Naam, Hili Ni Toleo la Funzo!

CHEZA

Naam, Hili Ni Toleo la Funzo!

Tumebadili mpangilio wa toleo la funzo ili livutie zaidi na kukusaidia unapojifunza Neno la Yehova la kweli lenye thamani.—Zab. 1:2; 119:97.

Miaka minne iliyopita tulianza kuchapisha matoleo mawili ya Mnara wa Mlinzi, toleo moja kwa ajili ya watu wote na toleo lingine kwa ajili yetu sote, yaani, Mashahidi wa Yehova na wanafunzi wetu wa Biblia wanaofanya maendeleo.

Kuhusu toleo la funzo, ndugu mmoja ambaye amemtumikia Yehova kwa miaka mingi aliandika hivi: “Niliona kwamba toleo la kwanza la funzo la Mnara wa Mlinzi lilikuwa zuri ajabu na lilinigusa moyo sana. Lugha na maneno yaliyotumiwa kufafanua mambo ya kiroho yenye kina zaidi yalipenya moja kwa moja katika moyo wangu. Asanteni sana kwa uandalizi huu mpya ambao ni mzuri ajabu.” Ndugu mwingine aliandika hivi: “Ninatazamia kutumia saa nyingi faraghani kujifunza toleo la funzo nikitumia Biblia yangu yenye marejeo (Reference Bible).” Tuna hakika kwamba unahisi vivyo hivyo.

Kama ujuavyo, gazeti la Mnara wa Mlinzi limekuwa likichapishwa tangu mwaka wa 1879, na hilo limewezekana tu kwa sababu ya baraka na roho ya Yehova. (Zek. 4:6) Katika muda huo wa miaka 133, mabadiliko kadhaa yamefanywa kwenye jalada la gazeti hilo. Katika mwaka wa 2012, kila toleo la funzo litakuwa na mchoro wa rangi unaoonyesha ndugu na dada wakitoa ushahidi, na hivyo kutukumbusha kazi tuliyopewa na Mungu ya kutoa ushahidi kamili kuhusu Ufalme wa Yehova. (Mdo. 28:23) Kwenye ukurasa wa 2 wa jalada, utaona picha halisi ya mchoro ulio kwenye jalada, pamoja na maelezo machache kuhusu utendaji ulio kwenye jalada na mahali ambapo picha hiyo ilipigwa. Mwaka huu, picha hizo zitatukumbusha sote kwamba watu wa Yehova wanahubiri habari njema “katika dunia yote inayokaliwa.”—Mt. 24:14.

Ni mabadiliko gani mengine ambayo yamefanywa katika gazeti hili? Sanduku la pitio sasa limewekwa mwanzoni mwa kila makala ya funzo. Sanduku hilo litakazia mambo makuu ambayo unapaswa kutafuta unaposoma na kujifunza makala hiyo. Bila shaka, wale wanaoongoza Funzo la Mnara wa Mlinzi wanapaswa kuendelea kutumia maswali hayo ili kupitia tena habari hizo mwishoni mwa funzo. Utaona kwamba nafasi za pambizoni zimepanuliwa kidogo na nambari za kurasa na mafungu zinaonekana wazi zaidi.

Kama inavyoelezwa katika toleo la mwezi huu, makala mpya yenye kichwa, “Kutoka Katika Hifadhi ya Vitu Vyetu vya Kale,” imeongezwa ili kuonyesha maendeleo makubwa katika historia ya Mashahidi wa Yehova nyakati za leo. Pia, masimulizi ya maisha ya watu mbalimbali yatachapishwa mara kwa mara chini ya kichwa “Walijitoa kwa Hiari.” Masimulizi hayo yataeleza waziwazi shangwe, uradhi, na furaha ambayo akina ndugu na dada wamepata kwa kutumikia katika maeneo yenye uhitaji mkubwa zaidi wa watangazaji wa Ufalme.

Na ufurahie sana wakati unaotumia kujifunza Neno la Mungu kwa msaada wa gazeti hili.

Wachapishaji