Na artikel disi e poti prakseri na sani di yu ben wani kon sabi kande èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Bijbel profeititori e taki finifini fa sani o kon tru?

Soso na Almakti Gado kan taki finifini san o pasa na ini a ten di e kon (Amos 3:7). Fu eksempre, sensi a bigin, a ben taki dati wan sma ben o kon di ben o de a Mesias, noso Krestes. A Mesias ben o de a bakapikin fu a reti-ati man Abraham. A ben o de wan tiriman di ben o sorgu taki libisma di e gi yesi e kisi a blesi fu libi sondro sondu èn sondro siki (Genesis 22:18; Yesaya 53:4, 5). A sma disi di Gado ben pramisi ben o kon fu Betlehem.​—Leisi Mika 5:2.

Na Yesus ben de a Mesias. Moro leki seibi hondro yari na fesi, Bijbel ben taki dati a Mesias disi ben o gebore fu wan yongu uma èn taki sma ben o wisiwasi en. A ben o gi en libi gi den sondu fu furu sma èn den ben o beri en pe den e beri guduman (Yesaya 7:14; 53:3, 9, 12). Bijbel e sori tu taki moro leki feifi hondro yari na fesi, a Mesias ben o kon na Yerusalem tapu wan buriki èn sma ben o tori en gi 30 pisi solfru moni. Ala den sani disi kon tru finifini.​—Leisi Sakaria 9:9; 11:12.

2. Yehovah e taki na fesi o ten sani o pasa?

Moro leki feifi hondro yari na fesi, Bijbel ben taki krin san na a yari di a Mesias ben o sori ensrefi. Wan tu yariwiki ben o pasa fosi a doro, èn dati wani taki dati ibri „wiki” ben de seibi yari langa. A profeititori e taki fu 7 nanga 62 fu den wiki dati, èn dati na 69 yariwiki. Ala nanga ala, dati na 483 yari. O ten a pisi ten dati bigin? Soleki fa Bijbel e sori, dan a pisi ten dati bigin di Gado en futuboi Nehemia doro na ini Yerusalem èn a bigin bow a foto baka. A historia fu Persia e sori taki a yari dati ben de 455 fosi Krestes (Nehemia 2:1-5). Yesus teki dopu leki a Mesias 483 yari baka dati, na ini a yari 29, soifri leki fa a profeititori ben taki.​—Leisi Danièl 9:25.

  3. Bijbel profeititori e kon tru na ini a ten disi?

Yesus ben taki na fesi taki bigi sani ben o pasa na ini a ten disi. A profeititori e taki fu a bun nyunsu fu Gado Kownukondre, di o tyari frulekti kon gi sma na heri grontapu di lobi Gado. A Kownukondre o tyari wan kaba kon na a heri ogri grontapu disi di wi e libi na ini.​—Leisi Mateyus 24:14, 21, 22.

Bijbel profeititori e taki finifini fu a ten te na ogri grontapu disi o kon na wan kaba. Bijbel e sori taki sma ben o pori grontapu. Disi de tra fasi leki san sma ben o fruwakti na ini a ten disi pe ala sani e go na fesi. Problema di de a bakapisi fu feti, angriten, gronseki, nanga takru siki ben o de moro nanga moro (Lukas 21:11; Openbaring 11:18). Sma no ben o tyari densrefi moro na wan fasi di fiti. Na ini den muilek ten disi, den bakaman fu Yesus ben o preiki a bun nyunsu fu a Kownukondre gi ala sortu sma.​—Leisi Mateyus 24:3, 7, 8; 2 Timoteyus 3:1-5.

4. San o pasa nanga libisma na ini a ten di e kon?

Na Almakti Gado abi bun sani na prakseri gi libisma di e gi yesi na en. Yesus Krestes, a Mesias, o tiri grontapu komoto fu hemel, makandra nanga den wan di a teki puru fu grontapu. Den o de a Kownukondre tirimakti di o tiri wán dusun yari langa. Boiti dati, a Kownukondre o dresi ala sma di e libi na ini a ten dati. Siki nanga dede no o de moro.​—Leisi Openbaring 5:10; 20:6, 12; 21:4, 5.

Efu yu wani sabi moro, dan luku bladzijde 23-25 nanga bladzijde 197-201 fu a buku, San Bijbel e leri wi trutru?, di yu e si dyaso.