Ka mora Morwallo, bara ba Noe le basadi ba bona ba ile ba ba le bana ba bangata. Malapa a bona a ile a eketseha yaba a ya dibakeng tse fapaneng feela jwalo ka ha Jehova a ne a ba bolelletse.

Empa batho ba bang ba ne ba sa mamele Jehova. Ba ile ba re: ‘A re haheng motse oo re tla dula ho wona. Re tla haha tora e telele e fihlang lehodimong. Re tla tsejwa ke batho ba bangata.’

 Jehova o ne a sa rate ha batho bana ba haha tora yaba o ba thibela ho tswela pele. Na o a tseba hore o entse seo jwang? O ile a etsa hore ba bue dipuo tse sa tshwaneng. Ka lebaka leo, ba ile ba tlohela ho haha hobane ba ne ba se ba sa utlwane. Motse oo ba neng ba o haha o ile wa bitswa Babele, e bolelang “Pherekano.” Batho ba ile ba tloha yaba ba ya dibakeng tse fapaneng. Empa ba nna ba etsa dintho tse mpe le ha ba fihla dibakeng tseo. Na batho ba ratang Jehova ba ne ba ntse ba le teng? Re tla fumana karabo kgaolong e latelang.