Haʼu moris iha sidade Mulhouse iha rai-Fransa, iha bairru neʼebé nakonu ho ema kiak no violénsia. Husi kiʼik kedas, haʼu haree beibeik ema haksesuk malu entre família. Iha haʼu-nia família, mane la hafolin feto no la husu feto nia hanoin. Haʼu rona katak feto nia fatin mak dapur, no feto tenke tau matan ba mane no labarik sira.

Haʼu-nia moris la hakmatek. Bainhira haʼu tinan 10, haʼu-nia aman mate tanba hemu tua demais. Liutiha tinan lima, haʼu-nia maun ida oho an. Iha tinan neʼe mós haʼu haree ho matan rasik ema neʼebé haksesuk malu toʼo oho malu entre família. Ida-neʼe estraga haʼu-nia neon. Haʼu-nia família hanorin haʼu oinsá atu uza kroʼat no kilat. Haʼu komesa tatoo haʼu-nia isin tomak no sai lanu-teen.

Bainhira haʼu tinan 16, haʼu toman ona hemu serveja botir 10 toʼo 15 loroloron, no lakleur haʼu mós uza droga. Atu bele hetan osan, haʼu faʼan besi aat no naʼok. Kuandu haʼu tinan 17, haʼu tama ona komarka. Iha haʼu-nia moris, haʼu tenke hatán ba haʼu-nia kazu hamutuk 18 tanba naʼok no halo violénsia.

Haʼu-nia moris sai aat liután ba beibeik. Haʼu uza droga makaʼas, toʼo dala barak haʼu besik atu mate. Haʼu mós faʼan droga, tan neʼe, haʼu presiza lori kroʼat no kilat. Loron ida, haʼu tiru mane ida, maibé kona deʼit ninia sintu nia besi! Bainhira haʼu tinan 24, haʼu-nia inan mate, neʼe halo haʼu sai laran-nakali liután. Kuandu ema haree haʼu laʼo, sira taʼuk kedas no sees husi haʼu. Tanba haʼu baku malu beibeik, dala barak haʼu gasta haʼu-nia tempu findesemana iha polísia nia fatin, se lae, iha ospitál tanba haʼu presiza suku haʼu-nia kanek.

Haʼu kaben bainhira haʼu tinan 28. Haʼu la hatudu respeitu ba haʼu-nia feen. Haʼu tarata no baku nia. Ami la halo atividade hamutuk nuʼudar feen-laʼen. Haʼu hanoin haʼu kumpre ona haʼu-nia knaar nuʼudar laʼen hodi fó ba nia korrente no kadeli barak neʼebé haʼu naʼok. Maibé loron ida, haʼu-nia feen komesa estuda Bíblia ho Testemuña ba Jeová. Depois nia estuda ba dala primeiru, nia para kedas fuma no la simu ona osan neʼebé  haʼu naʼok, nia mós fó filafali korrente no kadeli sira mai haʼu. Neʼe halo haʼu hakfodak no nervozu. Haʼu bandu nia estuda Bíblia, huu sigarru suar ba nia, no mós hamoe nia iha viziñu sira-nia oin.

Kalan ida, haʼu lanu tebes toʼo haʼu sunu ami-nia uma. Haʼu-nia feen salva haʼu no ami-nia oan-feto neʼebé tinan lima. Bainhira haʼu oin-moos fali, haʼu arrepende an. Haʼu hanoin katak Maromak sei nunka fó perdua mai haʼu. Haʼu hanoin-hetan padre dehan ema aat sei bá infernu. Haʼu-nia doutór mentál mós hatete: “Haʼu rende an ona! La iha buat ida mak bele salva ó.”

Ikusmai, ami muda ba haʼu-nia banin nia uma. Bainhira Testemuña sira mai vizita haʼu-nia feen, haʼu husu: “Maromak bele fó perdua ba haʼu-nia sala ka lae?” Sira hatudu mai haʼu 1 Korinto 6:9-11 neʼebé temi kona-ba hahalok aat oioin, no eskritura neʼe mós hatete: “Imi balu mós uluk halo hanesan neʼe.” Loos duni, haʼu mós bele troka haʼu-nia moris! Depois, sira loke tan 1 João 4:8, hodi hatudu katak Maromak hadomi haʼu. Neʼe halo haʼu sente kmaan, no haʼu husu kedas atu estuda Bíblia semana ida dala rua. Haʼu mós komesa tuir reuniaun, no halo orasaun beibeik ba Maromak Jeová.

Latoʼo fulan ida, haʼu para atu uza droga no hemu tua. Maibé, neʼe halo haʼu mehi aat, ulun-moras, isin-lolon tomak moras, no haʼu hetan susar oioin neʼebé ema hasoru bainhira atu husik droga. Maibé iha tempu hanesan, haʼu sente katak Jeová mak kaer haʼu-nia liman no ajuda haʼu. Haʼu sente hanesan apóstolu Paulo neʼebé hatete: “Iha buat hotu haʼu hetan forsa liuhusi nia neʼebé fó kbiit mai haʼu.” (Filipe 4:13) Ikusmai, haʼu mós konsege husik fuma.—2 Korinto 7:1.

Bíblia mós troka haʼu-nia moris família nian. Haʼu hadiʼa haʼu-nia hahalok ba haʼu-nia feen. Haʼu komesa hatudu respeitu ba nia no hatete “favór” no “obrigadu”. Haʼu mós sai aman neʼebé diʼak ba ami-nia oan-feto. Depois estuda Bíblia ba tinan ida, haʼu dedika an ba Jeová no hetan batizmu hodi halo tuir haʼu-nia feen nia ezemplu.

Bíblia nia matadalan salva duni haʼu. Haʼu-nia família neʼebé laʼós Testemuña mós dehan katak se haʼu la estuda Bíblia, karik haʼu mate kleur ona tanba droga, ka tanba ema oho haʼu.

Haʼu-nia moris família nian mós iha mudansa boot tanba haʼu halo tuir Bíblia nia matadalan kona-ba haʼu-nia responsabilidade nuʼudar laʼen no aman. (Éfeso 5:25; 6:4) Agora, ami halo atividade hamutuk nuʼudar família. Duké sulan haʼu-nia feen iha dapur, haʼu kontente atu apoia nia halaʼo serbisu haklaken. No haʼu-nia feen mós kontente atu apoia haʼu nuʼudar katuas kongregasaun ida.

Maromak Jeová nia domin no laran-luak book tebes haʼu-nia laran. Haʼu gosta koʼalia kona-ba Jeová nia hahalok sira, liuliu ba ema neʼebé drogadu no la iha esperansa, tanba uluk haʼu rasik mós hanesan neʼe duni. Haʼu hatene Bíblia iha kbiit atu ajuda ema hotu atu troka sira-nia moris. Loos, Bíblia hanorin haʼu atu hadomi no respeitu ema seluk, no mós haʼu-nia an rasik.