José ke mor’abo rōna e mocha oa pula-maliboho ea lulang motseng oa mahaeng o Luanda, Angola. Ke tichere sekolong se seng se haufi le Holo ea ’Muso. Kaha ke Mokreste ea behang mohlala ebile o ruta ka boqhetseke, bana ba 86 ba sehlopheng sa hae ba mo rata haholo ebile baa mo hlompha. Liboka tsa phutheho ea habo tsa har’a beke li kena ka 4:00 thapama, ka hona o lumeletsoe  hore a chaise pele e le hore a be teng libokeng. Ha a chaisa o toba Holong ea ’Muso.

Bana ba bang ba sekolo ba ne ba ipotsa hore na ke hobane’ng ha José a chaisa pele ho nako le hore na o ea hokae. Ka letsatsi le leng bana ba bang ba babeli ba ile ba mo sala morao ’me ba ea libokeng. Bekeng e ’ngoe, ba bang ba bararo ba ile ba ea libokeng letsatsing leo ka lona José a neng a e-na le puo Sebokeng sa Tšebeletso. Ba ile ba joetsa bana bohle ka tlelaseng ka taba ena. Libekeng tse latelang palo ea bana ba eang libokeng e ile ea eketseha ho tloha ho ba 5 ho ea ho ba 21. Bahoeletsi ba ile ba ithaopela ho ba khannela thuto ea Bibele, ’me ba bangata ba lumela. Ha ba eang libokeng ba tla ka lingoliloeng sekolong, ba bang ba ile ba bontša thahasello ’me ba qala ho ea libokeng. Ha selemo se fela, bana ba 54 ho ba 86 ba tlelase ea hae ba ne ba se ba ile ba ea libokeng. José o re ba 23 ba hatela pele hantle moeeng ’me ba tsoela pele ho ea libokeng.

Ha Joseph le Evezi e leng banyalani ba bo-pula-maliboho ba khethehileng ba fihla kabelong ea bona Nigeria, ka ho nyahama bahoeletsi ba bang ba ile ba re: “Ha re na tšimo mona. Re e sebelitse ka makhetlo.” Ka mor’a selemo Joseph o ile a ngolla ofisi ea lekala a re: “Re poqa-poqa tšimo ena kamehla ebile batho ba mona baa hanyetsa ’me ba bang ha ba thahaselle. ’Na le mosali oa ka re ea tšimong re nkile mochine o bapalang li-DVD e le hore re ka bontša bana, bacha le batho ba baholo livideo. Ka lebaka leo, khoeli e ’ngoe le e ’ngoe re khanna lithuto tsa Bibele  tse 18, ’me ka linako tse ling ha re khone ho li khanna kaofela. Bana ba lula ba kōpa hore re ba bontše ‘livideo tsa Kalebe.’”

Ka April 2014, ofisi ea lekala e Congo (Kinshasa) e ile ea fumana lengolo le amang maikutlo le tsoang ho sehlopha sa batšoasi ba litlhapi ba lulang sehlekehlekeng sa Ibinja se Lake Kivu. Kaha ba atisa ho ea litoropong tse haufi ka  mabaka a khoebo, ka letsatsi le leng ha ba le toropong ea Bukavu, ba ile ba kopana le Lipaki Tsa Jehova. Li ile tsa ba pakela ’me tsa ba fa Bibele le lingoliloeng.

Ba ile ba thabela seo ba se balang hoo ba ileng ba bolella baahi ba bang ba sehlekehlekeng sa habo bona. Kaha ba ne ba thahasella, banna bao ba ile ba roma e mong ho ea Bukavu hore a e’o batla Lipaki ’me a li kōpe hore li tle Ibinja. Ha monna eo a sa li fumane o ile a ngolla ofisi ea lekala a re: “Re kōpa le romele Lipaki li tl’o re thusa e le hore re tsebe Bibele joaloka tsona ’me li re rute hore na re ka fumana bophelo bo sa feleng joang. Re tla li fa bolulo. Ke tla fana ka setša sa ka hore li hahe kereke. Libuka tsa lōna li re bontšitse hore baruti ba re ruta mashano. Re kholisehile hore re fumane bolumeli ba ’nete. Ho na le batho ba bangata mona Ibinja ba ka ratang ho ithuta Bibele ’me ebe Lipaki Tsa Jehova.”

Lengolong leo ho ne ho bontšitsoe hore ho na le batho ba ka bang 40 ba thahasellang sehlekehlekeng seo. Ibinja e na le baahi ba fetang 18 000, empa ha ho na Lipaki. Hang-hang ofisi ea lekala e ile ea romela bo-pula-maliboho ba khethehileng ba babeli ba buang puo ea moo.

Moruti e mong oa kereke e hlaheletseng ea Prostanta e Afrika Boroa o ile a re, “Ke tla lula ke tla Sehopotsong.” Ke’ng se ileng sa etsa hore moruti eo a be teng Sehopotsong ka April 2014? O ile a khahloa ke ha barab’abo rōna ba babeli ba merabe e sa tšoaneng ba ne ba mo etetse ho ea mo bolella litaba tse molemo. Ba ne ba tseba hore ho ka etsahala hore moruti eo a se ke a rata ho buisana le bona. Ha Adaine, e leng e mong oa barab’abo rōna a hlalosa se etsahetseng o re: “Re ile ra makala ha a re bulela ’me a re re kene. Re ile ra buisana ka nako e telele. O ne a hloletsoe ha a bona lekhooa le etsa mosebetsi oa boboleli  motseng oa batho ba batšo ’me le bua le eena ka puo ea hae. Re ile ra mo khannela thuto ea Bibele kamehla.”

Adaine o tsoela pele o re: “Monna enoa e bile moromuoa le moruti ka lilemo tse fetang 40, empa ke hona a fumanang likarabo tsa lipotso tsohle tsa hae hona joale ha a le lilemo li 80. O rata buka ea Etsisa Tumelo ea Bona. O tšoara lintlha tse ling ka hlooho nakong ea thuto, ’me o li sebelisa ha a rera kerekeng ea hae. O ile a bontša litho tsa phutheho ea hae buka ea Ha e le Hantle ke Eng Seo Bibele e se Rutang? A re ho tsona, ‘Ha Lipaki Tsa Jehova li tla ha lōna li nkile buka ena, le li mamele hobane ke buka ea bohlokoa haholo.’”

Moruti eo o ile a bolella Adaine hore baeta-pele ba kereke ba mo khalemetse ka thata ba ba ba mo bolella hore a se hlole a bua ka Lipaki Tsa Jehova ha a rera. O ne a selebaletsoe. Adaine o ile a hopola pale ea moruti e mong oa Myanmar e hlahang Bukeng ea Selemo ea Lipaki Tsa Jehova ea 2013. Ha Adaine a mo balla eona, o ile a re: “Bothata ba hae bo tšoana le ba ka hantle! Ha kea lokela ho tsilatsila ho etsa qeto ka seo ke se batlang ha e le mona ke tseba ’nete.”

Moruti eo o ile a ea Sehopotsong ka lekhetlo la pele ka la 14 April , 2014, ’me a re ha se sa tla mo fosa. O boletse hore o batla ho tlohela bolumeli ba bohata.

Baffour le Aaron ke bo-pula-maliboho ba khethehileng Bokabo, e leng sebaka seo ho lengoang coco ho sona ka bophirimela ho Ghana. Tšimo ea bona e qaqolohane, ’me motse ka mong o na le matlo a ’maloa ao hore motho a fihle ho ’ona a lokelang ho tsamaea ka litselana tse  matsoelintsoeke. Kahoo, motho a ka lahleha habonolo haeba a ka thinya sebakeng se fosahetseng! Ka letsatsi le leng, Baffour le Aaron ba ile ba nka tsela esele ’me ba iphumana ba le matlong a mang a mekhoro ao ba e-s’o fihle ho ’ona. Ha ba le moo, ba ile ba kopana le Michael le Patience, ba ileng ba mamela molaetsa oa bona ka thahasello ’me ba amohela thuto ea Bibele. Hamorao, Michael o ile a re: “Re tlohetse ho ea kerekeng lilemong tse peli tse fetileng hobane ho ne ho etsoa lintho tse sa lokang. Ho tloha ka nako eo, ’na le Patience re ’nile ra ipalla Bibele mantsiboea a mang le a mang re leka ho fumana likarabo tsa lipotso tsa rōna. Haesale re rapela Molimo hore a re thuse re fumane ’nete.” Le hoja ba ne ba lokela ho tsamaea nako e telele ka har’a mefero ea coco, ba ile ba qala ho ea libokeng. Ka mor’a selemo feela, banyalani bao ba ile ba kolobetsoa ’me ea e-ba bo-pula-maliboho ba kamehla. Hona joale, le bona ba tsoelipana ka har’a mefero ea coco ba batla batho ba bang bao le bona “ba ’nileng ba rapela Molimo hore a ba thuse ba fumane ’nete.”