Kuhitimu kwa Darasa la 131 la Gileadi

‘Mfanye Yehova Atabasamu’

WASHIRIKI wa familia, marafiki, na watu wengine walikusanyika mnamo Septemba 10, 2011, ili kuhudhuria programu ya kuhitimu kwa darasa la 131 la Shule ya Gileadi (Watchtower Bible School of Gilead). Mapema siku hiyo, wasemaji na wanafunzi walikuwa na wasiwasi na msisimuko pia. Hata hivyo, programu hiyo ilipokwisha, wahudhuriaji wote 9,063 walikuwa wakitabasamu bila wasiwasi baada ya kufurahia hotuba, maonyesho, na mahojiano.

Stephen Lett, mshiriki wa Baraza Linaloongoza la Mashahidi wa Yehova na ambaye alikuwa mwenyekiti wa programu hiyo, alitoa hotuba ya kwanza. Alizungumzia maandiko yanayomrejelea Yehova Mungu kuwa na mwili wa mfano na akakazia sehemu zinazotaja jinsi Yehova anavyotumia macho, masikio, viganja, na mikono yake ya mfano.

Kwanza, Ndugu Lett alizungumzia andiko la 2 Mambo ya Nyakati 16:9 linalosema kuwa ‘macho ya Yehova yanaenda huku na huku duniani kote ili aonyeshe nguvu zake kwa ajili ya wale ambao moyo wao ni mkamilifu kumwelekea yeye.’ Wanafunzi walihimizwa wadumishe moyo mkamilifu na kujitoa kabisa kwa Yehova. Waliambiwa kwamba wangemwiga Mungu kwa kuzingatia sifa nzuri za watu wengine. Kisha, Ndugu Lett akazungumzia andiko la 1 Petro 3:12, linalosema kuwa masikio ya Yehova yanasikiliza dua ya waadilifu. Pia, aliwahimiza wanafunzi waendelee kusali kwa Yehova, na wakumbuke kwamba anataka sana kusikiliza sala zao.

Alizungumzia pia andiko la Isaya 41:13. Katika andiko hilo Yehova anatoa ahadi hii: “Mimi, Yehova Mungu wako, ninaushika mkono wako wa kuume, Mwenye kukuambia, ‘Usiogope. Mimi mwenyewe nitakusaidia.’” Ndugu Lett alisema hivi kwa uchangamfu na kutoka moyoni: “Ona maneno hayo ya Yehova yenye kugusa moyo sana. Anaunyoosha mkono wake ili kuushika mkono wetu.” Kisha akawaambia wanafunzi kwamba sikuzote wamruhusu Yehova awasaidie na wasikatae kamwe msaada wake. Pia, aliwaambia wanafunzi hao kwamba wanaweza kumwiga Yehova kwa kunyoosha mikono yao ili wawasaidie wengine.

Mwishowe, Ndugu Lett alisoma Isaya 40:11. Kisha akawaomba wasikilizaji wawazie huruma nyororo zinazotajwa katika andiko hilo. “Yehova anatuinua kwa mikono yake,” akasema Ndugu Lett. “Anatubeba kwenye kifua chake.” Tunapaswa kutenda jinsi gani? Wanafunzi walihimizwa waendelee kuwa wapole na wenye wororo kama mwana-kondoo ili Yehova awabebe kwenye kifua chake.

“Tuna Hazina Hii Katika Vyombo vya Udongo”

David Splane, mshiriki wa Baraza Linaloongoza alizungumzia kichwa hicho kinachotegemea Maandiko. (2 Wakorintho 4:7) Hazina hiyo ni nini? Je, ni ujuzi au hekima? “Hapana,” msemaji akajibu. “Hazina ambayo mtume Paulo alizungumzia ni ‘huduma hii’ ya ‘kufanya kweli iwe wazi.’” (2 Wakorintho 4:1, 2, 5) Ndugu Splane aliwakumbusha wanafunzi kwamba miezi mitano waliyotumia kujifunza iliwatayarisha kwa ajili ya mgawo wa pekee katika huduma. Mgawo huo unapaswa kuthaminiwa sana.

Ndugu Splane alifafanua kwamba “vyombo vya udongo” ni miili yetu. Alitofautisha chombo kilichotengenezwa kwa udongo na kile kilichotengenezwa kwa dhahabu. Vyombo vya dhahabu havitumiwi mara nyingi. Kwa upande mwingine, vyombo vya udongo vinatumiwa sana. Ikiwa tungeweka hazina katika chombo cha dhahabu, huenda tungekazia fikira chombo chenyewe na vilevile hazina iliyo ndani yake. “Enyi wanafunzi, msifanye watu wawakazie fikira,” akasema Ndugu Splane. “Mkiwa wamishonari,  mngependa kuwaelekeza watu kwa Yehova. Nyinyi ni vyombo vya udongo na hamngependa kujielekezea sifa.”

Akiendelea kufafanua ulinganisho huo, Ndugu Splane alisema kwamba katika nyakati za Biblia vyombo fulani vya udongo havingeshika moto, na vingine vilikuwa vimefunikwa kwa utando wa kioo ili visibambuke. Tunajifunza nini? Katika miezi ya kwanza kwenye mgawo wao, bila shaka wamishonari watafanyiza utando mgumu. Hawatakasirika haraka wanapochambuliwa wala kuudhika. Ndugu Splane alisema: “Mtatambua kwamba ninyi ni wagumu zaidi ya vile mnavyowazia.” Yehova amekabidhi hazina hii ya huduma, si kwa malaika, bali kwa vyombo vya udongo. “Hilo linaonyesha kwamba Yehova ana uhakika nanyi,” akamalizia msemaji.

‘Mmekimbia Pamoja na Watu Wanaoenda kwa Miguu, Je, Mnaweza Kushindana Mbio na Farasi?’

“Unaweza kukimbia umbali gani na kwa mwendo wa kasi kadiri gani?” akauliza Samuel Herd mshiriki wa Baraza Linaloongoza. Kwa nini aliwauliza wanafunzi swali hilo? Msemaji alilinganisha mambo ambayo wanafunzi wamejionea na mambo yaliyompata nabii Yeremia. Haikuwa rahisi kwa mwanamume huyo mwaminifu kukabiliana na matatizo mbalimbali yaliyompata. Lakini angepatwa na matatizo makubwa zaidi baadaye. Hivyo, Yehova akamuuliza: “Kwa sababu umekimbia pamoja na watu wanaoenda kwa miguu, nao wakakuchosha, basi, unawezaje kushindana mbio na farasi?”—Yeremia 12:5.

Akiwaonyesha wanafunzi jinsi andiko hilo linavyowahusu, Ndugu Herd alisema: “Huenda mkahisi kwamba mmekuwa mkikimbia pamoja na farasi kwa sababu ya mitihani yote mliyofanya. Lakini kwa kweli mmekuwa mkikimbia na watu wanaoenda kwa miguu, sio farasi. Katika migawo yenu mtashindana mbio na farasi, au kukabiliana na matatizo makubwa kuliko mnavyoweza kuwazia leo. Mtafanyaje? Mazoezi ya Gileadi yamewatayarisha ili mshindane mbio na farasi bila kuchoka.” Aliwatia moyo wanafunzi waendelee kujizoeza kiroho, wadumishe ratiba nzuri ya kujifunza Biblia, na kusali.

Ndugu Herd alisema kwamba wakati ujao baadhi ya wale watakaopewa migawo ya kuwa wamishonari watakabiliana na mambo yenye kuvunja moyo au watu wasiopendezwa na ujumbe wetu. Wengine watasumbuliwa na magonjwa au kuhisi wamepungukiwa kwa njia fulani. Lakini aliwahakikishia wanafunzi kwamba wana chanzo cha nguvu ambacho kitawasaidia kushinda hali yoyote mbaya bila kuchoka. “Iwe mtashindana na farasi au watu wanaoenda kwa miguu,” msemaji alisema, “muwe na uhakika kwamba mkono wenye nguvu wa Mungu unaweza kuwainua na kuwafikisha mwisho wa shindano la mbio. Na basi mtakuwa wamishonari wenye mafanikio na kumletea Yehova utukufu na sifa.”

Mambo Mengine Makuu ya Programu

‘Usijizuie kwa Kuchukua Michache.’ John Ekrann, mshiriki wa Halmashauri ya Tawi ya Marekani, alizungumzia simulizi kuhusu nabii Elisha na mjane ambaye wanawe walikuwa karibu kuchukuliwa na kuuzwa kama watumwa. (2 Wafalme 4:1-7) Mjane huyo alikuwa na mtungi mdogo wa mafuta. Elisha alimwagiza akusanye mitungi mingine kutoka kwa jirani zake, akisema: ‘Usijizuie kwa kuchukua michache.’ Kupitia Elisha, Yehova alijaza kimuujiza mitungi yote ambayo mjane huyo alikusanya. Kisha, mjane huyo akauza mafuta hayo na kupata pesa za kutosha kulipia madeni yake na kutegemeza familia yake kwa muda fulani.

Wanafunzi ambao wangetumwa kuwa wamishonari wangejifunza nini kutokana na simulizi hilo? Yule mjane alipokusanya mitungi ya ziada, inaelekea hakuchagua-chagua. Msemaji alisema: “Alikusanya kila mtungi ambao ungeweza kutiwa mafuta, na mitungi mikubwa ilifaa zaidi.” Kisha, Ndugu Ekrann akawahimiza wanafunzi wakubali kila mgawo, uwe mkubwa au mdogo. “Msichague-chague,” akasema. Pia, aliwakumbusha wanafunzi kwamba kiwango cha baraka ambacho yule mjane alipokea  kililingana moja kwa moja na jinsi alivyofuata maagizo ya Elisha. Wanafunzi wangejifunza nini? Kiwango cha baraka tunazopokea kinalingana moja kwa moja na kiasi cha bidii na imani tunayoonyesha. “Muwe tayari kujidhabihu,” msemaji akasema.

“Wao Ni Mkate Kwetu.” William Samuelson, mwangalizi wa Idara ya Shule za Kitheokrasi, alizungumzia kichwa hicho, kinachotegemea Hesabu 14:9. Alikazia mfano mzuri uliowekwa na Yoshua na Kalebu. Neno “mkate” kama linavyotumiwa katika simulizi hilo linaonyesha kuwa wakaaji wa Kanaani wangeshindwa kwa urahisi na kwamba ushindi huo ungewatia nguvu na kuwategemeza Waisraeli. Wanafunzi wangejifunza nini? “Katika utendaji wenu wa kiroho wakati ujao,” msemaji akasema, “oneni kila hali ngumu kuwa jambo ambalo litawatia nguvu na kuwategemeza.”

“Je, Meli Yao ya Imani Itatia Nanga Imara Kabisa Itakapokabili Dhoruba Iliyo Mbele?” Sam Roberson, mmoja wa walimu, alizungumzia onyo la mtume Paulo kuhusu wengine ambao ‘imani yao ilikuwa imevunjika.’ (1 Timotheo 1:19) Aliwahimiza wanafunzi wajenge ndani ya wengine imani ambayo imetia nanga kabisa katika Yehova Mungu. Alisema: “Kazi yenu inaweza kulinganishwa na kazi ya mhunzi.” Kwa njia gani? Mhunzi huunganisha vyuma ili kutengeneza mnyororo unaoweza kusaidia meli itie nanga na kuwa salama. Vivyo hivyo, wamishonari husaidia wanafunzi wa Biblia kusitawisha sifa za kiroho zinazohitajiwa ili wapate wokovu.

Msemaji alihusianisha vyuma vinavyounganishwa ili kutengeneza mnyororo na sifa nane zinazotajwa katika 2 Petro 1:5-8. Ndugu Roberson alisema ikiwa wamishonari watawasaidia wanafunzi wa Biblia waone jinsi Yehova anavyoonyesha sifa hizo, inaelekea wanafunzi hao watasitawisha uhusiano usioweza kuvunjika pamoja na Yehova. Watashinda kila dhoruba au shida ambayo inaweza kujaribu imani yao.

Mambo Yaliyoonwa na Mahojiano

Michael Burnett, ambaye pia ni mwalimu, aliwaomba wanafunzi wa Gileadi wasimulie na kuigiza baadhi ya mambo waliyokuwa wamejionea karibuni katika utumishi wa shambani. Wahudhuriaji walifurahia kusikia jinsi wanafunzi walivyowahubiria watu kwenye maduka, uwanja wa ndege, nyumba kwa nyumba, na hata kupitia simu walipomhubiria mtu aliyepiga simu kimakosa.

Kisha Michael Hansen ambaye ni mshiriki wa Familia ya Betheli ya Marekani akawahoji wanaume watatu ambao walitumika kwa miaka mingi wakiwa wamishonari​—Stephen McDowell nchini Panama, Mark Noumair nchini Kenya, na William Yasovsky nchini Paraguai. Maelezo yao yalikazia kichwa cha hotuba hiyo, “Kupata Shangwe Katika Kufanya Mapenzi ya Yehova.” (Zaburi 40:8) Kwa mfano, Mark Noumair alitaja mambo hususa yaliyofanya yeye na mke wake wapate shangwe walipokuwa katika mgawo wao. Urafiki walioanzisha na Mashahidi katika nchi hiyo uliwaridhisha kwelikweli. Mambo mengine yaliyowaletea shangwe yalitia ndani kuona ndugu wakifuata maagizo, wakifanya mabadiliko makubwa maishani, na kuona jinsi Yehova alivyobariki jitihada zao. Aliwahakikishia wanafunzi kwamba watapata shangwe kubwa zaidi wakati ujao.

Baada ya mwanafunzi mmoja wa darasa la 131 kusoma barua ambayo ilieleza vizuri shukrani za wanafunzi, Ndugu Lett alimalizia programu kwa kuwatia moyo wanafunzi watende kwa hekima. Ikiwa watafanya hivyo, alisema “watamfanya Yehova atabasamu.” Bila shaka, wamishonari hao watamfanya Yehova atabasamu wanapomtumikia katika migawo yao.​—Isaya 65:19.

 [Chati/Ramani katika ukurasa wa 31]

TAKWIMU ZA DARASA

Nchi zilizowakilishwa 10

Wastani wa umri 34.7

Wastani wa miaka tangu kubatizwa 19.0

Wastani wa miaka katika huduma ya wakati wote 13.5

[Ramani]

(Ona mpangilio kamili katika nakala iliyochapishwa)

Wahitimu walitumwa katika nchi zilizoonyeshwa hapa chini

NCHI AMBAZO WANAFUNZI WALITUMWA

BENIN

BRAZILI

BULGARIA

BURUNDI

KAMERUN

KANADA

JAMHURI YA AFRIKA YA KATI

UJERUMANI

GHANA

HONG KONG

INDONESIA

KENYA

LIBERIA

LITHUANIA

MALAYSIA

MSUMBIJI

NEPAL

PANAMA

PARAGUAI

SIERRA LEONE

SLOVAKIA

AFRIKA KUSINI

MAREKANI

VENEZUELA

[Picha katika ukurasa wa 30]

Wanafunzi wa Gileadi wakiigiza jambo fulani waliloona walipokuwa wakihubiri

[Picha katika ukurasa wa 31]

Darasa la 131 Lililohitimu la Shule ya Gileadi

Katika orodha iliyo chini, nambari za safu zinaanza mbele kwenda nyuma, na majina yameorodheshwa kuanzia kushoto kwenda kulia katika kila safu.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.