San na a bun nyunsu?

„A bun nyunsu disi . . .”​—MATEYUS 24:14.

KRESTEN musu preiki a „bun nyunsu fu a kownukondre”. Den musu fruteri sma taki na ini a ten di e kon a Kownukondre o de a tirimakti di o tiri na wan reti fasi na heri grontapu. Ma Bijbel e gebroiki den wortu „bun nyunsu” na tra fasi tu. Fu eksempre, wi e leisi fu „a bun nyunsu taki [Gado] e frulusu sma” (Psalm 96:2); „a bun nyunsu fu Gado” (Romesma 15:16); nanga „a bun nyunsu fu Yesus Krestes”.​—Markus 1:1.

Fu taki en leti, a bun nyunsu abi fu du nanga ala den tru tori di Yesus ben taki fu den èn di den disipel fu en ben skrifi. Fosi Yesus opo go na hemel a taigi den bakaman fu en: „Fu dati ede, go na sma fu ala kondre èn meki den tron disipel, èn dopu den na ini a nen fu a Tata, fu a Manpikin, èn fu a santa yeye. Leri den fu du ala san mi komanderi unu” (Mateyus 28:19, 20). Sobun, tru Kresten no musu fruteri sma nomo fu a Kownukondre, ma den musu du muiti tu fu meki disipel.

San den kerki e du te a abi fu du nanga a tori disi? Furu sma no e frustan san na a Kownukondre èn den no man leri trawan soifri san na dati. Na presi fu dati den e preiki fu sani nomo di e meki sma firi bun. Den e taki moro furu fu a fasi fa sma kan kisi pardon fu sondu èn den e taki dati sma musu poti bribi na ini Yesus. Den e suku fu hari sma kon na ini den kerki fu di den e pruberi fu du bun gi sma noso fu di den e bow ati-oso, skoro nanga oso gi den pôtiwan. Aladi disi kan meki taki moro sma e go na den kerki, toku den no e meki tru Kresten di e suku fu libi trutru soleki fa Yesus leri sma.

Wan sabiman fu kerkitori e skrifi: „Furu Kresten sabiman noso fesiman sabi taki wi musu meki disipel, èn wi musu leri den fu du ala sani di Yesus taki. . . . A de krin san Yesus e taigi wi fu du. Ma wi no e du san a taki. Wi no e pruberi srefi fu du dati. Èn soleki fa a sori, wi no sabi fa fu du dati.”

Na so wan ondrosuku di ben du na mindri Lomsusma na ini Amerkankondre ben sori taki 95 procent fu den sma feni taki na ini a bribi fu den, den musu preiki a bun nyunsu. Ma pikinmoro alamala ben feni taki a moro bun fasi fu du disi, a no fu taki fu dati, ma fu tyari densrefi na so wan fasi taki den de wan eksempre gi trawan. Wan fu den sma di den ben poti aksi gi, ben taki: „A moro bun fasi fu preiki a no fu taki nomo fu a bun nyunsu, ma san de moro prenspari na fu de wan bun eksempre.” A tijdschrift U.S. Catholic, di ben du na ondrosuku disi, e taki dati furu sma no wani fruteri trawan fu a bribi fu den. Dati de so fu di „a kerki no abi wan bun nen. Na ini a ten di pasa, furu syentori ben kon na doro pe kerki fesiman ben abi seks nanga trawan na wan fasi di no fiti. Boiti dati, difrenti leri fu a kerki e tyari problema kon.”

Na wan tra presi, wan Methodist beskopu ben kragi taki den kerki fu en ben prati èn den sma ben bruya fu di den no ben abi a deki-ati fu du a wroko di den musu du èn den e tyari densrefi na a srefi fasi leki sma na ini a libimakandra di no e go na kerki. A no man frustan fa a sani disi kan èn a aksi: „Suma na trutru den sma di e preiki a bun nyunsu fu a Kownukondre?”

A beskopu no gi piki tapu na aksi fu en. Ma wan piki de tapu na aksi disi. Yu o feni a piki na ini a tra artikel.

[Prenspari pisi na tapu bladzijde 6]

A bun nyunsu abi fu du nanga a Kownukondre fu Gado èn a frulusu di sma kan kisi te den e poti bribi na ini Yesus Krestes