“Tswelang pele . . . ho tshwarelana ka bolokolohi haeba le ha e le mang a na le sesosa sa pelaelo kgahlanong le e mong.”​—BAKOLOSE 3:13.

Kaofela re etsa diphoso. Re ka utlwisa batho ba bang bohloko kapa bona ba re utlwisa bohloko. Taba ena e bolela hore kaofela re lokela ho tshwarela batho ba bang mme le bona ba re tshwarele. Ha re tshwarela batho ba bang, re kgaotsa ho ba jara ka pelo. Ha re ‘busetse bobe ka bobe’ ebile ha re dule re hopotsa motho diphoso le mefokolo ya hae. (Baroma 12:​17) Empa re lokela ho etsang haeba motho e mong a re utlwisitse bohloko haholo mme re dula re nahana ka ntho eo a re entseng yona? Boemong boo re lokela ho buisana le motho eo ka tlhompho moo re leng bang. Ntho eo re batlang ho e finyella ke ho bopa kgotso, eseng ho bontsha motho e mong hore o fositse mme rona re nepile.​—Baroma 12:18.

‘Ka ho ikokobetsa kelellong le nke hore ba bang ba le phahametse.’​—BAFILIPI 2:3.

Ha re ikokobeditse ebile re hlompha, batho ba bang ba thabela ho ba le rona. Ba a tseba hore re tla ba mosa re be re ba nahanele le hore re ke ke ra ba utlwisa bohloko ka boomo. Empa haeba re inka re phahametse batho ba bang kapa re dula re hatella hore  dintho di etswe ka tsela eo re batlang ka yona, re tla etsa hore ho be le dikgohlano ebile re tla etsa hore batho ba se ke ba ikutlwa ba phutholohile ha ba na le rona. Batho ba tla re qoba mme ho tla ba thata hore re be le metswalle.

“Modimo ha a leeme, empa setjhabeng se seng le se seng motho ya mo tshabang le ya sebetsang ho loka o a amoheleha ho yena.”​—LIKETSO 10:​34, 35.

Mmopi wa rona ha a nke batho ba bang ba le bohlokwa ho feta ba bang ka lebaka la dinaha tseo ba tswang ho tsona, puo ya bona, maemo a bona setjhabeng kapa mmala wa bona. “O entse ho tswa mothong a le mong setjhaba se seng le se seng sa batho.” (Liketso 17:​26) Taba ena e bolela hore batho kaofela ke bana ba motho. Ha re tshwara batho bohle ka tlhompho le ka mosa, re etsa hore ba thabe, le rona re a thaba ebile re thabisa Mmopi wa rona.

“Le ikapese . . . bonolo.”​—BAKOLOSE 3:12.

Ha re le batho ba bonolo, re etsa hore batho ba bang ba ikutlwe ba phutholohile. Ba ikutlwa ba lokolohile ho bua le rona le ho re bontsha diphoso tsa rona hobane ba a tseba hore ha re na halefa. Ha motho e mong a re buisa a halefile, re ka mo theola bohale haeba re mo araba ka bonolo. Liproverbia 15:1 e re: “Karabo, ha e le bonolo, e leleka kgalefo, empa lentswe le utlwisang bohloko le baka bohale.”

“Ho fana ho tlisa thabo e kgolo ho feta ho amohela.”​—LIKETSO 20:35.

Kajeno batho ba bangata ba meharo ebile ba inahana bo bona feela. Empa re ka thaba e le ka nnete haeba re fana. (Luka 6:​38) Batho ba fanang ba thabile hobane ba rata batho ho feta dintho tseo ba nang le tsona. Lerato leo le etsa hore ebe batho ba ananelang mme ba bontshe kananelo ha motho e mong a ba fa ntho e itseng. (Bakolose 3:​15) Ipotse, ‘Na ke rata ho ba le batho ba sa faneng le ba se nang kananelo kapa ke rata ho ba le batho ba fanang ebile ba na le kananelo?’ Re ithutang tabeng ee? Eba seo o batlang hore batho ba bang ba be sona.​—Matheu 7:12.