Musa seng taunge nakoạ těmbonangu tau Israel, kụ seng mal᷊ighạ i sie mate. Yehuwa naul᷊ị si sie, ’I kau tawe mẹ̌bawa tau Israel sarang Ěntanang Pẹ̌dariandi. Katewe, i kau botonge měmanda ěntana ene.’ Bọu ene, i Musa nẹ̌dorong Yehuwa měmile těmbonang buhu gunang měngurusẹ̌ bangsa ene. Yehuwa naul᷊ị, ’Pẹ̌sombang dingangi Yosua, kụ paul᷊ị Iạ seng němile si sie.’

Musa naul᷊ị su bangsa ene i sie seng mal᷊ighạ mate kụ i Yehuwa seng němile si Yosua makoạ těmbonang gunang mẹ̌bawa si sire sumuẹ̌ sarang Ěntanang Pẹ̌dariandi. Musa nẹ̌bera si Yosua, ’Abe katakụ. Yehuwa sarung mẹ̌tul᷊ung si kau.’ Bọu ene, Musa simaka sarang wongkong Wul᷊udu Nebo. Sene, Yehuwa něnodẹ si Musa ěntana seng niriandi-Ne si Abraham, Ishak, dingangi Yakub. Musa nate su tempong umure 120 su taunge.

Yehuwa nẹ̌bera si Yosua, ’Liuko Sal᷊ụ u Yordan, kụ tamaịe sarang Kanaan. Iạ sarung mẹ̌tul᷊ung si kau kere Iạ nẹ̌tul᷊ung si Musa. Basạe hukung-Ku ěllo-ěllo. I kau harusẹ̌ bahani. Abe katakụ. Dakọe tamai kụ koạ apa seng Takụ niparenta si kau.’

 Yosua něndolohẹ̌ darua mata-mata sarang soa Yerikho. Su ral᷊ungu běke tuhụe, i kitẹ sarung makasingkạ apa nariadi sene. Su apang seng nẹ̌bal᷊ị, i sire naul᷊ị tau Israel seng botonge sumuẹ̌ sarang Kanaan. Sěngkarịěllone, Yosua něngoro bangsa ene pẹ̌sasadia dumal᷊eng. Bọu ene, i sie něngoro manga imang apang nẹ̌bawa tabut pẹ̌dariandi dumal᷊eng kal᷊imona sarang Sal᷊ụ u Yordan. Akẹ u sal᷊ụ ene nělěba. Katewe su apang laedu manga imang nasenggehẹ̌ su akẹ, akẹ ene něngědo nělěba kụ namara! Manga imang dimal᷊eng sarang tal᷊oarang sal᷊ụ ene kụ dimarisị sene sarang kěbị tau Israel limiu. Tumuhụ si kau, apa mukjizat ini nakakoạ bangsa ene nakatahěndung apa seng nikoạ i Yehuwa su Laudẹ̌ Mahamụ?

Samurine, tau Israel nahumpạ su Ěntanang Pẹ̌dariandi. I sire botonge měkoạ bal᷊e dingangu soa. I sire botonge měkoạ tampạ pẹ̌sasuangeng, baelu anggorẹ̌, dingangu baelu manga bua wal᷊inẹ. Ěntana ene napenẹu susu dingangu madu.