UYATI yini kutsi kungani lendvodza ithandaza kuJehova? Itindlaleleni letincwadzi embikweli-altare laJehova? Lendvodza nguHezekiya, futsi iyinkhosi yaseningizimu yetive letimbili taka-Israyeli. Isenkingeni lenkhulu. Kungani isenkingeni?

Kungenca yekutsi emabutfo ase-Asiriya abhubhisa tive letingu-10 tasenyakatfo. Jehova wakuvumela loko kutsi kwenteke ngoba bantfu bebenta tintfo letimbi. Ngako nyalo emabutfo ase-Asiriya efika atekulwa nembuso wetive letimbili.

Inkhosi yase-Asiriya yatfumela tincwadzi kuHezekiya iNkhosi. Ngito letincwadzi latindlale embikwaNkulunkulu. Lokwakubhalwe kuletincwadzi kwakwedzelela Jehova, futsi kwakutjela Hezekiya kutsi angalwi nabo ngoba bebatamehlula. Kungako Hezekiya athandaza watsi: ‘Awu Jehova, sephule esandleni senkhosi yase-Asiriya, kuze yonkhe imibuso yati kutsi wena wedvwa unguNkulunkulu.’ Jehova abetamlalela yini Hezekiya?

Hezekiya abe yinkhosi lelungile. Abengafani nemakhosi labebusa tive letingu-10 taka-Israyeli, nobe nababe wakhe iNkhosi Ahazi. Abeyinaka indlela labewulalela ngayo umtsetfo waJehova. Kwatsi nasacedzile kuthandaza Hezekiya, umphrofethi Isaya wamtfumelela umlayeto lovela kuJehova lotsi: ‘Inkhosi yase-Asiriya ngeke ingene eJerusalema. Nemasotja ayo angeke asondzele, nobe acibishele imicibisholo eJerusalema.’

Ase ubuke lesitfombe lesikulelikhasi. Uyawati kutsi abobani lamasotja lafile? Angema-Asiriya. Jehova watfumela ingilosi yakhe, futsi ngebusuku lobubodvwa yabulala emasotja ase-Asiriya langu-185 000. Ngako inkhosi yase-Asiriya yayekela kulwa, yabuyela emuva ekhaya.

Umbuso wetive letimbili wasindza, futsi bantfu baba nekuthula kwesikhashana. Kodvwa ngemuva kwekufa kwaHezekiya, indvodzana yakhe Manase yaba yinkhosi. BoManase nendvodzana yakhe Amoni leyabusa emuva kwakhe, baba ngemakhosi langakalungi. Ngako lendzawo yaphindze yagcwala bugebengu nebudlova. Kwatsi lapho iNkhosi Amoni seyibulewe tinceku tayo, indvodzana yayo Josaya yaba yinkhosi yembuso wetive letimbili.