Molimo ha a na mosali oa sebele ea ka mo tsoallang bana. Ke ’Mōpi oa lintho tsohle tse phelang. Batho ba ile ba bōptjoa ba e-na le bokhoni ba ho etsisa litšobotsi tsa Molimo. Ke ka lebaka leo motho oa pele eo Molimo a ileng a mo bōpa, e leng Adama, a ileng a bitsoa “mora oa Molimo.” Ka ho tšoanang, Jesu o bitsoa “Mora oa Molimo” hobane o ne a bōpiloe a e-na le litšobotsi tse tšoanang le tsa Ntate oa hae.—Bala Luka 3:38; Johanne 1:14, 49.

Molimo o ile a bōpa Jesu pele a bōpa Adama. Ha e le hantle, Molimo o ile a bōpa Jesu eaba o mo sebelisa hore a etse lintho tse ling tsohle, ho akarelletsa le mangeloi. Ke kahoo Bibele e reng Jesu ke “letsibolo la pōpo eohle.”—Bala Bakolose 1:15, 16.

Pele a tsoalloa Bethlehema, Jesu o ne a phela leholimong e le lengeloi. Ha nako e fihla, Molimo o ile a tlosa bophelo ba Jesu leholimong a bo fetisetsa pōpelong ea Maria e le hore a ka tsoaloa e le motho.—Bala Luka 1:30-32; Johanne 6:38; 8:23.

Ke hobane’ng ha Molimo a ile a etsa hore Jesu a tsoaloe lefatšeng e le motho? Jesu o ile a phetha karolo efe e khethehileng? U ka fumana likarabo tsa lipotso tseo ka Bibeleng ’me li tla etsa hore u utloisise haholoanyane seo Molimo le Jesu ba u etselitseng sona.