GEORGE nia situasaun triste tebetebes. Nia la bele hetan ai-han neʼebé toʼo ba ninia família. No iha tempu neʼebá mós, ema seluk iha ninia hela-fatin sai moras, no ema balu hamlaha. Maibé George hatene katak iha rai seluk neʼebé besik, situasaun iha neʼebá mak diʼak liu. Tan neʼe nia hanoin: “Haʼu sei muda ba rai neʼe hodi hetan serbisu, depois mak haʼu-nia família bele mai tuir haʼu atu hamutuk ho haʼu.”

Patricia mós mehi kona-ba moris foun iha rai seluk. Nia la iha serbisu no ladún iha oportunidade atu hetan edukasaun hodi hetan moris neʼebé diʼak. Nia hela iha rai-Nijéria no deside atu bá rai-España liuhusi rai-Arjélia. Nia hatete: “Iha tempu neʼebá haʼu isin-rua hela, no haʼu hakarak tebes atu haʼu-nia oan bele iha moris neʼebé diʼak liu.” Maibé Patricia la hatene katak atu laʼo liuhusi rai-maran Saara mak susar tebes.

Raquel hakarak atu hetan moris foun iha rai-Europa. Nia lakon ninia serbisu iha rai-Filipinas no ninia família dehan ba nia katak iha serbisu barak iha rai seluk. Tan neʼe, nia empresta osan atu saʼe aviaun no fó adeus ba ninia laʼen no oan-feto, hodi promete ba sira, dehan: “Lakleur tan ita sei hasoru malu fali.”

Maizumenus husi tinan 30 liubá toʼo agora, ema naʼin-200.000.000 hanesan George, Patricia no Raquel, mak muda ba rai seluk. Maski ema barak muda tanba hakarak halai husi funu, dezastre naturál, ka susar seluk, maibé ema barak muda tanba problema ho osan. Problema saida deʼit mak emigrante sira hasoru iha sira-nia rai foun? Sira hotu hetan duni moris diʼak neʼebé sira buka ka lae? Kuandu inan ka aman husik sira-nia oan atu bele hetan serbisu neʼebé diʼak, oinsá mak ida-neʼe bele kona oan sira? Informasaun tuirmai sei koʼalia kona-ba resposta ba pergunta hirak-neʼe.

Susar primeiru kona-ba muda ba rai seluk mak viajen atu bá neʼebá. George, neʼebé temi uluk, nia laʼo kilómetru atus ba atus no lori hahán uitoan deʼit. Nia hatete: “Viajen atu bá rai seluk mak aat tebes.” Emigrante barak la konsege toʼo iha rai neʼebé sira atu bá tanba susar neʼebé sira hasoru iha dalan klaran.

Patricia hakarak atu bá rai-España. Nia saʼe trek atu laʼo husi rai-maran Saara. Nia hatete: “Husi Nijéria toʼo Arjélia, ami laʼo semana ida, no ema naʼin-25 mak sena malu iha trek neʼe. Dala ruma, xofér sira la hanoin ema no sira hatún sira iha dalan no bá deʼit. Iha dalan, ami haree ema nia mate-isin barak no ami mós haree ema neʼebé laʼo-lemo iha rai-maran, hein atu mate deʼit.”

Raquel nia situasaun la hanesan ho George no Patricia nian. Raquel saʼe aviaun ba rai-Europa no serbisu hein hela nia. Maibé nia nunka imajina katak nia sei hanoin tebes ninia oan-feto neʼebé tinan rua. Nia hatete: “Kuandu haʼu haree ona inan ida ho ninia oan kiʼik, haʼu sente triste tebes.”

George sente susar tebes atu sai toman iha rai foun neʼebé nia foin muda ba. Ba fulan barak liutiha mak nia foin bele haruka osan ba ninia família. Nia hatete: “Dala barak haʼu tanis iha kalan tanba haʼu sente mesamesak no triste.”

Patricia hela iha rai-Arjélia ba fulan barak no depois nia laʼo bá toʼo iha fronteira iha rai-Marrokus. Nia hatete: “Iha neʼebá haʼu partus haʼu-nia oan-feto. Haʼu presiza subar husi ema neʼebé naʼok emigrante feto sira tanba sira obriga atu halo serbisu prostituisaun. Ikusmai, haʼu hetan osan neʼebé toʼo atu saʼe ró ba rai-España. Ró neʼe ladún diʼak atu lori ema barak no viajen neʼe mak perigu tebes. Ami presiza uza ami-nia sapatu atu hasai bee husi ró. Kuandu ami toʼo tiha iha rai-España, haʼu la iha tan forsa atu tun husi ró.”

Ema neʼebé hakarak atu muda ba rai seluk presiza hanoin didiʼak kona-ba susar sira neʼebé sira bele hasoru hodi halo viajen atu bá rai seluk. Maibé sira mós presiza hanoin kona-ba susar seluk hanesan aprende língua no kostume foun, no mós kona-ba susar neʼebé karik sira sei hasoru atu sai sidadaun ka hetan viza atu hela metin iha rai neʼe. Porezemplu, sira neʼebé la bele sai sidadaun legál iha rai neʼebé sira muda, susar ba sira atu hetan serbisu neʼebé diʼak, uma neʼebé diʼak, edukasaun no tratamentu médiku. Susar mós ba sira atu hetan karta-kondusaun ka konta banku. No buat neʼebé triste liu mak, dala barak ema obriga emigrante sira atu halo serbisu barak maibé fó osan uitoan deʼit.

Buat ida tan atu hanoin mak kona-ba osan neʼebé emigrante sira hakarak atu hetan. Matenek ka lae, atu tau ita-nia fiar ba osan? Bíblia fó konsellu ida-neʼe: “Hatudu matenek hodi  la hakaʼas an atu buka rikusoin. Ita-nia osan bele lakon lalais, hanesan nia iha liras rasik no semo dook hanesan makikit.” (Provérbios [Amsal] 23:4, 5, Good News Translation) La haluha mós katak liuliu buat neʼebé ita presiza mak buat neʼebé ita la bele sosa ho osan, hanesan domin no unidade iha família laran. Triste tebes kuandu inan-aman sira husik sira-nia domin ba osan atu sai importante liu fali sira-nia domin ba malu ka ba sira-nia oan sira.—2 Timoteo 3:1-3.

No mós Maromak tau iha ita-nia laran, presiza ida atu hatene kona-ba nia. (Mateus 5:3) Tan neʼe, inan-aman sira sei hakaʼas an atu kumpre knaar neʼebé Maromak fó ba sira, neʼe mak atu hanorin sira-nia oan kona-ba Maromak, ninia hakarak no ninia ukun-fuan sira.—Efeso 6:4.

Maski emigrante sira-nia istória ida-idak mak la hanesan, maibé sira hotu hasoru situasaun ida neʼebé hanesan deʼit. George, Raquel no Patricia nia esperiénsia hatudu katak susar tebes ba família se inan, aman, feen ka laʼen, husik ninia família no ba tempu kleur mak hamutuk fali. Hanesan George, nia dook husi ninia família ba tinan haat nia laran.

Raquel la hamutuk ho ninia oan-feto besik tinan lima. Ikusmai nia bá fali rai-Filipinas atu lori ho ninia oan bá hamutuk ho nia. Patricia toʼo iha rai-España ho ninia bebé feto. Nia hatete: “Haʼu-nia família mak haʼu-nia oan deʼit, tan neʼe haʼu hakarak tau matan didiʼak ba nia.”

Emigrante barak koko atu tahan nuʼudar sira hela iha rai foun maski sira sente mesamesak, iha problema ho osan, no kleur la hamutuk ho sira-nia família. Sira halo nuneʼe tanba sira gasta ona sira-nia tempu no osan barak maibé se kuandu ikusmai sira la hetan rezultadu diʼak, sira sente la brani atu fila fali ba sira-nia rai tanba sira sei sente moe.

Allan mak husi rai-Filipinas no nia iha brani duni atu fila fali ba ninia rai. Nia hetan serbisu diʼak iha rai-España maibé liutiha fulan 18, nia fila fali ba ninia rai. Nia hatete: “Haʼu hanoin tebes haʼu-nia feen no oan-feto. Haʼu deside katak haʼu sei nunka serbisu fali iha rai seluk, só deʼit se ami bele bá iha neʼebá ho família tomak. No ikusmai ami halo nuneʼe duni. Haʼu sente katak família mak importante liu fali osan.”

Patricia haree katak iha buat ida tan neʼebé importante liu fali osan. Kuandu nia toʼo iha rai-España nia lori “Testamentu Foun”, ka Eskritura Lia-Gregu. Nia hatete: “Haʼu hanoin livru neʼe sei lori sorte mai haʼu. Depois, haʼu hasoru feto ida neʼebé Testemuña ba Jeová. Uluk, haʼu la iha interese atu koʼalia ho sira. Entaun haʼu husu pergunta barak ba nia atu hatudu katak sira-nia fiar mak sala. Maibé haʼu hakfodak tanba nia defende ninia fiar hodi hatudu resposta sira husi Bíblia.”

Patricia aprende katak atu hetan kontente neʼebé loos no iha esperansa diʼak ba futuru, neʼe la depende ba osan no fatin neʼebé ita hela. Maibé ita presiza aprende kona-ba Maromak no ninia hakarak ba ita. (Joao 17:3) Patricia aprende buat barak hanesan Maromak neʼebé loos iha naran rasik, neʼe mak Jeová. (Salmo [Mazmur] 83:18) Nia mós aprende husi Bíblia katak lakleur tan Maromak sei halakon kiak liuhusi ninia Governu neʼebé Jesus Kristu mak ukun. (Daniel 7:13, 14) Iha Salmo 72:12, 14 hatete: “[Jesus] sei salva ema kiak neʼebé halerik hodi husu ajuda, no mós ema neʼebé hasoru susar no ema neʼebé la hetan ajuda. Nia sei sosa fali sira-nia moris husi terus no violénsia.”

Diʼak atu uza tempu hodi estuda Bíblia tanba livru neʼe nakonu ho matenek husi Maromak. Bíblia bele ajuda ita atu hatene buat neʼebé importante liu iha ita-nia moris, ajuda ita atu halo desizaun ho matenek, no atu tahan hasoru susar naran deʼit.—Provérbios (Amsal) 2:6-9, 20, 21.