Teki leri fu Gado Wortu

San Gado abi na prakseri gi grontapu?

Na artikel disi e poti prakseri na sani di yu ben kan aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. San Gado abi na prakseri gi grontapu?

Grontapu na a tanpresi fu libisma. Baka di Gado meki den engel fu libi na hemel, a meki libisma fu nyan bun fu a libi na grontapu (Yob 38:4, 7). Fu dati ede, Yehovah poti a fosi man na ini wan moi paradijs di a kari Eden, èn a gi en nanga den bakapikin fu en di ben musu kon ete, a howpu fu libi fu têgo na grontapu.​—Genesis 2:15-17; leisi Psalm 115:16.

A dyari fu Eden ben de wan pikin pisi nomo fu grontapu. A fosi libisma trowpaar, Adam nanga Eva, ben musu kisi pikin. Te moro nanga moro libisma ben o de, dan den ben musu meki grontapu tron wan paradijs (Genesis 1:28). Grontapu noiti no o kisi pori.​—Leisi Psalm 104:5.

2. Fu san ede grontapu no de wan paradijs now?

Adam nanga Eva ben trangayesi Gado, èn fu dati ede a ben yagi den komoto na ini Eden. Paradijs ben lasi gowe, èn nowan libisma ben man meki en kon bun baka. Bijbel e taki: „A libi grontapu na ini na anu fu den ogri sma.”​—Yob 9:24; leisi Genesis 3:23, 24.

Ma Yehovah no frigiti san a ben abi na prakseri na a bigin gi libisma. Boiti dati, ala san Gado taki a e du (Yesaya 45:18). A o meki libisma kon de baka leki fa a ben wani taki den de.​—Leisi Psalm 37:11.

3. Fa Gado o meki taki vrede de baka na grontapu?

Fu man meki libisma libi na ini vrede, dan Gado musu pori den ogrisma fosi. Na ini a feti fu Armagedon, den engel fu Gado o pori ala den sma di e opo densrefi teige Gado. Den o tai Satan 1000 yari langa, ma sma di lobi Gado o pasa a feti libilibi. Den sma disi o libi na ini wan nyun sistema na grontapu.​—Leisi Openbaring 16:14, 16; 20:1-3; 21:3, 4.

  4. O ten wan kaba o kon na a pina di sma e pina?

Na a ten fu den 1000 yari, Yesus di de na hemel, o tiri grontapu èn a o meki en tron wan paradijs baka. Boiti dati, a o puru a sondu fu den sma di lobi Gado. Sobun, Yesus o tyari wan kaba kon na siki, na a owru di sma e kon owru, èn dede.​—Leisi Yesaya 11:9; 25:8; 33:24; 35:1.

O ten Gado o tyari wan kaba kon na ogridu na grontapu? Yesus ben gi wan „marki” di e sori o ten a kaba de krosibei. A fasi fa sani e waka na grontapu kan meki taki libisma lasi den libi. Boiti dati, den sani disi e sori taki wi e libi now na ini „a kaba fu a grontapu sistema disi”.​—Leisi Mateyus 24:3, 7-14, 21, 22; 2 Timoteyus 3:1-5.

5. Suma o libi na ini Paradijs na ini a ten di e kon?

Yesus ben taigi den bakaman fu en fu meki disipel èn fu leri den na sortu fasi Gado sori lobi (Mateyus 28:19, 20). Na heri grontapu, Yehovah e sreka milyunmilyun sma fu libi na ini wan nyun sistema na grontapu (Sefanya 2:3). Na den Kownukondre zaal fu Yehovah Kotoigi, sma kan leri fa fu de wan moro bun masra, nanga papa, èn fa fu de wan moro bun wefi, nanga mama. Papa nanga mama, makandra nanga den pikin, e leri fu san ede den kan bribi taki wan moro bun ten o kon.​—Leisi Mika 4:1-4.

Na a Kownukondre zaal, yu o miti sma di lobi Gado èn di wani leri fa fu plisi en.​—Leisi Hebrewsma 10:24, 25.

Efu yu wani kon sabi moro, dan luku kapitel 3 fu a buku disi, San Bijbel e leri wi trutru? Yehovah Kotoigi tyari en kon na doro.