“Eng kapa eng eo le e etsang, le e sebetse ka moea oohle joalokaha eka le sebeletsa Jehova.”—BAKOL. 3:23.

1-3. (a) Kaha Jesu o nehelane ka bophelo ba hae e le sehlabelo, na seo se bolela hore Jehova ha a sa hloka hore re mo etsetse mofuta leha e le ofe oa mahlabelo? Hlalosa. (b) Ke potso efe eo re ka ipotsang eona mabapi le mahlabelo ao re a etsang?

LEKHOLONG la pele la lilemo C.E., Jehova o ile a senolela batho ba hae hore sehlabelo sa thekollo sa Jesu se ne se felisitse Molao oa Moshe. (Bakol. 2:13, 14) Linyehelo tsohle tsa mahlabelo tseo Bajuda ba ’nileng ba li etsa ka makholo a lilemo li ne li se li sa hlokahale hape li se li se na molemo. Molao o ne o phethile karolo ea oona ea ho ba “motataisi oa rōna ea isang ho Kreste.”—Bagal. 3:24.

² Seo ha se bolele hore Bakreste ha ba sa thahasella ho etsa mahlabelo. Ho fapana le seo, moapostola Petrose o ile a bua ka hore ho hlokahala hore re ‘nyehele mahlabelo a moea a amohelehang ho Molimo ka Jesu Kreste.’ (1 Pet. 2:5) Ho feta moo, moapostola Pauluse o ile a hlakisa hore karolo e ’ngoe le e ’ngoe ea bophelo ba Mokreste e ka nkoa e le “sehlabelo” se nyehetsoeng ho Molimo.—Bar. 12:1.

³ Kahoo, Mokreste o etsetsa Jehova sehlabelo ka ho nyehela lintho tse itseng ho Eena kapa ka ho tela lintho tse ling molemong oa Hae. Ho latela seo re se tsebang ka mahlabelo ao Baiseraele ba neng ba a nyehela, re ka tiisa joang hore Jehova o amohela mahlabelo ’ohle a rōna?

BOPHELONG BA LETSATSI LE LETSATSI

4. Re lokela ho hopola eng mabapi le lintho tseo re li etsang bophelong ba rōna ba letsatsi le letsatsi?

⁴ Ha re ntse re tsoela pele ka bophelo ba rōna ba letsatsi le letsatsi, re ka ’na ra thatafalloa ke ho bona hore na lintho tseo re li etsang li amana joang le mahlabelo ao re a etsetsang Jehova. Mosebetsi oa lapeng, mosebetsi oa sekolo, mosebetsi oa boipheliso, ho reka lintho hammoho le mesebetsi e meng e kang eo, ho ka bonahala ho se moo e  amanang teng le lintho tsa moea. Leha ho le joalo, haeba u se u inehetse ho Jehova kapa u ikemiselitse ho inehela ho eena haufinyane, boikutlo boo u etsang mesebetsi e tloaelehileng ka bona, ke ba bohlokoa. Re Bakreste bosiu le motšehare. Re lokela ho sebelisa melao-motheo ea Mangolo likarolong tsohle tsa bophelo ba rōna. Ke ka lebaka leo Pauluse a ileng a re khothatsa a re: “Eng kapa eng eo le e etsang, le e sebetse ka moea oohle joalokaha eka le sebeletsa Jehova, eseng batho.”—Bala Bakolose 3:18-24.

5, 6. Ke’ng eo re lokelang ho nahanisisa ka eona mabapi le hore na re itšoare joang kapa re apare joang bophelong ba rōna ba letsatsi le letsatsi?

⁵ Lintho tseo Mokreste a li etsang bophelong ba letsatsi le letsatsi hase karolo ea tšebeletso ea hae e halalelang. Leha ho le joalo, taba ea hore ebe Pauluse o re khothalletsa ho sebetsa “ka moea oohle joalokaha eka [re] sebeletsa Jehova” e lokela ho etsa hore re nahanisise ka tsela eo re phelang ka eona. Joale re ka sebelisa see joang bophelong ba rōna? Na re itšoara le ho apara ka tsela e hlomphehang ka linako tsohle? Kapa na ha re ntse re etsa mesebetsi ea rōna ea letsatsi le letsatsi re ka tšaba ho itsebahatsa re le Lipaki tsa Jehova, ebang ke ka lebaka la boitšoaro ba rōna kapa ka lebaka la tsela eo re apereng ka eona? E se eka le ka mohla re ke ke ra etsa joalo! Batho ba Jehova ha ba batle ho etsa letho le ka etsang hore lebitso la Molimo le rohakoe.—Esa. 43:10; 2 Bakor. 6:3, 4, 9.

⁶ A re ke re hlahlobeng hore na takatso ea ho sebetsa ‘ka moea oohle joalokaha eka re sebeletsa Jehova’ e ama likarolo tse fapa-fapaneng tsa bophelo ba rōna joang. Ha re ntse re etsa joalo, re ’ne re hopole hore mahlabelo ’ohle ao Baiseraele ba neng ba a etsetsa Jehova e ne e tlameha ho ba a matlehali.—Ex. 23:19.

KAMOO BOPHELO BA HAO BO AMEHANG KATENG

7. Ho inehela ha rōna ho Jehova ho akarelletsa’ng?

⁷ Ha u ne u inehela ho Jehova, u ile oa etsa qeto eo u sa qeaqee, na ha ho joalo? Ha e le hantle u ile ua re, likarolong tsohle tsa bophelo ba hao Jehova o ne a tla tla pele. (Bala Baheberu 10:7.) Eo e bile qeto e ntle. Ha ho pelaelo hore u hlokometse hore haeba u batla ho tseba hore na thato ea Jehova ke efe mabapi le taba e itseng ’me u loanela ho etsa lintho tse lumellanang le eona, liphello e ba tse babatsehang. (Esa. 48:17, 18) Bahlanka ba Molimo baa halalela ’me ba thabile hobane ba etsisa litšobotsi tsa Ea ba rupelang.—Lev. 11:44; 1 Tim. 1:11.

8. Ke hobane’ng ha e le habohlokoa hore re hopole hore Jehova o ne a nka mahlabelo ao Baiseraele ba neng ba mo etsetsa ’ona a halalela?

⁸ Jehova o ne a nka mahlabelo ao Baiseraele ba neng ba mo etsetsa ’ona a halalela. (Lev. 6:25; 7:1) Lentsoe la Seheberu le fetoletsoeng e le “halalela” le bolela ntho e arohileng, e khethehileng, e halalelang ho Molimo. E le hore Jehova a amohele mahlabelo a rōna, e tlameha hore  e be a arohileng le a sa silafatsoang ke tšusumetso ea lefatše. Ha rea lokela ho rata lintho tseo Jehova a li hloileng. (Bala 1 Johanne 2:15-17.) Sena se bolela hore re tlameha ho qoba setsoalle kapa likamano leha e le life tse ka etsang hore Molimo a re nke re silafatse. (Esa. 2:4; Tšen. 18:4) Sena se boetse se bolela hore re ke ke ra lumella mahlo a rōna hore a lule a shebile lintho tse sa hloekang kapa tsa boitšoaro bo litšila kapa ra lumella likelello tsa rōna hore li lule li nahana ka lintho tse joalo.—Bakol. 3:5, 6.

9. Tsela eo Mokreste a tšoarang batho ba bang ka eona ke ea bohlokoa hakae, hona hobane’ng?

⁹ Pauluse o ile a khothatsa balumeli-’moho le eena a re: “Le se ke la lebala ho etsa se molemo le ho arolelana lintho le ba bang, kaha Molimo o khahlisoa ke mahlabelo a joalo.” (Baheb. 13:16) Kahoo, haeba re etsetsa batho lintho tse molemo kamehla re bile re ba thusa, Jehova a ka nka liketso tseo tsa rōna e le sehlabelo seo a se amohelang. Bakreste ba ’nete ba khetholloa ka hore ba rata batho ba bang.—Joh. 13:34, 35; Bakol. 1:10.

MAHLABELO A ETSOANG BORAPELING

10, 11. Jehova o talima tšebeletso ea rōna ea Bokreste le borapeli ba rōna joang, hona see se lokela ho re ama joang?

¹⁰ Tsela e totobetseng ka ho fetisisa eo rōna Bakreste re etsetsang batho ba bang lintho tse molemo ka eona ke ka “boipolelo ba phatlalatsa ba tšepo ea rōna.” Na u sebelisa monyetla o mong le o mong o hlahang hore u pake? Pauluse o ile a re mosebetsi ona oa bohlokoa oa Bokreste ke “sehlabelo sa thoriso, ke hore, litholoana tsa melomo e bolelang lebitso la [Molimo] phatlalatsa.” (Baheb. 10:23; 13:15; Hos. 14:2) E ka ba hantle ho nahana ka hore na re qeta nako e kae re bolela litaba tse molemo tsa ’Muso le hore na re ka ntlafatsa tsela eo re bolelang ka eona joang, ’me lipuo tse ngata Sebokeng sa Tšebeletso li re thusa ho etsa seo. Ho feta moo, kaha tšebeletso ea rōna ea tšimo le ho fana ka bopaki bo sa reroang ke “sehlabelo sa thoriso,” e leng karolo ea borapeli ba rōna, sehlabelo seo e tlameha ho ba se setlehali. Le hoja maemo a sa tšoane, hangata nako eo re e qetang re phatlalatsa litaba tse molemo e bontša kamoo re ananelang lintho tsa moea kateng.

¹¹ Hangata Bakreste ba rapela Jehova ebang ba lapeng kapa phuthehong. Jehova o lebeletse hore re etse seo. Ke ’nete hore ha re sa tlameha ho boloka phomolo ea Sabatha kapa ha re sa nka maeto a kamehla a ho ea meketeng Jerusalema. Leha ho le joalo, bophelong ba Bokreste ho na le lintho tse tšoanang le litšebeletso tseo  tsa mehleng ea boholo-holo. Molimo o ntse a lebeletse hore re tlohele mesebetsi e shoeleng ’me re ithute Lentsoe la hae, re rapele le hore re be teng libokeng tsa Bokreste. Ho feta moo, lihlooho tsa malapa a Bakreste li etella pele ho tsamaisa borapeli ba lelapa malapeng a tsona. (1 Bathes. 5:17; Baheb. 10:24, 25) Mabapi le mesebetsi ea rōna e amanang le borapeli re tla be re etsa hantle ha re ipotsa, ‘Na nka ntlafatsa borapeli ba ka?’

12. (a) Re ka bapisa ho nyeheloa ha libano borapeling ba boholo-holo le eng kajeno? (b) Re ka nyehela lithapelo tsa rōna joaloka libano joang?

¹² Morena Davida o ile a binela Jehova a re: “E se eka thapelo ea ka e ka lokisoa joaloka libano ka pel’a hao.” (Pes. 141:2) Nahana ka lithapelo tsa hao ka nakoana—u rapela hangata hakae, hona u rapella eng? Buka ea Tšenolo e tšoantša “lithapelo tsa bahalaleli” le libano kaha lithapelo tse amohelehang ho Jehova li nyolohela ho eena joaloka monko o lephoka le monate. (Tšen. 5:8) Iseraeleng ea boholo-holo, libano tse neng li nyeheloa kamehla aletareng ea Jehova li ne li lokela ho lokisoa ka hloko le ka nepo. Li ne li amoheleha ho Jehova hafeela li ne li nyeheloa ho latela tataiso eo a neng a fane ka eona. (Ex. 30:34-37; Lev. 10:1, 2) Ka ho tšoanang, haeba lithapelo tsa rōna tse tlohang botebong ba pelo li etsoa ka tsela eo Jehova a re laetseng hore re rapele ka eona, re ka kholiseha hore o tla li amohela.

HO FANA LE HO AMOHELA

13, 14. (a) Epafroditase le phutheho ea Filipi ba ile ba etsetsa Pauluse eng ’me o ile a ikutloa joang ka seo? (b) Re ka etsisa mohlala oa Epafroditase le Bafilipi joang?

¹³ Menehelo ea chelete e etsetsoang ho tšehetsa mosebetsi oa lefatše lohle, e ka bapisoa le sehlabelo ho sa tsotellehe hore na re nehela hanyenyane kapa haholo. (Mar. 12:41-44) Lekholong la pele la lilemo C.E., phutheho ea Filipi e ile ea romela Epafroditase Roma e le hore a ka thusa Pauluse ka lintho tseo a neng a li hloka. Ho hlakile hore moemeli eo oa Bafilipi o ne a tlile le mpho ea chelete e tsoang phuthehong. Lena e ne e se lekhetlo la pele Bafilipi ba fa Pauluse lintho ka seatla se bulehileng. Ba ile ba bontša Pauluse mosa ka morero oa hore a se ke a tšoenyeha ka litaba tsa lichelete e le hore a qete nako e ngata tšebeletsong. Pauluse o ile a talima mpho eo joang? O ile a re ke “monko o lephoka le monate, sehlabelo se amohelehang, se khahlisang haholo ho Molimo.” (Bala Bafilipi 4:15-19.) Ka sebele Pauluse o ile a ananela mosa oo Bafilipi ba ileng ba mo bontša oona, ’me Jehova le eena o ile a o ananela.

¹⁴ Ka ho tšoanang, le kajeno Jehova o ananela menehelo eo re e etsang bakeng sa mosebetsi oa lefatše lohle haholo. Ho feta moo, o re tšepisa hore ha re tsoela pele ho etelletsa lintho tse amanang le ’Muso pele bophelong ba rōna, o tla re hlokomela ka lintho tseo re li hlokang nameng le moeeng.—Mat. 6:33; Luka 6:38.

BONTŠA KANANELO

15. Tse ling tsa lintho tseo u lebohang Jehova ka tsona ke life?

¹⁵ Re na le mabaka a mangata a ho leboha Jehova ka lintho tseo a re etsetsang tsona. Na ha rea lokela ho mo leboha letsatsi le leng le le leng ka lebaka la mpho ea bophelo eo a re fileng eona? O re fa sohle seo re se hlokang e le hore re lule re phela—lijo, liaparo, bolulo hammoho le moea oo re o hemang. Ho feta moo, tumelo ea rōna e thehiloeng tsebong e nepahetseng e re fa tšepo. Ho loketse hore re rapele Jehova le ho nyehela mahlabelo a thoriso ho eena ka lebaka la seo a leng sona le ka lebaka la seo a re etselitseng sona.—Bala Tšenolo 4:11.

16. Sehlabelo sa thekollo sa Kreste se lokela ho re ama joang?

¹⁶ Joalokaha re bone sehloohong se fetileng, mpho ea bohlokoa ka ho fetisisa eo Molimo a e fileng batho ke sehlabelo sa thekollo sa Kreste. Ena ke pontšo e babatsehang ea lerato leo Molimo a re ratang ka lona. (1 Joh. 4:10) Re bontša joang hore rea e ananela? Pauluse o ile a re:  “Lerato leo Kreste a nang le lona lea re qobella, hobane sena ke seo re se ahlotseng, hore motho a le mong o ile a shoela bohle; . . . o ile a shoela bohle e le hore ba phelang ba se ke ba hlola ba iphelela, empa ba phelele ea ileng a ba shoela ’me a tsosoa.” (2 Bakor. 5:14, 15) Ha e le hantle, Pauluse o ne a re haeba re ananela mosa o sa tšoanelang oa Molimo, re tla sebelisa bophelo ba rōna ho tlotlisa Molimo le Mora oa Hae. Re bontša hore re rata Molimo le Kreste ebile rea ba ananela ka hore re ba mamele, re bontše hore re rata ho bolela litaba tse molemo le ho etsa barutuoa.—1 Tim. 2:3, 4; 1 Joh. 5:3.

17, 18. Batho ba bang ba ile ba eketsa sehlabelo sa bona sa thoriso ho Jehova joang? Fana ka mohlala.

¹⁷ Na ho ka khoneha hore u ntlafatse sehlabelo sa thoriso seo u se nyehelang ho Molimo? Ka mor’a hore ba nahanisise ka lintho tsohle tse molemo tseo Jehova a ba etselitseng tsona, batho ba bangata ba ile ba susumelletseha hore ba etse liphetoho e le hore ba ka eketsa nako eo ba e qetang ba etsa mosebetsi oa ho bolela ka ’Muso le mesebetsi e meng ea puso ea Molimo. Ba bang ba ile ba khona ho ba bo-pula-maliboho ba thusang khoeli e le ’ngoe kapa tse ’maloa selemong, ha ba bang bona ba ile ba khona hore e be bo-pula-maliboho ba kamehla. Ba bang bona ba ile ba thusa kahong ea mehaho e sebelisetsoang tšebeletso ea Jehova. Na tsee hase litsela tse babatsehang tseo motho a ka bontšang kananelo ka tsona? Haeba liketso tsena tsa tšebeletso e halalelang li etsoa ka sepheo se nepahetseng, e leng sa ho bontša kananelo le teboho, Molimo o tla li amohela.

¹⁸ Bakreste ba bangata ba ’nile ba susumelletseha ho bontša hore ba leboha Jehova. Morena ke e mong oa bona. O hōliselitsoe Bok’hatholikeng empa o ne a ipotsa lipotso tse ngata ka Molimo le hore na morero oa bophelo ke ofe. O ile a batla likarabo tsa lipotso tsena Bok’hatholikeng hammoho le filosofing ea Asia. Empa malumeling ao ka bobeli, ha aa ka a fumana likarabo tse khotsofatsang. Empa lipotso tsa hae li ile tsa arabeloa ka ho hlaka ka mor’a hore a qale ho ithuta Bibele le Lipaki tsa Jehova. Morena o ne a leboha Jehova haholo ka seo a ithutileng sona Bibeleng kaha seo se ile sa etsa hore a thabe e le kannete, kahoo o ile a batla ho leboha Jehova ka hore a sebelise matla ’ohle a hae a mo sebeletsa. Hang ka mor’a hore a kolobetsoe e ile ea e-ba pula-maliboho ea thusang ea sa khaotseng ’me kapele ka mor’a moo ha maemo a mo lumella, o ile a qala ho ba pula-maliboho oa kamehla. Sena se etsahetse lilemo tse 30 tse fetileng ’me le kajeno Morena o ntse a le tšebeletsong ea nako e tletseng.

19. U ka ntlafatsa mahlabelo ao u a etsetsang Jehova joang?

¹⁹ Ke ’nete hore ho na le bahlanka ba bangata ba Jehova ba tšepahalang bao maemo a bona a sa ba lumelleng hore e be bo-pula-maliboho. Ho sa tsotellehe hore na re etsa mosebetsi ofe tšebeletsong ea Jehova, kaofela ha rōna re ka nyehela mahlabelo a moea a amohelehang ho eena. Ka boitšoaro ba rōna re lokela ho bontša hore re mamela melao-motheo ea Bibele re ntse re hopola hore re emela Jehova ka linako tsohle. Ka tumelo, re lokela ho tšepa hore Molimo o tla phethahatsa merero ea hae eohle. Ka mesebetsi e metle, re thusa hore litaba tse molemo li phatlalatsoe. Re bontša hore ka sebele re ananela sohle seo Jehova a re etselitseng sona. Kahoo, a re tsoeleng pele re etsetsa Jehova mahlabelo a tsoang botebong ba pelo.

[Lipotso Tsa Sehlooho se Ithutoang]

[Ntlha e Qolotsoeng e leqepheng la 25]

Na molemo oa Jehova o u susumelletsa hore u ntlafatse sehlabelo sa hao sa thoriso?

[Setšoantšo se leqepheng la 23]

Na u sebelisa monyetla o mong le o mong hore u fane ka bopaki?