PĚNGANGĚNDUNGANG 6
Apa Pělaharapẹ̌ gunang Taumata Nate?
1. Habarẹ̌ mapia apa su taumata nate?
Su tempong Yesus nasongo su Betani, soa maraning Yerusalem, hapịe i Lazarus seng nilěbing ěpạ u ěllo. Yesus nakoạ sarang pěndal᷊ěbingang dingangu wawineng Lazarus, i Marta dingangi Maria. Bọu ene, taumata lawọ nẹ̌tampung. Kěnang pẹ̌tiněna kerea pěndang i Marta dingangi Maria su tempong mahuaneng i sire saụ nipěbiahẹ̌ kara i Yesus?—Basa Yohanes 11:21-24, 38-44.
I Marta seng masingkạ habarẹ̌ mapia soal u taumata nate. I sie masingkạ Yehuwa sarung saụ mapakawiahẹ̌ taumata nate su dunia ini.—Basa Ayub 14:14, 15.
2. Kerea keadaan taumata nate?
Mawu nẹ̌bera si Adam, ”I kau nikoạ bọu ěntana, kụ saụ mẹ̌sul᷊e su ěntana.”—KEJADIAN 3:19.
Taumata nikoạ bọu ěntana. (Kejadian 2:7; 3:19) Tawẹ apa himukudẹ̌ arau rohkě su ral᷊ungu wadang i kite. Su tempong i kitẹ nate, tawẹ apa bageang bal᷊inẹ bọu wadang i kitẹ tatapẹ̌ biahẹ̌. Su tempong nate, otakẹ̌ i kitẹ lai nate, kụ i kitẹ seng tawe makatahěndung apa-apa. Hakị u ene, i Lazarus tawe nẹ̌běke apa seng nikoạe su tempong i sie nate, ual᷊ingu i sie běgaweng apa-apa.—Basa Mazmur 146:4; Pengkhotbah 9:5, 6, 10.
Apa Mawu měhukung taumata nate su putung? Alkitapẹ̌ naul᷊ị, taumata nate běgaweng apa-apa, hakị u ene naraka ene kai sěmbaụ těntiro konti, mělẹ̌hinakang Mawu. Měnutung taumata su naraka, ene tawẹ apa su tiněnang Mawu.—Basa Yeremia 7:31.
Pẹ̌biala video Apa Sarung Mariadi su Tempong Taumata Mate?
3. Apa taumata nate botonge mẹ̌bisara si kitẹ?
Taumata nate tawe makapẹ̌bisara arau makaringihẹ̌. (Mazmur 115:17) Katewe piạ malaekatẹ̌ dal᷊akị, i sire měbẹ̌bisara su taumata dingangu mětẹ̌těngkakoạ mẹ̌sul᷊ungu taumata nate. (2 Petrus 2:4) Yehuwa nẹ̌sěding si kitẹ mẹ̌bisara dingangu taumata nate.—Basa Ulangan 18:10, 11.
4. I sai sarung saụ ipěbiahẹ̌?
Miliarẹ̌e taumata apang seng nate sarung saụ ipěbiahẹ̌ su dunia. Maning taumata běgang Mawu arau apang měkẹ̌koạ dal᷊akị, i sire lai sarung saụ ipěbiahẹ̌.—Basa Lukas 23:43; Kisah 24:15.
Taumata apang saụ nipěbiahẹ̌ sarung makaěbạ kesempatan gunang měngěndung soal u Mawu dingangu měnodẹ pangangimang si Yesus lai tumuhụ si sie. (Wahyu 20:11-13) Taumata saụ nipěbiahẹ̌ kụ měkẹ̌koạ barang mapia sarung mẹ̌tanạ su dunia ini sarang karěngụe.—Basa Yohanes 5:28, 29.
5. Su tempong Yehuwa saụ napakawiahẹ̌ taumata nate, apa kaěndungang i kitẹ soal i Sie?
Taumata nate botonge saụ ipěbiahẹ̌ ual᷊ingu Mawu seng něgělị Ahuse tadeạu mate gunang i kitẹ. Hakị u ene, pělaharapẹ̌ soal u taumata nate sarung saụ ipěbiahẹ̌, něnodẹ kakěndagi Yehuwa dingangu kapia-Ne su taumata. Su tempong taumata nate saụ nipěbiahẹ̌, i kau mapulu mẹ̌sombang dingangi sai?—Basa Yohanes 3:16; Roma 6:23.
