UYAWATI yini lomthantazo Jesu lawufundzisa balandzeli bakhe?— Nangabe ungawati, singawufundza ndzawonye eBhayibhelini, kuMatewu 6:9-13. Lomthantazo labanyenti labawati ngekutsi nguMthantazo WeNkhosi, unemagama latsi: “UMbuso wakho awute.” Uyawati yini uMbuso waNkulunkulu?—

Inkhosi, ngumbusi welive nome wendzawo. Hulumende wayo ubitwa ngekutsi ngumbuso. Kulamanye emave loyo losembili kuloyo hulumende ubitwa ngekutsi ngumengameli. Ubitwa ngekutsini-ke umBusi wahulumende waNkulunkulu?— YiNkhosi. Kungako hulumende waNkulunkulu abitwa ngekutsi nguMbuso.

Uyati kutsi ngubani Jehova Nkulunkulu lamkhetsa kutsi abe yiNkhosi yahulumende waKhe?— YiNdvodzana yakhe, Jesu Khristu. Kungani  Jesu ancono kakhulu kunalabanye babusi lokungenteka bantfu babakhetse?— Kungenca yekutsi Jesu umtsandza kakhulu Babe wakhe, Jehova. Ngaso sonkhe sikhatsi wenta tintfo letikahle.

Kusasele sikhatsi lesidze kutsi Jesu atalwe eBhetlehema, liBhayibheli lakhuluma ngekutalwa kwakhe laphindze latsi bekatawuba ngumBusi lokhetfwe nguNkulunkulu. Ngicela sikufundze loko ku-Isaya 9:6, 7. Lombhalo utsi: “Ngobe tsine sitalelwe umntfwana, siphiwe indvodzana. Umbuso uyawubasemahlombe akhe. Uyawutsiwa . . . yiNkhosi Yekuthula [ngumntfwanenkhosi]. Umbuso wakhe uyawukhula, kuthula nenhlalakahle kungeke kuphele.”

Uyati yini kutsi kungani kulelivesi umBusi wembuso waNkulunkulu abitwa ngekutsi “yiNkhosi”?— Kungenca yekutsi lendvodzana ingumntfwanenkhosi. Ngetulu kwaloko, Jesu uyiNdvodzana yeNkhosi Lenkhulu, Jehova. Jehova uphindze wenta Jesu iNkhosi yahulumende waKhe letawubusa emhlabeni iminyaka leyinkhulungwane. (Sembulo 20:6) Ngemuva kwekubhajatiswa, Jesu “wacala kushumayela, futsi abetsi: ‘Phendvukani, ngobe uMbuso welizulu sewusondzele.’”​—Matewu 4:17.

Ucabanga kutsi yini leyenta Jesu watsi uMbuso sewusondzele?— Kungobe iNkhosi lebeyitawubusa ezulwini ngemuva kwesikhatsi, beyikanye nabo. Kungako Jesu atjela bantfu watsi: “UMbuso waNkulunkulu usemkhatsini wenu.” (Lukha 17:21) Angeke yini sewutsandze kuba sedvute neNkhosi lebekwe nguJehova, uze ngisho uyitsintse?—

Ucabanga kutsi ngumuphi umsebenti lobalulekile Jesu lawutela emhlabeni kuze awente?— Jesu waphendvula lombuto ngekutsi atsi: “Nakulamanye emadolobha kufanele ngitishumayele letindzaba letimnandzi teMbuso waNkulunkulu, ngobe nguloko lengatfunyelwa kona.” (Lukha 4:43) Jesu bekati kutsi angeke awente yedvwa wonkhe lomsebenti wekushumayela. Ucabanga kutsi yini labese uyayenta ngaloko?—

 Jesu wakhetsa bantfu labatsite wahamba nabo waphindze wabakhombisa kutsi bawente njani lomsebenti wekushumayela. Bekucala labacecesha bekubantfu labangu-12 lababita ngekutsi baphostoli. (Matewu 10:5, 7) Jesu wacecesha baphostoli kuphela yini kutsi bente lomsebenti? Cha-ke, ngobe liBhayibheli litsi wacecesha nalabanye labanyenti kutsi bashumayele. Ngekuhamba kwesikhatsi, watfuma bafundzi labangu-70, wabatfuma ngababili. Bebabafundzisani bantfu?— Jesu watsi: ‘Laningena khona, nibotsi: “UMbuso waNkulunkulu sewusondzele.”’ (Lukha 10:9) Ngaleyondlela bantfu bafundza ngahulumende waNkulunkulu.

Kadzeni ka-Israyeli, emakhosi lamasha bekaya edolobheni agibele imbongolo kuze abonwe bantfu. Loko ngiko kanye lokwentiwa nguJesu ngesikhatsi avakashe eJerusalema kwekugcina. Loku-ke kuveta kutsi Jesu utawuba ngumBusi weMbuso waNkulunkulu. Bayamfuna yini bantfu kutsi abe yiNkhosi yabo?—

Njengobe ahamba ngalembongolo, bantfu labanyenti esicunjini bacala kwendlala tembatfo tabo emgwacweni lapho atowendlula khona. Labanye bajuba emagala etihlahla baphindze bawabeke emgwacweni. Ngekwenta loko bakhombisa kutsi bafuna kutsi Jesu abe yiNkhosi yabo. Bayamemeta batsi: “Ubusisiwe Loyo lota njengeNkhosi ngeligama laJehova!” Kodvwa akusiwo wonkhe muntfu lojabulako. Ecinisweni, labanye baholi benkholo batsi kuJesu: “Yekhuta labafundzi bakho” babanga umsindvo.​—Lukha 19:28-40.

Ngemuva kwemalanga lasihlanu Jesu uyaboshwa futsi uyiswa esigodlweni kuze avele embikwembusi Phontiyuse Pilatu. Titsa taJesu timbeka licala lekutsi utsi uyinkhosi futsi akahambisani nembuso wemaRoma. Pilatu ubuta Jesu ngalokumangalelwa. Jesu utsi aketami kutsatsa emandla alohulumende. Utsi kuPilatu: “Umbuso wami awusiyo incenye yalelive.”​—Johane 18:36.

Pilatu uphumela ngephandle ufike utjela bantfu kutsi Jesu ute licala. Kodvwa bantfu abasafuni kutsi Jesu abe yiNkhosi yabo. Abafuni nekutsi akhululwe. (Johane 18:37-40) Ngemuva kwekuphindze akhulume  naJesu, Pilatu uyaciniseka kutsi kute lokubi lokwentiwe nguJesu. Ekugcineni ngemuva kwekuletsa Jesu ngephandle kwekugcina, Pilatu utsi: “Nayi-ke inkhosi yenu!” Kodvwa bantfu bevakala bayamemeta batsi: “Msuse! Msuse! Mbetsele!”

Pilatu uyabuta: “Nisho kutsi ngibetsele inkhosi yenu?” Baphristi labakhulu bamphendvula batsi: “Site lenye inkhosi ngaphandle kwaKhesari.” Ase ucabange nje ngaloko! Labaphristi lababi sebabangele kutsi labantfu bajikele Jesu.​—Johane 19:1-16.

Lamuhla kwenteka lokufanako nalokwenteka ngaleso sikhatsi. Bantfu labanyenti abafuni kutsi Jesu abe yiNkhosi yabo. Bangase batsi bayakholwa  kuNkulunkulu, kodvwa abafuni kutsi Nkulunkulu nobe Jesu abatjele loko lokufanele bakwente. Bafuna bohulumende babo kutsi kube ngibo lababusa lapha emhlabeni.

Kutsiwani ngatsi? Nasifundza ngeMbuso waNkulunkulu kanye nangato tonkhe tintfo letinhle letitawentiwa ngiwo, sitiva njani ngaNkulunkulu?— Siyamtsandza, angitsi kunjalo?— Singamkhombisa njani Nkulunkulu kutsi siyamtsandza futsi sifuna kubuswa nguMbuso wakhe?—

Singamkhombisa Nkulunkulu indlela lesitiva ngayo ngekutsi silandzele sibonelo saJesu. Yini leyentiwa nguJesu kuze akhombise kutsi uyamtsandza Jehova?— Wakuveta loku Jesu nakatsi: “Ngihlale ngenta tintfo letimjabulisako.” (Johane 8:29) Kuliciniso, Jesu weta emhlabeni kuze ‘ente intsandvo yaNkulunkulu’ nekutsi ‘acedzele umsebenti wakhe.’ (Hebheru 10:7; Johane 4:34) Ase ucabange ngaloko Jesu lakwenta ngaphambikwekutsi acalise umsebenti wekushumayela.

Jesu waya kuJohane uMbhabhatisi eMfuleni iJordane. Ngemuva kwekutsi sebangenile emantini, Johane wacwilisa Jesu emantini waphindze wamenyusa. Uyati yini kutsi kungani Johane abhabhatisa Jesu?—

Jesu nguye lowacela Johane kutsi ambhabhatise. Kodvwa sati njani kutsi Nkulunkulu bekafuna kutsi Jesu abhajatiswe?— Loko siyakwati  ngobe ngesikhatsi Jesu aphuma emantini, weva livi laNkulunkulu lebelivela ezulwini litsi: “Wena uyiNdvodzana yami letsandzekako, ngikwemukele.” Nkulunkulu waze watfumela umoya longcwele lonjengelituba kutsi wehlele kuJesu. Ngekubhajatiswa, Jesu wakhombisa kutsi ufuna kukhonta Jehova imphilo yakhe yonkhe nobe kuze kube phakadze.​—Makho 1:9-11.

Nyalo usesemncane. Kodvwa-ke yini lotayenta nasewukhulile?— Utamlingisela yini Jesu ngekutsi ubhajatiswe?— Ubomlingisela ngobe liBhayibheli litsi wakushiyela ‘sibonelo sekutsi ulandzele tinyatselo takhe edvute.’ (1 Phetro 2:21) Nangabe utawubhajatiswa, utawube ukhombisa kutsi uyafuna kubuswa nguMbuso waNkulunkulu. Kodvwa asigcini nje ngekubhajatiswa.

Kufanele sikulalele konkhe Jesu lakufundzisa. Jesu watsi singabi ‘yincenye yalelive.’ Sitawube sikhombisa kutsi siyamlalela yini Jesu nangabe senta tintfo talelive? Jesu nebaphostoli bakhe bakubalekela kwenta tintfo letinjalo. (Johane 17:14) Yini-ke labayenta?— Bebakhuluma nebantfu mayelana neMbuso waNkulunkulu. Ngulowo umsebenti lowawumcoka ekuphileni kwabo. Singawenta yini natsi?— Yebo singawenta, futsi nasiwenta sitawube sikhombisa kutsi sisuke sicinisile nasithantazela kutsi uMbuso waNkulunkulu ufike.