema naʼin-200 tuir reuniaun sira neʼebé halaʼo iha Salaun Reinu husi Testemuña ba Jeová.

Tanba iha foho leten neʼe la iha eletrisidade, iha kalan ami bá iha fatin neʼebé atu teʼin, no ami haneruk ahi, han hamutuk, koʼalia ba malu, no hamnasa. Husi ahi neʼebé nabilan iha ami-nia maluk nia oin, ami haree katak sira kontente tebes atu serbí Maromak Jeová. Depois neʼe, tanba kalan sai boot ona, sira balu foti ai-sanak ho ahi-lakan atu fó naroman nuʼudar sira fila ba sira-nia uma.

Kuandu ami laʼo fali ba uma, ami hakfodak katak fatin neʼe hakmatek tebes. Ami rona deʼit lian oioin mai husi ai-laran neʼebé haleʼu ami. Antes ami bá toba, ami haree ba lalehan no hakfodak atu haree momoos fitun barak tebes.

Ba ami, semana ida-neʼe liu lalais deʼit, no ami atu hela kalan ida tan iha Lengbati. Iha foho-leten neʼe kapás tanba malirin, maibé aban ami sei hein aviaun atu fila fali ba ami-nia rai neʼebé manas besik tasi-ibun.