HAREE bá saida mak akontese daudauk! Ema neʼebé lolo ai-tonka iha Tasi Mean nia leten mak Moisés. Sira neʼebé hamutuk ho nia mak ema Izraél. Sira la iha perigu, maibé Faraó no nia soldadu sira mout iha tasi laran. Mai ita haree oinsá ida-neʼe akontese.

Hanesan ita aprende tiha ona, Faraó haruka ema Izraél sai husi Ejitu depois Maromak fó malisan 10 ba ema Ejitu. Maizumenus mane Izraél naʼin-600.000, hamutuk ho feto no labarik barak sai husi Ejitu. No mós, ema barak seluk, neʼebé sai fiar-naʼin ba Jeová, bá hamutuk ema Izraél. Sira hotu mós lori sira-nia bibi no karau.

Antes ema Izraél bá, sira husu ema Ejitu atu fó roupa, osan-mean no osan-mutin. Ema Ejitu taʼuk tebes, tanba malisan ikus neʼe. Nuneʼe, buat hotu neʼebé ema Izraél husu, sira fó deʼit.

Loron balu tuir mai, ema Izraél toʼo Tasi Mean. Iha neʼebá sira deskansa. Iha tempu neʼebé hanesan, Faraó no nia ema sente laran-rua tanba sira husik tiha ema Izraél bá. Sira hatete: ‘Ita lakon ita-nia atan sira!’

Tan neʼe, Faraó troka nia hanoin dala ida tan. Lalais deʼit, nia halo prontu nia kuda-karreta funu nian no nia tropa sira. Depois, nia duni tuir ema Izraél ho kuda-karreta espesiál 600, no mós Ejitu nia kuda-karreta funu nian seluk hotu.

Kuandu ema Izraél haree Faraó no nia soldadu sira mai, sira taʼuk tebetebes. La iha dalan atu halai. Iha sorin ida iha Tasi Mean, no iha sorin seluk ema Ejitu mai. Maibé, Jeová tau kalohan ida iha nia povu no ema Ejitu nia klaran. Nuneʼe, ema Ejitu la bele haree ema Izraél atu ataka sira.

Depois, Jeová haruka Moisés atu lolo ai-tonka iha Tasi Mean nia leten. Kuandu nia halo nuneʼe, Jeová halo anin huu makaʼas. Bee iha tasi laran fahe ba rua, no sai hanesan didin.

Depois, ema Izraél laʼo iha rai maran atu hakur tasi. Presiza oras barak ba ema rihun ba rihun hamutuk ho sira-nia animál sira, atu hakur toʼo sorin seluk, neʼebé perigu la iha. Ikusliu, ema Ejitu bele haree fali ema Izraél. Sira-nia atan sira halai daudauk! Nuneʼe, sira tama deʼit iha tasi atu duni tuir atan sira-neʼe.

Kuandu sira halo nuneʼe, Maromak halo kuda-karreta nia roda monu. Ema Ejitu taʼuk no hakilar: ‘Jeová halo funu ba ema Izraél atu hasoru ita. Mai ita sai husi neʼe!’ Maibé, tarde liu.

Neʼe mak tempu neʼebé Jeová haruka Moisés atu lolo ai-tonka iha Tasi Mean nia leten, hanesan ó haree iha dezeñu. No kuandu Moisés halo nuneʼe, didin bee neʼe monu no taka ema Ejitu no sira-nia kuda-karreta funu nian. Soldadu hotu duni tuir ema Izraél hodi tama tasi. Tan neʼe, la iha ema Ejitu ida neʼebé moris hela!

Maromak nia povu kontente tebes tanba hetan salvasaun! Mane sira kanta atu fó obrigadu ba Jeová, hodi hatete: ‘Jeová manán iha dalan neʼebé furak tebes. Nia soe kuda no ema neʼebé saʼe kuda ba tasi laran.’ Moisés nia biin Miriam lori nia tamborín, no feto hotu seluk tuir nia ho sira-nia tamborín. Nuʼudar sira dansa ho haksolok, sira mós kanta: ‘Jeová manán iha dalan neʼebé furak tebes. Nia soe kuda no ema neʼebé saʼe kuda ba tasi laran.’