María Isabel mak haklaken-naʼin joven ida neʼebé hela iha sidade San Bernardo iha rai-Xile, iha Amérika Súl. Nia ho ninia família mak ema rasa Mapuxe, no sira hotu laran-manas atu apoia kongregasaun foun neʼebé uza língua Mapuxe, neʼebé mós bolu lia-mapudungun.

Kuandu sira rona avizu iha kongregasaun katak Memoriál ba Kristu nia mate sei halaʼo iha lia-mapudungun no katak iha konvite ho lian neʼe hamutuk 2.000, ida-neʼe halo María Isabel hanoin oinsá mak nia bele apoia arranju neʼe. Nia hanoin-hetan joven Testemuña sira seluk nia esperiénsia kona-ba oinsá sira hetan rezultadu diʼak hodi haklaken ba maluk eskola no mestre sira. Nia koʼalia kona-ba neʼe ho ninia inan-aman, no sira deside atu María Isabel halo planu hodi fahe konvite iha eskola. Entaun, María Isabel halo planu saida?

Ulukliu, María Isabel koʼalia ho ema neʼebé toma konta ba eskola hodi husu lisensa atu tau konvite iha fatin atu tama ba eskola. Sira fó lisensa ba nia no gaba nia. Loron ida, diretór-eskola mós fó-hatene ba alunu hotu kona-ba konvite neʼe liuhusi mikrofone!

Tuirmai, María Isabel husu lisensa atu vizita sala hotu iha eskola. Depois mestre-mestra sira fó lisensa, nia vizita sala hotu no husu se iha ema Mapuxe. Nia hatete: “Foufoun, haʼu hanoin katak iha eskola tomak ema naʼin-10 ka 15 deʼit mak husi rasa Mapuxe, maibé tuir loloos iha barak liután, no ikusmai, haʼu fahe konvite hamutuk 150!”

Kuandu señora ida tama ba eskola, nia haree konvite, no hakarak husu informasaun liután kona-ba Memoriál. Maibé, kuandu ema lori señora neʼe ba labarik neʼebé ho tinan sanulu deʼit, nia hakfodak tebes! Kona-ba señora neʼe, María Isabel hatete ho oin-midar: “Nia hanoin atu hasoru ema ruma neʼebé idade boot liu.” María Isabel fó konvite ba señora neʼe no esplika uitoan, depois nia husu señora neʼe nia hela-fatin atu nia ho ninia inan-aman bele vizita hodi esplika liután kona-ba Maromak nia Ukun. Ikusmai, haklaken-naʼin 20 neʼebé halo serbisu haklaken ho lia-mapudungun, sira ho haksolok tebes simu señora neʼe no mós ema seluk hamutuk naʼin-26 iha Memoriál neʼe. Agora, grupu neʼe sai ona kongregasaun neʼebé laran-manas tebes!

Maski ita idade kiʼik ka boot, ita mós bele halo planu ka lae, hodi konvida ita-nia maluk eskola ka maluk serbisu atu tuir Memoriál, diskursu públiku, ka reuniaun boot ruma? Diʼak mós atu buka esperiénsia husi ita-nia livru sira hodi hetan ideia diʼak kona-ba oinsá ita bele halo nuneʼe. Liután neʼe, ita presiza halo orasaun atu husu Jeová nia espíritu santu hodi fó aten-brani mai ita atu koʼalia kona-ba nia. (Lc 11:13) Se ita halo nuneʼe, ita mós bele haksolok ho rezultadu diʼak husi ita-nia hakaʼas-an ho planu diʼak.