Ka mantsoe a bonolo feela, buka ea pele ea Bibele, Genese, e hlalosa hore na ho tlile joang hore ho be le bokahohle: “Tšimolohong Molimo o ile a bōpa maholimo le lefatše.” (Genese 1:1) Ka mor’a hore Molimo a bōpe limela le liphoofolo, o ile a bōpa batho ba pele, e leng Adama le Eva. Ba ne ba fapane le liphoofolo hobane batho ba khona ho bonahatsa litšobotsi tsa Molimo tse akarelletsang bolokolohi ba ho ikhethela, le hoja ba sa li bonahatse ka botlalo. Kahoo, ba ne ba ikarabella ka liketso tsa bona. Haeba ba ne ba ile ba mamela litaelo tsa Molimo, ba ne ba tla ba le seabo morerong oa Molimo e le batsoali ba pele ba batho ba neng ba tla thabela khotso le bophelo bo phethahetseng lefatšeng ka ho sa feleng.

Leha ho le joalo, lengeloi le itseng, kapa sebōpuoa sa moea, le ile la nka monyetla ’me la sebelisa batho hore ba phethahatse morero oa lona oa boithati. Kahoo, le ile la fetoha Satane, e bolelang “Mohanyetsi.” Satane o ile a sebelisa noha ’me a thetsa Eva, a mo bolella hore a ka phela ntle le tataiso ea Molimo. Adama le Eva ba ile ba latela Satane ’me ba ikarola ho Moetsi oa bona. Ka lebaka la qeto ea bona e booatla, batsoali ba rōna ba pele ba ile ba lahleheloa ke bophelo bo sa feleng ’me ba fetisetsa sebe, ho se phethahale le lefu ho rōna.

Hang-hang Molimo o ile a bolela hore o ikemiselitse ho lokisa boemo boo bo sithabetsang ’me a fa litloholo tsa Adama monyetla oa hore li fumane bophelo bo sa feleng. Molimo o ile a bolela esale pele hore “peō”—e leng motho ea khethehileng—o tla felisa Satane ’me a lokise mahlomola ’ohle ao Satane, Adama le Eva ba a bakileng. (Genese 3:15) “Peō” eo e ne e tla ba mang? Ho ne ho tla bonahala ha nako e ntse e e-ea.

Ho sa le joalo, Satane o ne a ntse a leka ho nyopisa morero oa Molimo o motle. Sebe le bokhopo li ile tsa ata kapele. Molimo o ile a rera ho felisa batho ba khopo ka moroallo. O ile a laela Noe ea lokileng hore a hahe areka—e leng lebokose le leholo le neng le tla phaphamala holim’a metsi—e le hore a ipholose, eena le ba lelapa la hae hammoho le liphoofolo tseo a neng a laetsoe hore a li kenye ka arekeng.

Selemo ka mor’a hore Moroallo o emise, Noe le ba lelapa la hae ba ile ba tsoa ka arekeng ’me ba phela lefatšeng le se nang bokhopo. Empa “peō” e ne e le hona e tla hlaha.

—Sena se thehiloe ho Genese khaolo ea 1-11; Juda 6, 14, 15; Tšenolo 12:9.