1, 2. San kan de wan tesi gi yonguwan na ini a ten disi èn san den kan du fu tranga a bribi fu den?

WAN leisi wan pikin na skoro taigi wan yongu sisa di e libi na Ingrisikondre: „Yu koni tumusi fu bribi na ini Gado.” Wan brada na Doisrikondre ben skrifi: „Den leriman na skoro feni taki a tori na ini Bijbel di e taki dati Gado meki sani, na wan anansitori. Gi den, ala pikin na skoro musu bribi na ini evolutie.” Wan yongu sisa na Fransikondre ben taki: „Den leriman fu mi skoro e fruwondru taki pikin de ete di e bribi na ini Bijbel.”

² Furu sma e bribi na ini evolutie èn den no e bribi taki wan Mekiman de. Efu yu na wan yonguwan di e dini Yehovah noso efu yu e studeri Bijbel ete, yu feni taki yu musu bribi den sortu sani disi fu di tra sma e bribi den? Efu dati de so, dan luku san yu kan du fu tranga a bribi fu yu. Wán sani di yu kan du na fu gebroiki a frustan di Gado gi yu fu di dati o „de leki wan waktiman gi yu”. A o yepi yu fu no meki den leri fu grontapu pori a bribi fu yu.​—Leisi Odo 2:10-12.

3. San wi o luku na ini na artikel disi?

³ Efu yu wani abi wan tranga bribi, dan yu musu kon sabi Gado bun (1 Tim. 2:4). Dati meki te yu e studeri Gado Wortu  nanga den buku fu wi, yu no musu leisi den frafra. Denki fu san yu e leisi so taki yu man „frustan san a wani taki” (Mat. 13:23). Meki wi go luku fa yu kan studeri, so taki yu man feni furu „krin buweisi” di e sori taki Bijbel na a Wortu fu Gado èn taki na Gado meki ala sani. Disi o tranga a bribi fu yu.​—Hebr. 11:1.

4. Fu san ede wi kan taki dati sma di e horibaka gi na evolutie, abi bribi tu èn san wi alamala musu du?

⁴ Oiti wan sma taigi yu taki a e horibaka gi na evolutie fu di sabiman e leri dati, ma taki a no e bribi na ini Gado fu di a no man si en? Furu sma e denki so. Ma a bun fu hori disi na prakseri: Awinsi wan sma e horibaka gi na evolutie, toku na bribi a e bribi, neleki den sma di e bribi taki wan Gado de. Fa so? We, nowan sma si Gado noso si fa a meki sani (Yoh. 1:18). Èn noiti wan sma, awinsi na wan sabiman, si fa a wan libisani kenki kon tron wan trawan soleki fa na evolutie e leri. Fu eksempre, nowan sma si fa wan sneki noso wan lagadisa kenki kon tron wan lew noso wan olifant (Yob 38:1, 4). Sobun, wi alamala musu ondrosuku den buweisi di de èn wi musu gebroiki wi frustan fu man kon sabi san tru. Dati meki na apostel Paulus ben taki: „Sensi grontapu meki, sma man si krin sortu fasi Gado abi, aladi den no man si en. Te den e luku den sani di a meki, den kan frustan taki a abi têgo krakti èn taki en na Gado trutru. Fu dati ede den no man taki nanga leti dati Gado no de.”​—Rom. 1:20.

5. Sortu sani di wi leki Gado pipel abi, e yepi wi fu gebroiki wi frustan?

⁵ Bijbel e taki dati „fu di wi abi bribi, meki wi kon frustan taki hemel nanga grontapu ben seti di Gado taki so” (Hebr. 11:3). Sobun, bribi meki taki wi kon frustan sani di wi no man si nanga wi ai noso yere nanga wi yesi. Na organisâsi fu Yehovah gi wi furu sani di yepi wi fu ondrosuku sani moro fini. Den sani disi e meki taki wi man bribi taki wan Mekiman de, aladi wi no man si en (Hebr. 11:27). Wan fu den sani di wi kisi na a felem di nen De wonderen van de schepping onthullen Gods heerlijkheid. Boiti dati, wi  abi den brochure Is het leven geschapen? nanga Vijf belangrijke vragen over het ontstaan van het leven, èn a buku Is er een Schepper die om u geeft? Wi e leri moi sani tu na ini den tijdschrift fu wi. Nofo tron na Ontwaakt! abi interview nanga sabiman nanga tra sma di fruteri fu san ede den kon bribi now na ini Gado. Yu abi den artikel di nen „Toeval of ontwerp?” di e taki fu meti nanga tra moi sani di Gado meki. Den artikel disi e sori fa sabiman pruberi fu meki sani di e wroko leki den sani di Gado meki.

6. Fu san ede a bun fu gebroiki den sani di wi kisi èn sortu wini yu kisi fu disi?

⁶ Wan brada fu Amerkankondre di abi 19 yari, e taki fu den tu brochure disi: „Den brochure yepi mi bun furu. Mi studeri den omeni leisi.” Wan sisa fu Fransikondre ben skrifi: „Mi lobi den artikel ’Toeval of ontwerp?’ Den e sori taki den moro koni sabiman kan pruberi fu meki son sani di e wroko leki den sani di Gado meki, ma noiti a o man de a srefi.” A papa nanga mama fu wan meisje na Zuid-Afrika di abi 15 yari, e taki: „A fosi sani di a meisje fu wi e leisi na ini Ontwaakt! na den ’Interview’-artikel.” Fa a de nanga yu? Yu e leisi den artikel disi tu? Den o yepi yu fu si taki wan Mekiman de èn fu no bribi sma di e kon nanga falsi leri. A bribi fu yu o kon de leki wan bon di rutu dipi èn di e tanapu kánkan te hebi winti e wai.​—Yer. 17:5-8.

7. Fu san ede Gado wani taki yu gebroiki yu frustan?

⁷ A fowtu fu aksi efu den sani di skrifi na ini Bijbel tru? Nôno! Yehovah wani taki yu gebroiki a „frustan” di a gi wi fu si efu den sani di yu e leri de so trutru. A no wani taki yu e bribi wan sani soso fu di tra sma e bribi dati. Sobun, gebroiki yu frustan fu kon sabi sani moro fini. Dati o yepi yu fu meki yu bribi kon tranga. (Leisi Romesma 12:1, 2; 1 Timoteyus 2:4.) Wan fasi fa yu kan du dati na te yu e poti ten na wan sei fu studeri son tori na ini Bijbel moro fini.

8, 9. (a) Sortu tori na ini Bijbel yu kan studeri? (b) Sortu wini son sma kisi di den denki dipi fu den sani di den studeri?

⁸ Son sma e studeri Bijbel profeititori, noso den e luku fa den sani fu historiaman nanga sabiman e sori taki san skrifi na ini Bijbel tru. Wan moi profeititori di yu kan luku na Genesis 3:15. A vers disi e taki fu a moro prenspari tori na ini Bijbel. A tori disi e sori fa Gado o gebroiki a Kownukondre fu meki en nen kon santa èn fu sori taki na en abi a reti fu de wi Tiriman. A tekst disi di e taki sani na agersi fasi e sori fa Yehovah o puru ala pina di libisma e pina sensi a ten fu Eden. Fa yu kan studeri Genesis 3:15? We, yu kan meki wan lijst fu prenspari Bijbeltekst di e sori suma Gado ben o gebroiki fu meki a profeititori disi kon tru èn sortu sani a seti fu meki disi pasa. Te yu si san ibriwan fu den tekst disi e tyari kon na krin fu Genesis 3:15, dan yu o kon frustan taki na „a santa yeye ben e sori den” profeiti nanga den skrifiman fu Bijbel san den musu skrifi.​—2 Petr. 1:21.

⁹ Wan brada na ini Doisrikondre ben skrifi: „Ala den buku fu Bijbel e taki sani di abi fu du nanga a Kownukondre. Disi de so, aladi na sowan 40 man skrifi a Bijbel. Furu fu den ben e libi na ini difrenti ten èn den no ben sabi makandra.” Wan sisa fu Australia ben lobi wan studie-artikel na ini A Waktitoren fu 15 december 2013 di ben e taki fu a Paskafesa èn san a abi fu du nanga Genesis 3:15 nanga a Mesias. A sisa disi skrifi: „A studie dati  opo mi ai. A yepi mi fu kon si taki Yehovah na wan bigi Gado. A naki mi ati di mi kon frustan taki na so wan moi sani a seti gi den Israelsma èn taki a sorgu taki ala sani fu a fesa disi kon tru na ini Yesus. Mi ben musu fu sidon prakseri sortu moi sani ben pasa na a Paskafesa dati èn fa den sani disi kon tru.” Fu san ede a sisa ben e firi so? A denki dipi fu san a leisi èn a ben kon „frustan san a wani taki”. Disi tranga en bribi èn a kon moro krosibei na Yehovah.​—Mat. 13:23.

10. Fa a e tranga wi bribi te wi e si taki den skrifiman fu Bijbel ben de eerlijk?

¹⁰ Wan tra sani di kan tranga wi bribi na te wi e luku fa den man di skrifi Bijbel ben abi deki-ati èn fa den ben de eerlijk. Furu skrifiman fu owruten ben skrifi sani fu kori den tiriman fu den èn den ben meki bigi gi den kownukondre fu den. Ma den profeiti fu Yehovah ben taki san tru ala ten. Den no ben frede fu taki sortu fowtu a pipel fu den ben meki, noso srefi a kownu fu den (2 Kron. 16:9, 10; 24:18-22). Den ben taki krin fu den eigi fowtu èn fu den fowtu fu tra futuboi fu Gado (2 Sam. 12:1-14; Mark. 14:50). Wan yongu brada fu Ingrisikondre ben taki: „Yu no e miti furu sma di eerlijk so. Disi e sori wi krin taki Bijbel trutru na a buku fu Yehovah.”

11. Fa yongusma kan kisi moro warderi gi den rai fu Bijbel?

¹¹ Fu di Bijbel abi bun rai, meki furu sma kan si krin taki den sani di skrifi na ini kon fu Gado. (Leisi Psalm 19:7-11.) Wan yongu sisa na ini Yapan ben skrifi: „Wi ben de trutru koloku di wi osofamiri bigin du san Bijbel e leri. Ala sani ben e go bun, trobi no ben de èn wi ben lobi makandra.” Den rai fu Bijbel e yepi wi fu no go dini falsi gado èn fu no hori wisrefi na son gwenti di sma abi fu di den frede taki ogri kan miti den (Ps. 115:3-8). San den leri di e taki dati Gado no de, e du nanga sma? Fu eksempre, na evolutie-leri e meki sma si sani soleki bon nanga meti leki wan sortu gado di abi a krakti di Yehovah wawan abi. Den sma di e taki dati Gado no de, e bribi taki na libisma srefi musu bepaal fa sani o waka na ini a ten di e kon. Ma te wi e luku san den e du, dan wi e si taki den no man lusu den problema fu grontapu.​—Ps. 146:3, 4.

12, 13. Te yu e taki nanga pikin fu skoro, nanga leriman noso nanga tra sma, dan fa yu kan taki fu Bijbel èn sori den taki na Gado meki sani?

¹² Fa yu kan taki nanga sma fu Bijbel èn fa yu kan sori den taki na Gado meki sani? We, no denki wantewante taki yu sabi san tra sma e denki fu a tori disi. Son sma e taki dati den e bribi na ini na evolutie, ma den e bribi tu taki Gado de. Den e denki taki Gado meki den difrenti libisani nanga yepi fu evolutie. Trawan e taki dati den e bribi na ini evolutie fu di den feni taki efu a no ben tru, den no ben o leri en na skoro. Son sma no e bribi na ini Gado moro fu di den si sortu ogri kerki du. Sobun, te yu wani sori wan sma fa a libi du kon, dan a bun fu poti aksi fosi so taki yu kan kon sabi san a e bribi. Te yu e teki yu ten fu arki a sma, dan kande a o wani arki yu tu.​—Tit. 3:2.

¹³ Efu wan sma e taigi yu krin taki a no e bribi taki wan gado meki ala sani, dan no hari taki nanga en. Kande yu kan aksi en na wan switi fasi fu fruteri yu fa en denki taki a libi ben kan bigin sondro wan Mekiman. Yu kan taigi en taki efu wan libisani, soleki wan cel, kon de nanga yepi fu evolutie, dan toku wan sani ben de fanowdu fu sorgu taki moro fu a cel disi meki. Wan professor ben taki sortu  sani ben o de fanowdu: (1) Wan buba fu kibri a cel, (2) a cel musu man kisi èn meki energie, (3) DNA pe ala sani fu a cel skrifi (4) a cel musu man gi a DNA disi abra na den tra cel. A professor taki moro fara: „A moro pikin libisani srefi, meki na so wan koni fasi taki a e fruwondru sma.” Sobun, fa sma kan taki dati na evolutie meki taki libi kon de?

14. San yu kan du efu yu feni en muilek fu taki nanga sma fu evolutie noso fu sori den taki na Gado meki ala sani?

¹⁴ Efu yu no sreka yusrefi so fu taki fu evolutie nanga sma noso fu sori den taki na Gado meki ala sani, dan yu kan pruberi fu gebroiki a makriki eksempre di Paulus gi. A ben skrifi: „Ibri oso abi wan sma di meki en, ma a sma di meki ala sani na Gado” (Hebr. 3:4). Wi alamala sabi taki na sma e bow oso. Dan fa a de nanga den libisani di meki na so wan kefalek fasi? A musu fu de taki na wan koni sma meki den. Kande yu kan gebroiki wan fu den buku fu wi tu. Di wan sisa taki nanga wan yongu man di no ben e bribi taki Gado de, ma di ben horibaka gi na evolutie, a gebroiki den tu brochure di wi ben taki fu den. Wán wiki baka dati, a yongu man taki: „Now fosi mi e bribi na ini Gado.” Ne a bigin studeri Bijbel èn a tron wan brada fu wi.

15, 16. Fa yu kan taki nanga wan sma di e tweifri efu san Bijbel e taki tru èn san yu musu hori na prakseri?

¹⁵ Na a srefi sani yu kan du te yu e taki nanga wan sma di e tweifri efu san Bijbel e taki tru. Pruberi fu kon sabi san a e bribi trutru èn fu sortu tori a lobi taki (Odo 18:13). Efu a lobi taki fu sani di sabiman kon si, dan kande a o wani arki te yu e sori en taki Bijbel e kruderi nanga sani di sabiman kon si. Efu wan sma lobi taki fu a historia, dan yu kan taki fu wan sani di ben pasa fositen èn sori en fa Bijbel ben taki omeni yari na fesi fu a sani disi. Noso kande yu kan taki fu den rai na ini Bijbel soleki den sani di Yesus taki na ini a Bergitaki fu en.

¹⁶ Hori na prakseri taki yu no e go fu haritaki nanga sma, ma yu wani doro den ati. Sobun, meki muiti fu arki bun san den abi fu taki. Poti bun aksi, sori switifasi èn taki nanga lespeki, spesrutu te yu e taki nanga bigisma. Dan kande den o wani arki yu nanga lespeki tu. Boiti dati, den o si taki yu denki bun fu den sani di yu e bribi. Furu yongusma na ini a ten disi no e du dati. Ma hori na prakseri taki yu no abi fu piki den sma di e suku nomo fu haritaki nanga yu noso di wani meki spotu nanga yu.​—Odo 26:4.

17, 18. (a) San kan yepi yu fu meki den leri fu Bijbel doro yu ati? (b) Sortu aksi wi o luku na ini a tra artikel?

¹⁷ A no fu di yu sabi wan tu sani fu Bijbel, meki yu o kon abi wan tranga bribi. Yu musu diki moro dipi na ini Gado Wortu, neleki yu e suku gudu di kibri (Odo 2:3-6). Gebroiki den tra sani di de fu kisi na ini Sranantongo, soleki a Watchtower Library na tapu DVD noso Ondrosuku Bijbel moro fini​—Gi Yehovah Kotoigi. Pruberi fu leisi a heri Bijbel tu. Kande yu kan pruberi fu du dati na ini 12 mun. Nowan tra sani kan tranga yu bribi so, leki te yu e leisi Bijbel. Wan kring-opziener di prakseri a ten di a ben yongu, ben taki: „Wan sani di yepi mi fu kon si taki Bijbel na a Wortu fu Gado na di mi leisi en. Na so mi kon frustan den Bijbel tori di mi leri di mi ben yongu. Disi yepi mi fu go na fesi èn tron wan lepi Kresten.”

¹⁸ Papa nanga mama, un kan du furu fu yepi un pikin fu tron lepi Kresten. Fa un kan yepi den fu kon abi wan tranga bribi? A tra artikel o taki fu a tori disi.