Ha Jehova a ne a etsa tokisetso ea lelapa, o ile a fa batsoali boikarabelo ba ho hlokomela bana. (Bakolose 3:20) Ka hona, ke boikarabelo ba hao joaloka motsoali ho koetlisa ngoana oa hao hore a rate Jehova le hore a be le boikarabelo ha a se a hōlile. (2 Timothea 1:5; 3:15) U boetse u lokela ho ithuta se ka pelong ea mora kapa morali oa hao. Ntle ho pelaelo, mohlala oa hao ke oa bohlokoa haholo. E le hore u atlehe ho ruta ngoana oa hao Lentsoe la Jehova, u lokela ho ithuta lona pele.—Pesaleme ea 40:8.

SEO BIBELE E SE BUANG: ‘U potlakele ho utloa, u liehe ho bua.’ (Jakobo 1:19) U batla hore bana ba hao ba lokolohe ha ba buisana le uena. Ba lokela ho tseba hore u ikemiselitse ho ba mamela ha ba batla ho bua le uena. Etsa hore ho rene khotso ka lapeng e le hore ba nolofalloe ho itlhalosa. (Jakobo 3:18) Haeba ba nahana hore u tla ba omanya kapa u ba khalemele ka thata, ba ka ’na ba se ke ba phutholoha. E-ba le mamello ha u sebetsana le bana ba hao, ’me u lule u ba tiisetsa hore ua ba rata.—Matheu 3:17; 1 Bakorinthe 8:1.

SEO U KA SE ETSANG:

• Iphe nako ea ho mamela bana ba hao ha ba batla ho bua

• Buisana le bana ba hao khafetsa, eseng feela ha ho e-na le mathata

SEO BIBELE E SE BUANG: “Ea bontšang temohisiso tabeng o tla fumana se molemo.” (Liproverbia 16:20) Ka linako tse ling ho tla hlokahala hore u utloisise kamoo ba ikutloang kateng, eseng feela seo ba u bolellang sona. Ho tloaelehile hore bacha ba feteletse taba kapa ba ipuele feela tjee. “Ha mang kapa mang a araba taba pele a e utloa, hoo ke booatla.” (Liproverbia 18:13) U se ke ua potlakela ho halefa.—Liproverbia 19:11.

SEO U KA SE ETSANG:

• Qoba ho ba kena hanong kapa ho phahamisa maikutlo, ho sa tsotellehe hore na ba re’ng

• Leka ho hopola hore na u ne u ikutloa joang ha u lekana le bona, le hore na ke’ng se neng se bonahala e le sa bohlokoa ho uena

SEO BIBELENG E SE BUANG: “Mora oa ka, u mamele taeo ea ntat’ao, ’me u se ke ua furalla molao oa ’m’ao.” (Liproverbia 1:8) Jehova o file ntate le ’mè boikarabelo ba ho hlokomela bana. U lokela ho ruta bana ba hao hore ba u hlomphe le ho u mamela. (Baefese 6:1-3) Bana ba khona ho lemoha ha batsoali ba ‘sa kopana ka ho loketseng kelellong e tšoanang.’ (1 Bakorinthe 1:10) Haeba le sa lumellane, qobang ho bontša seo ka pel’a bana, kaha se ka etsa hore ba le telle.

SEO U KA SE ETSANG:

• Buisanang ’me le lumellane ka hore na le tla ba khalemela joang

• Haeba uena le molekane oa hao le sa bone lintho ka ho tšoana tabeng ea ho khalemela bana, leka ho utloisisa maikutlo a hae

SEO BIBELE E SE BUANG: “Koetlisa moshanyana ho ea ka tsela e mo loketseng.” (Liproverbia 22:6) Hore u atlehe ho ruta bana ba hao hase ntho e ka iketsahallang feela tjee. U lokela ho ba le moralo oa ho koetlisa bana ba hao, o akarelletsang ho ba khalemela. (Pesaleme ea 127:4; Liproverbia 29:17) Ho khalemela bana ha ho bolele feela ho ba fa kotlo, empa ho akarelletsa ho ba thusa ho utloisisa hore na ke hobane’ng ha u ba behela melao e itseng. (Liproverbia 28:7) Hape, ba rute hore ba rate Lentsoe la Jehova le ho utloisisa melao-motheo ea lona. (Pesaleme ea 1:2) Sena se tla ba thusa hore ba be le letsoalo le letle.—Baheberu 5:14.

SEO U KA SE ETSANG:

• Kholiseha hore bana ba hao ba nka Molimo e le Motho oa sebele eo ba ka mo tšepang

• Ba thuse hore ba hlokomele ba be ba qobe lintho tse ka ba silafatsang boitšoarong, tse kang tse fumanoang Inthaneteng le mecheng e tloaelehileng ea puisano. Ba rute ho itšireletsa ho batho ba hlekefetsang ba bang ka thobalano