Kusukela endvulo, bantfu bebasolo bacabanga ngekutsi kungaba njani kuba nemphilo lenhle, bangagugi futsi baphile phakadze. Kodvwa-ke liciniso lelibuhlungu litsi: Siyafa. Lamavi aJobe langenhla lawakhuluma eminyakeni lengetulu kwaletinkhulungwane letintsatfu letendlulile, aseseliciniso nalamuhla.

Sifiso sekuphila phakadze sinemandla, futsi bonkhe bantfu banaso. LiBhayibheli lisitjela kutsi Nkulunkulu ufake sifiso sekuphila phakadze etinhlitiyweni tetfu kanye nelikhono lekucondza kutsi kungaba njani loko kuphila. (Umshumayeli 3:11) Nangabe kunjalo, kubonakala kunengcondvo yini kuwe kutsi Nkulunkulu lonelutsandvo angenta kutsi sibe nesifiso lesingeke sifezeke? Nangabe uphendvula ngekutsi cha, uphendvule kahle. LiVi laNkulunkulu litsi kufa kusitsa futsi lisetsembisa kutsi “kutawukwentiwa lite.”​—1 Khorinte 15:26.

Asingabati kutsi vele kufa kusitsa. Kute umuntfu locabangisise kahle longakwemukela. Nakusondzela ingoti, siyavika, siyibhacele, nobe siyibalekele. Nasigula, sifuna tindlela tekuphila. Senta konkhe lesingakhona kukwenta kuze sibalekele tintfo letingasibulala.

Sikhona yini sizatfu sekukholelwa kutsi sitakwentiwa lite lesitsa lesesineminyaka sikhona? Yebo. Jehova Nkulunkulu, longuMdali, akazange adale bantfu kutsi baphile iminyaka nje lembalwa bese bayafa. Bekungasiyo injongo yakhe yasekucaleni kutsi bantfu bafe. Abehlose kutsi bantfu baphile emhlabeni phakadze, futsi loko lakuhlosile uyakufeza.​—Isaya 55:11.

Kutawucedvwa njani-ke kufa? Kuwo wonkhe umlandvo, bantfu betamile kucatulula lenkinga yekufa, kodvwa abakaphumeleli. Lemetamo iyachubeka nasetikhatsini talamuhla. Bososayensi bente tindlela tekugoma kanye nemitsi lekhonile kwelapha tifo letitsite. Bakhonile nekubuka indlela takhi telufuto letidalwe ngayo. Etindzaweni letinyenti, silinganiso sikhombisa kutsi bantfu lamuhla baphila sikhatsi lesidze kunaleso lebebasiphila eminyakeni lelikhulu leyendlulile. Nome kunjalo, kufa akukapheli. Kunjengobe liBhayibheli lisho kutsi ‘konkhe kubuyela elutfulini.’​—Umshumayeli 3:20.

Tindzaba letimnandzi tikutsi akudzingeki setsembele ekuhlakanipheni kwebantfu kuze sicatulule lenkinga leseyinesikhatsi lesidze ikhona. Jehova Nkulunkulu sewuvele uyihlelile indlela yekutsi sisindziswe nobe sikhululwe ekufeni, futsi usebentisa Jesu Khristu kuze asikhulule.