HABARI KUU | JE, KWELI BIBLIA NI KITABU CHA MUNGU?
Biblia—Je, Kweli ‘Imeongozwa na Roho ya Mungu’?
JE, UNAAMINI kwamba Biblia ni kitabu cha Mungu? Au je, unafikiri kwamba ni kitabu tu kilichojaa mawazo ya wanadamu?
Huo ni mjadala unaoendelea hata kwa wale wanaodai kuwa Wakristo. Kwa mfano, utafiti uliofanywa nchini Marekani na kampuni inayoitwa Gallup mwaka wa 2014, ulionyesha kwamba watu wengi ambao ni Wakristo wa kawaida wanaamini kwamba “kwa njia fulani Biblia ina uhusiano na Mungu.” Kwa upande mwingine, utafiti huo ulionyesha kuwa, mtu mmoja kati ya watano waliohojiwa anaamini kwamba Biblia ni kitabu chenye “hekaya za kale, mafumbo, historia, na mafundisho ya wanadamu.” Maoni hayo yenye kupingana yanafanya tufikirie kwa makini kile kinachomaanishwa hasa na usemi, Biblia ‘imeongozwa na roho ya Mungu.’—2 Timotheo 3:16.
‘IMEONGOZWA NA ROHO YA MUNGU’—JINSI GANI?
Biblia ina vitabu vidogo 66, ambavyo viliandikwa na watu wapatao 40 kwa kipindi cha miaka 1,600 hivi. Lakini ikiwa Biblia iliandikwa na wanadamu, ni kwa njia gani ‘imeongozwa na roho ya Mungu’? Kwa ufupi usemi, Biblia ‘imeongozwa na roho ya Mungu’ unamaanisha kuwa Mungu ndiye Chanzo cha habari zote zilizoandikwa. Biblia inaeleza hivi: “Wanadamu walisema yaliyotoka kwa Mungu kama walivyoongozwa na roho takatifu.” (2 Petro 1:21) Kwa maneno mengine, Mungu alitumia nguvu yake ya utendaji isiyoonekana, yaani, roho takatifu, ili kupitisha ujumbe wake kwa waandikaji wa vitabu vya Biblia. Hilo linaweza kulinganishwa na mfanyabiashara anayemwambia karani wake mambo ya kuandika kwenye barua. Ingawa barua hiyo imeandikwa na karani, mawazo yaliyoandikwa si yake bali ya yule mfanyabiashara.
Baadhi ya waandikaji wa Biblia walisikia ujumbe wa Mungu kupitia malaika. Wengine waliona maono kutoka kwa Mungu. Katika visa fulani, Mungu aliwasilisha ujumbe wake kupitia ndoto. Ingawa nyakati fulani Mungu aliruhusu waandikaji watumie maneno yao wenyewe kuandika ujumbe wake, nyakati nyingine aliwaambia maneno hususa ya kuandika. Katika kila kisa, waandikaji waliwasilisha mawazo ya Mungu wala si mawazo yao.
Tunawezaje kuwa na uhakika kwamba Mungu ndiye aliyewaongoza waandikaji wa Biblia? Fikiria mambo matatu yanayoimarisha uhakika wa kwamba Biblia imeongozwa na roho ya Mungu.
Huenda Ukapenda Pia
MNARA WA MLINZI
Kwa Kweli Biblia Ni Neno la Mungu Lililoongozwa na Roho Yake
MAJIBU YA MASWALI YA BIBLIA
Je, Kweli Tunaweza Kujua Ni Nani Aliyeandika Biblia?
Waandikaji wa Biblia wanadai kwamba waliongozwa na Mungu walipokuwa wakiandika. Tunawezaje kuamini mambo yaliyoandikwa?
MAJIBU YA MASWALI YA BIBLIA
Je, Biblia Ni Kitabu Chenye Hekima ya Wanadamu?
Ona kile ambacho Biblia yenyewe inasema.
