Baiseraele ba ne ba qobellwa ho sebetsa ka thata e le makgoba. Jehova o ile a roma Moshe le Arone ho Faro, a re ba re ho yena: ‘Tlohela setjhaba sa ka hore se tsamaye se yo ntshebeletsa lefeelleng.’ Faro a araba ka boikgohomoso a re: ‘Ha ke na taba hore na Jehova o reng. Nke ke ka lokolla Baiseraele.’ Yaba Faro o ba sebedisa ka thata le ho feta. Jehova o ne a tla fa Faro kotlo. Na o a tseba hore o ile a etsang? O ile a tlisetsa Baegepeta Dikotlo Tse Leshome. Ka hoo, Jehova a re ho Moshe: ‘Faro ha a mmamele. Hoseng o tlo ya Nokeng ya Nile. Eya o mo bolelle hore ka ha ha a batle ho lokolla batho ba ka, metsi a Noka ya Nile a tla fetoha madi.’ Yaba Moshe o ya ho Faro. Arone a otla metsi a Noka ya Nile ka molamu, yaba a fetoha madi Faro a ntse a shebile. Metsi a Noka ya Nile a qala ho nkga mme ditlhapi tsa shwa le batho ba hloka metsi ao ba a nwang. Empa Faro a nna a hana ho lokolla Baiseraele.

 Ka mora matsatsi a supileng, Jehova a romela Moshe hape ho Faro hore a re ho yena: ‘Haeba o sa tlohelle batho ba ka hore ba tsamaye, naha yohle ya Egepeta e tla tlala dinqanqane.’ Yaba Arone o phahamisa molamu wa hae mme dinqanqane tsa tlala hohle. Tsa kena ka matlung, dibetheng le ka dijaneng. E le tsona feela hohle mona! Faro a re Moshe a kope Jehova hore a tlose dinqanqane tseo. A tshepisa hore o tla lokolla Baiseraele. Ka hoo, Jehova a fedisa kotlo eo mme Baegepeta ba bokella dinqanqane tse shweleng, ba di etsa diqubu tse ngata. Naha ya qala ho nkga. Empa Faro a boela a hana ho lokolla Baiseraele.

Jehova a re ho Moshe: ‘Ere Arone a otle fatshe ka molamu wa hae mme mobu o tla fetoha menwang e lomang ha bohloko.’ Hanghang menwang ya tlala hohle. Yaba Baegepeta ba bang ba re ho Faro: ‘Kotlo ena e tswa ho Modimo.’ Empa Faro ha a ka a dumella Baiseraele hore ba tsamaye.