Ka letsatsi le leng ha Eva a setse a le mong, noha e ile ya bua le yena. E ile ya re: ‘Na ka nnete Modimo o itse le se ke la ja ditholwana tsa difate tsohle?’ Eva a re: ‘Re ka ja ditholwana tsa difate tse serapeng empa ha re a lokela ho ja tsa sefate se hara serapa. Ha re ka ja tholwana ya sefate seo, re tla shwa.’ Yaba noha re: ‘Ho hang le ke ke la shwa. Mohlang le di jang, mahlo a lona a tla buleha mme le tla ba jwalo ka Modimo.’ Na e ne e bua nnete? Tjhe, e ne e bua leshano. Empa Eva o ile a e kgolwa. Ha a ntse a sheba ditholwana tsa sefate seo, o ile a di lakatsa le ho feta. Ka hoo, a kga tholwana a e ja mme a e fa Adama. Adama o ne a tseba hore ba tla shwa haeba ba sa mamele Modimo. Le ha ho le jwalo, o ile a e ja.

Ha morao letsatsing lona leo, Jehova o ile a bua le Adama le Eva. O ile a ba botsa hore na ke hobaneng ha ba jele tholwana eo. Eva o ile a re ke noha e itseng a e je mme Adama a re ke Eva ya itseng a e je. Jehova o ile a ba leleka serapeng seo hobane ba ne ba sa mo mamela. O ile a beha mangeloi le sabole e tukang ho ba thibela ho kena serapeng seo.

Jehova o ile a re o tla otla noha e thetsitseng Eva. Ha e le hantle, e ne e se noha e buang le Eva. Jehova o ne a sa bopa dinoha tse tsebang ho bua. Ke lengeloi le kgopo le ileng la etsa hore noha e bue. Le ne le batla ho qhekella Eva. Lengeloi leo ke Satane Diabolose. Nakong e tlang, Jehova o tla fedisa Satane e le hore a se ke a hlola a qhekella batho.