Je, Mipango Yako Inapatana na Kusudi la Mungu?

NDEGE mdogo wa rangi ya kijivu anayeitwa Clark’s nutcracker, anaweza kuonekana akiruka-ruka katika misitu ya magharibi mwa bara la Amerika Kaskazini. Anakusanya na kuzika udongoni mbegu 33,000 hivi kila mwaka, akizihifadhi katika maeneo tofauti-tofauti 2,500 hivi ili kujitayarisha kwa ajili ya miezi ya baridi kali. Bila shaka, ndege huyo anatumia “hekima ya kisilika” anapofanya matayarisho kwa ajili ya wakati ujao.—Methali 30:24.

Wanadamu wana uwezo unaostaajabisha hata zaidi. Kati ya viumbe wote wa Yehova duniani, wanadamu wana uwezo usio na kifani wa kujifunza kutokana na mambo yaliyopita na kufanya mipango ya wakati ujao kupatana na yale waliyojifunza. “Mna mipango mingi katika moyo wa mwanadamu,” alisema Mfalme Sulemani mwenye hekima.—Methali 19:21.

Hata hivyo, wanadamu kwa ujumla wanaweza tu kufanya mipango wakitegemea makisio kuhusu wakati ujao. Kwa mfano, unafanya mipango ya kesho ukiwazia kwamba jua litachomoza na utakuwa hai. Una msingi thabiti unapowazia kwamba jua litachomoza; lakini huna msingi imara kuamini kwamba utakuwa hai. Yakobo mwandikaji wa Biblia alisema jambo hili la kweli: “Hamjui uzima wenu utakuwa namna gani kesho.”—Yakobo 4:13, 14.

Yehova Mungu hajapungukiwa kama mwanadamu. Anajua “tangu mwanzo ule mwisho.” Kusudi lake ambalo ametaja litatimia hakika. “Shauri langu mwenyewe litasimama,” yeye anatangaza, “na kila jambo ambalo ni mapenzi yangu nitafanya.” (Isaya 46:10) Hata hivyo, ni nini kinachotukia mipango ya wanadamu inapopingana na kusudi la Mungu?

Mipango ya Wanadamu Inapopingana na Kusudi la Mungu

Miaka 4,000 hivi iliyopita, wajenzi wa Mnara wa Babeli walipanga kuzuia jamii ya wanadamu isitawanyike. “Haya!” wakasema. “Na tujijengee jiji na pia mnara na kilele chake kiwe mbinguni, na tujifanyie jina maarufu, tusije  tukatawanyika juu ya uso wote wa dunia.”—Mwanzo 11:4.

Hata hivyo, kusudi la Mungu kwa dunia lilikuwa tofauti kabisa. Alikuwa amemwamuru Noa na wanawe hivi: “Zaeni, muwe wengi, mjaze dunia.” (Mwanzo 9:1) Mungu alifanya nini kuhusu miradi ya waasi hao wa Babeli? Alivuruga lugha yao ili wasielewane. Kukawa na matokeo gani? “Basi Yehova akawatawanya juu ya uso wote wa dunia kutoka huko.” (Mwanzo 11:5-8) Wajenzi wa Babeli walilazimika kujifunza somo muhimu. Mipango ya wanadamu inapotofautiana na kusudi la Mungu, “shauri la Yehova ndilo litakalosimama.” (Methali 19:21) Je, unakubali masomo kama hayo ya wakati uliopita yaongoze maisha yako?

Tajiri Aliyekosa Busara

Huenda usipange kujenga mnara, lakini wengi leo wanapanga kuhifadhi pesa chungu nzima katika benki na kujikusanyia mali nyingi ili baada ya kustaafu waishi maisha ya starehe. Ni jambo la kawaida kwa mtu kutaka kufurahia matokeo ya kazi yake ngumu. “Kila mtu ale, naam, anywe na kuona mema kwa ajili ya kazi yake yote iliyo ngumu,” akaandika Sulemani. “Hiyo ndiyo zawadi ya Mungu.”—Mhubiri 3:13.

Yehova atatutoza hesabu kuhusu jinsi tunavyofurahia matokeo mazuri ya kazi yetu ngumu. Akitumia mfano fulani, Yesu alikazia jambo hilo kwa wanafunzi wake miaka 2,000 hivi iliyopita. Alisema hivi: “Shamba la mtu fulani tajiri lilizaa vizuri. Kwa sababu hiyo akaanza kuwaza ndani yake mwenyewe, akisema, ‘Nitafanya nini, sasa kwa kuwa sina mahali popote pa kukusanya mazao yangu?’ Kwa hiyo akasema, ‘Nitafanya hivi: Nitabomoa maghala yangu na kujenga yaliyo makubwa zaidi, na humo nitakusanya nafaka yangu yote na vitu vyangu vyema vyote; nami nitaiambia nafsi yangu: “Nafsi yangu, una vitu vyema vingi vilivyokusanywa kwa miaka mingi; starehe, ule, unywe, na kujifurahisha.”’” (Luka 12:16-19) Je, miradi ya tajiri huyo haionekani kuwa yenye hekima? Kama ndege aliyetajwa mapema, inaonekana kwamba tajiri katika mfano huo alikuwa akifanya mipango kwa ajili ya mahitaji yake ya wakati ujao.

Hata hivyo, kufikiri kwake kulikuwa na kasoro. Yesu anaendelea kusema: “Lakini Mungu akamwambia, ‘Wewe usiye na akili, usiku huu wanadai nafsi yako kutoka kwako. Basi, vitu ulivyoviweka akiba vitakuwa vya nani?’” (Luka 12:20) Je, Yesu alikuwa akipinga maneno ya Sulemani kwamba kazi na matokeo yake mazuri ni zawadi kutoka kwa Mungu? Hapana. Yesu  alimaanisha nini? “Hivyo ndivyo huwa,” Yesu alisema, “kwa mtu anayejikusanyia mwenyewe hazina lakini si tajiri kwa Mungu.”—Luka 12:21.

Yesu alikuwa akiwafundisha wasikilizaji wake kwamba Yehova anataka tumfikirie Yeye tunapofanya mipango yetu. Tajiri huyo angekuwa tajiri kwa Mungu kwa kutafuta njia za kuimarisha ujitoaji wa kimungu, hekima na upendo. Maneno ya mtu huyo yanafunua wazi kwamba hakupendezwa na mambo kama hayo, hakuacha masazo kwa ajili ya maskini, wala hakumtolea Yehova zawadi. Miradi ya kiroho na matendo yasiyo ya ubinafsi hayakuwa sehemu ya maisha ya tajiri huyo. Mipango yake ilikuwa ya kujitimizia tamaa na kuwa na maisha ya starehe tu.

Je, umeona kwamba watu wengi leo wanatanguliza maishani mambo kama yale aliyotanguliza tajiri aliyefafanuliwa na Yesu? Tuwe matajiri au maskini, ni rahisi kufikiria sana mali, na kuruhusu mahitaji na tamaa za maisha ya kila siku yafanye tupuuze mahitaji ya kiroho. Unaweza kuepuka mtego huo jinsi gani?

Kupanga Maisha ya “Kawaida”

Tofauti na yule tajiri katika mfano wa Yesu, huenda una matatizo ya kiuchumi. Lakini ikiwa umeoa, bila shaka unapanga kutimiza mahitaji ya lazima ya familia yako, na ikiwezekana, kuwasaidia watoto wako wapate elimu nzuri ya msingi. Ikiwa wewe ni mseja, huenda mipango yako ikatia ndani kupata kazi na kuidumisha ili usiwe mzigo kwa wengine. Hiyo ni miradi inayofaa.—2 Wathesalonike 3:10-12; 1 Timotheo 5:8.

Hata hivyo, huenda kufanya kazi, kula, kunywa—kuishi maisha ambayo yanaonwa kuwa maisha ya kawaida—kukafanya maisha ya mtu yapingane na mapenzi ya Mungu. Jinsi gani? Yesu alisema: “Kwa maana kama vile siku za Noa zilivyokuwa, ndivyo kuwapo kwa Mwana wa binadamu kutakavyokuwa. Kwa maana kama vile walivyokuwa katika siku hizo kabla ya gharika, wakila na kunywa, wanaume wakioa na wanawake wakiolewa, mpaka siku ambayo Noa aliingia ndani ya safina; nao hawakujali mpaka gharika ikaja na kuwafagilia mbali wote, ndivyo kuwapo kwa Mwana wa binadamu kutakavyokuwa.”—Mathayo 24:37-39.

Kabla ya gharika, watu kwa ujumla waliishi yale ambayo huenda waliyaona kuwa maisha ya kawaida. Lakini tatizo lilikuwa kwamba “hawakujali” kusudi la Mungu la kuangamiza ulimwengu huo mbovu kupitia gharika ya duniani pote. Hapana shaka kwamba waliyaona maisha ya Noa kuwa si ya kawaida. Lakini Gharika ilipokuja, ni mtindo wa maisha wa Noa na familia yake uliothibitika kuwa wenye hekima.

Leo, uthibitisho wote unaonyesha kwamba tunaishi katika siku za mwisho. (Mathayo 24:3-12; 2 Timotheo 3:1-5) Hivi karibuni, Ufalme wa Mungu ‘utavunja na kukomesha’ mfumo huu wa mambo. (Danieli 2:44) Chini ya Ufalme huo, dunia itageuzwa kuwa paradiso. Ufalme huo utaondoa magonjwa na kifo. (Isaya 33:24; Ufunuo 21:3-5) Viumbe wote duniani wataishi kwa upatano huku wakiwa na chakula cha kutosha.—Zaburi 72:16; Isaya 11:6-9.

Hata hivyo, kabla ya kuchukua hatua, Yehova amekusudia habari njema ya Ufalme wake ‘ihubiriwe katika dunia yote inayokaliwa ili kuwa ushahidi kwa mataifa yote.’ (Mathayo 24:14) Kupatana na kusudi la Mungu, Mashahidi milioni saba hivi wa Yehova wanahubiri habari njema katika nchi 236 wakitumia lugha zaidi ya 400.

Machoni pa ulimwengu, huenda mtindo wa maisha wa Mashahidi wa Yehova ukashangaza au hata ukawafanya wadhihakiwe. (2 Petro 3:3, 4) Kama watu walioishi kabla ya Gharika, wengi leo wanajihusisha sana na shughuli za maisha za kila siku. Kwa maoni yao, huenda yeyote asiyeishi maisha yanayoonwa na wengi kuwa ya kawaida hana usawaziko. Lakini kulingana na wale wanaoamini ahadi za Mungu, maisha yanayotanguliza kumtumikia kwa kweli ni ya usawaziko.

Hivyo, uwe tajiri, maskini, au unaishi maisha ya wastani, ni jambo la hekima kuchunguza mara kwa mara mipango yako ya wakati ujao. Unapofanya hivyo, jiulize, ‘Je, mipango yangu inapatana na kusudi la Mungu?’

[Picha katika ukurasa wa 11]

Mipango ya wanadamu inapopingana na kusudi la Mungu, shauri la Yehova ndilo litakalosimama

[Picha katika ukurasa wa 12]

Alipokuwa akifanya mipango, tajiri katika mfano wa Yesu hakufikiria kusudi la Mungu