Jesu o ile a kopana le barutuwa ba hae Galilea, yaba o ba fa taelo ya bohlokwa o re: ‘Eyang mme le etse batho barutuwa lefatsheng lohle. Le ba rute dintho tsohle tseo ke le rutileng tsona mme le ba kolobetse.’ A ba tshepisa a re: ‘Hopolang, ke na le lona ka mehla.’

Matsatsi a 40 ka mora hore Jesu a tsoswe bafung, o ile a hlaha ho barutuwa ba hae ba makgolo Galilea le Jerusalema. O ile a ba ruta dithuto tsa bohlokwa a ba a etsa mehlolo e mengata. Yaba o kopana le baapostola ba hae Thabeng ya Mehlwaare ka lekgetlo la ho qetela. Jesu o ile a re ho bona: ‘Le se ke la tloha Jerusalema. Le dule le lebelletse seo Ntate a se tshepisitseng.’

Baapostola ha ba a ka ba utlwisisa hore na o ne a reng. Ka hoo, ba mo botsa ba re: ‘Na jwale o se o tlo ba Morena wa Iseraele?’ Jesu a ba araba a re: ‘Nako ya hore Jehova a nketse Morena ha eso fihle. Haufinyane le tla amohela matla a moya o halalelang mme le tla ba dipaki tsa ka Jerusalema, Judea le Samaria le ho isa karolong e holehole ya lefatshe.’

Jwale Jesu a nyolohela lehodimong, yaba leru le a mo kwahela. Barutuwa ba hae ba ne ba ntse ba mo shebile empa o ne a ile.

Yaba barutuwa ba tloha Thabeng ya Mehlwaare ba ya Jerusalema. Ka mehla ba ne ba kopana kamoreng e ka hodimo mme ba rapela. Ba ne ba emetse hore Jesu a tle a ba fe ditaelo tse eketsehileng.