1, 2. Fu san ede wi o luku den eksempre fu fo kownu fu Yuda?

EFU yu e si taki wan sma e grati fadon tapu wan pasi, dan yu no ben o luku bun te yu e waka tapu a srefi pasi dati? Te wi e luku den fowtu di trawan meki, dan disi kan yepi wi fu no meki den srefi fowtu dati. Na so a de tu nanga na anbegi fu wi. Wi kan leri furu sani fu den fowtu fu trawan, sosrefi fu den wan di skrifi na ini Bijbel.

² Soleki fa wi si na ini na artikel na fesi, dan den fo kownu fu Yuda ben e anbegi Yehovah nanga den heri ati. Ma toku den ben meki wan tu seryusu fowtu. San wi kan leri fu den ondrofeni fu den èn fa wi kan sorgu taki wi no e meki den srefi fowtu leki den? Te wi e denki dipi fu den eksempre disi, dan dati kan yepi wi fu kisi wini fu den sani di ben skrifi fositen.—Leisi Romesma 15:4.

3-5. (a) Aladi Asa ben e anbegi Yehovah nanga en heri ati, sortu fowtu a meki? (b) San ben kan meki taki Asa frutrow tapu libisma di Bayesa ben seti sani fu kon feti nanga Yuda?

³ Meki wi luku na eksempre fu Asa fosi, fu si fa Gado Wortu kan abi krakti tapu wi libi. Asa frutrow tapu Yehovah di  wán milyun Etiopia srudati kon feti nanga Yuda. Ma a no du dati di Bayesa, a kownu fu Israel bigin bow bigi skotu gi a foto Rama di ben de krosibei fu Yuda (2 Kron. 16:1-3). Disi leisi Asa frutrow tapu en eigi koni èn a pai Kownu Ben-Hadad fu Siria tyuku fu go feti nanga Bayesa. Asa ben abi bun bakapisi? Bijbel e taki: „Di Bayesa yere san pasa, dan wantewante a libi den bigi skotu fu Rama. A no bow den go doro. Na so a wroko fu en kon tapu” (2 Kron. 16:5). Te yu e luku en so, dan a gersi leki Asa ben abi bun bakapisi.

⁴ Ma fa Yehovah ben si a sani di Asa du? Gado seni en profeiti Hanani fu piri-ai gi Asa fu di a no ben frutrow tapu Yehovah. (Leisi 2 Kroniki 16:7-9.) Hanani ben taki: „Tra kondre o opo kon feti nanga yu now.” Bayesa gowe libi a foto Rama, ma Asa nanga a pipel fu en ben musu feti nanga tra kondre furu yari langa.

⁵ Na artikel na fesi ben sori taki Gado ben ondrosuku Asa en ati èn a si taki Asa ben e anbegi en nanga en heri ati (1 Kow. 15:14). Gi Gado, na anbegi fu Asa ben bun, fu di a ben gwenti du san Gado ben e aksi fu en. Toku Asa ben musu libi nanga den takru bakapisi fu a fowtu di a ben meki. Te wi e luku a tori fu Bayesa, dan san meki taki Asa frutrow tapu Ben-Hadad èn tapu ensrefi, na presi fu frutrow tapu Yehovah? Kande a ben denki taki a ben o wini a feti te a ben e wroko makandra nanga wan tra kondre. Kande a bigin denki so fu di a ben kisi rai di no bun.

6. San wi kan leri fu a fowtu di Asa meki? Fruklari dati.

⁶ San a tori fu Asa e leri wi? Te wi abi bigi problema, dan wi e frustan wantewante taki wi musu frutrow tapu Yehovah. Ma san wi e du nanga den pikinpikin problema di wi e kisi ibri dei? Wi e lusu den problema dati soleki fa wi srefi wani? Noso wi e luku sortu rai Bijbel e gi na ini den sortu situwâsi dati èn wi e pruberi fu fiti den rai dati? Te wi e du dati, dan wi e sori taki wi e frutrow tapu Yehovah. Fu eksempre, kande yu famiri e tapu pasi gi yu son leisi fu go na den konmakandra noso na wan kongres. Yu e aksi Yehovah fu yepi yu fu kon frustan san na a moro bun sani fu du na ini a situwâsi dati? Noso, san yu o du te yu lasi yu wroko èn yu no man feni wan trawan? Te yu e taki nanga wan sma di man gi yu wan wroko, dan yu o frede fu taigi en taki yu abi konmakandra ibri wiki? Awansi sortu problema e miti wi, a bun te wi e hori a sani disi na prakseri di a psalm skrifiman ben taki: „Meki Yehovah tiri yu libi, frutrow tapu en, dan ensrefi o yepi yu.”—Ps. 37:5.

7, 8. Sortu fowtu Yosafat ben meki èn san ben de a bakapisi? (Luku a prenki na a bigin fu na artikel.)

⁷ Fa a ben de nanga Yosafat, a manpikin fu Asa? A ben abi furu moi fasi. Fu di Yosafat ben e frutrow tapu Gado, meki a ben e du furu bun sani. Toku a ben teki wan tu don bosroiti tu. Fu eksempre, a meki a manpikin fu en trow nanga wan umapikin fu na ogri-ati Kownu Akab fu a noordsei kownukondre. Aladi a profeiti Mikaya ben warskow Yosafat, toku a go yepi Akab di a ben e feti nanga den Siriasma. Pikinmoro Yosafat lasi en libi na ini a feti dati. Baka dati, a drai go baka na Yerusalem (2 Kron. 18:1-32). Di a doro drape, dan a profeiti Yehu aksi en: „Fu san ede yu e yepi den ogriwan? Fu san  ede yu lobi den sma di no lobi Yehovah?”—Leisi 2 Kroniki 19:1-3.

⁸ Yosafat ben leri wan sani fu na ondrofeni dati? Aladi a ben lobi Yehovah èn a ben wani du ete san a feni bun, toku a no sori taki a ben leri fu a sani di a ben ondrofeni nanga Akab. Yosafat teki ete wan don bosroiti. Disi leisi a go wroko makandra nanga wan feanti fu Gado, na ogri-ati Kownu Ahasia di ben de wan manpikin fu Akab. Yosafat nanga Ahasia wroko makandra fu bow sipi. Ma den sipi disi kon broko èn den no ben man gebroiki den moro fu du san den ben abi na prakseri.—2 Kron. 20:35-37.

9. San kan pasa te wi e moksi tumusi nanga sma di no e anbegi Gado?

⁹ Te wi e leisi den tori fu Yosafat, dan dati musu gi wi deki-ati fu ondrosuku wi eigi libi. Fa so? We, te yu luku en bun, dan Yosafat ben de wan bun kownu. A du san bun èn a „ben e dini Yehovah nanga en heri ati” (2 Kron. 22:9). Toku a ondrofeni sortu takru bakapisi a abi te yu e moksi nanga sma di no lobi Gado. Memre na odo disi: „Te wan sma e waka nanga koniwan, dan ensrefi o kon koni, ma te wan sma e waka nanga don sma, dan sani no o waka bun gi en” (Odo 13:20). Ma kande wi e pruberi fu yepi wan sma di wani kon sabi moro fu Gado. Toku wi e si taki Yosafat misi fu dede di a ben e moksi tumusi nanga Akab. Na so a de tu taki te wi e moksi tumusi nanga sma di no e dini Yehovah, dan dati kan tyari problema kon gi wi.

10. (a) Efu wi wani trow, dan san wi kan leri fu Yosafat? (b) San wi musu hori na prakseri te wi e moksi nanga sma di no lobi Gado?

¹⁰ San wi kan leri fu na ondrofenitori fu Yosafat? Kande wan Kresten e bigin kisi lobi firi gi wan sma di no lobi Yehovah. Kande a Kresten disi e denki taki a no man feni wan bun patna na mindri a pipel fu Gado. Noso, kande wan Kresten brada noso sisa abi famiriman di no de na bribi èn di e dwengi en fu trow fosi a lati tumusi. A kan tu taki son Kresten e denki leki a sisa disi di ben taki: „Ala sma abi lobi nanga mati fanowdu.” San wan  Kresten musu du? Wi kan leri wan sani te wi e denki dipi fu den sani di miti Yosafat. A ben gwenti suku rai na Gado (2 Kron. 18:4-6). Ma san pasa di Yosafat bigin moksi nanga Akab di no ben lobi Yehovah? Fu taki en leti, Yosafat ben musu hori na prakseri taki Yehovah e suku den sma di e anbegi en nanga den heri ati. Na ini a ten disi sosrefi, den ai fu Gado e „luku heri grontapu fu si san e pasa” èn a de klariklari fu „sori a krakti fu en” fu yepi wi (2 Kron. 16:9). A e frustan san na a situwâsi fu wi èn a lobi wi. Fa a de nanga yu? Yu e bribi taki Gado sabi taki yu e suku wan trowpatna èn taki a wani yepi yu fu feni wan? Yu kan abi a frutrow taki a o du dati tu!

11, 12. (a) Fa Heskia sori san ben de na ini en ati? (b) Fu san ede Gado no puru atibron tapu Heskia?

¹¹ A tori fu Heskia e leri wi taki wi musu luku bun nanga wi ati. Wán leisi, Gado di e ondrosuku sma ati tyari kon na krin san ben de na ini Heskia en ati. (Leisi 2 Kroniki 32:31.) Di Heskia kon siki, dan Gado sori en fa a ben kan sabi taki a ben o kon betre baka. Yehovah ben o meki wan skaduw skoifi go na baka. Soleki fa a sori, dan den granman fu Babilon seni boskopuman go na Heskia fu di den ben wani sabi moro fu a tori disi (2 Kow. 20:8-13; 2 Kron. 32:24). Bijbel e taki dati Gado „gowe libi” Heskia, so taki a ben kan si san ben de na ini en ati. Di dati pasa, dan Heskia sori den Babilonsma „ala sani di ben de na ini na oso pe a ben e kibri den gudu fu en”. A don sani disi di Heskia du, meki taki Yehovah kon sabi ’san ben de na ini en ati’.

¹² Bijbel no e sori fa a du kon taki Heskia kisi heimemre. Kande na fu di a ben wini den Asiriasma, noso fu di Gado ben dresi en na wan wondru fasi. A kan tu taki na fu di a „kon gudu èn a kisi bigi glori”. Awansi fa a no fa, Heskia ben kisi heimemre èn fu dati ede a „no ben de nanga tangi moro fu den bun di Gado ben du gi en”. Dati na wan sari sani! Aladi a tru taki Heskia ben dini Gado nanga en heri ati, toku wan pisi ten a du sani di Gado no ben feni bun. Bakaten, „Heskia kenki a bigifasi fu en”, so taki Gado no puru atibron tapu en nanga a pipel fu en.—2 Kron. 32:25-27; Ps. 138:6.

13, 14. (a) O ten Yehovah kan ’gowe libi wi fu tesi wi’? (b) San wi musu du te sma e prèise wi?

¹³ Fa wi e kisi wini te wi e leisi a tori fu Heskia èn te wi e denki dipi fu en? No frigiti taki Heskia kisi heimemre syatu baka di Yehovah wini Sanherib èn a dresi Heskia fu a takru siki fu en. Wi kan kisi heimemre tu te sma e prèise wi gi wan prenspari sani di wi du. San wi o du efu Yehovah e ’gowe libi wi fu tesi wi’, fu man si san de na ini wi ati? Fu eksempre, kande wan brada teki en ten fu sreka wan lezing di a hori na wan bigi konmakandra. Furu sma e prèise en fu di a hori a lezing. San a o du?

¹⁴ Te sma e prèise wi, dan a bun fu du san Yesus ben taki: „Te unu du ala san unu kisi fu du, dan un musu taki: ’Wi na srafu di no warti noti. Wi du san wi ben musu du’” (Luk. 17:10). Wi kan leri ete wan sani fu na ondrofeni fu Heskia. A ben de krin taki a ben abi heimemre fu di a „no ben de nanga tangi moro fu den bun di Gado ben du gi en”. Te wi e prakseri o furu Gado du gi wi, dan dati o yepi wi fu no kisi fasi di Yehovah no lobi kwetikweti. Wi kan taki fu den bun sani di Yehovah du gi wi. A gi wi den Santa Buku fu Bijbel èn en santa yeye di e yepi a pipel fu en.

15, 16. Fa a du kon taki Yosia lasi en libi?

¹⁵ San wi e leri te wi e luku san pasa nanga a bun Kownu Yosia? Meki wi luku san meki taki a lasi a strei èn dede. (Leisi 2 Kroniki 35:20-22.) Yosia „hari go feti nanga” Kownu Neikow fu Egepte, aladi a kownu dati ben taigi en taki a no ben kon feti nanga en. Bijbel e taki dati na ’Gado ben meki Neikow taki’ den sani dati. Dan fu san ede Yosia go feti nanga en? Bijbel no e taki dati.

¹⁶ Ma fa Yosia ben kan sabi taki a sani di Neikow ben taki ben komoto fu Yehovah? We, a ben kan aksi Yeremia, wan fu den profeiti fu Yehovah (2 Kron. 35:23, 25). Ma Bijbel no e taki efu a du dati. Boiti dati, Neikow ben e go na Karkemis. A ben e hari go feti „nanga wan tra kondre”, a no ben e go feti nanga Yerusalem. Wan tra sani, na taki a feti no ben abi noti fu du nanga a nen fu Gado, fu di Neikow no ben e spotu Yehovah noso a pipel fu Yehovah. Sobun, na wan don bosroiti Yosia ben teki fu go feti nanga Neikow. San wi kan leri fu a tori disi? Te wi abi wan problema, dan a bun fu luku san Yehovah wani taki wi du.

17. Te wi abi wan problema, dan fa wi kan sorgu taki wi no e meki wan srefi sortu fowtu leki a wan di Yosia meki?

¹⁷ Te wan problema opo kon, dan wi musu luku sortu rai Bijbel e gi na ini a tori dati èn wi musu fiti den rai dati na a yoisti fasi. Son leisi, a bun fu suku rai na den owruman. Kande wi luku san wi sabi kaba fu a tori èn kande wi ondrosuku sani moro fini na ini den buku fu wi. Ma kande Bijbel e sori taki moro sani de di wi musu hori na prakseri èn wan owruman kan yepi wi fu frustan den sani dati moro krin. Fu eksempre, wan sisa sabi taki a abi a frantwortu fu preiki a bun nyunsu (Tori 4:20). Ma kande a wani go na ini a preikiwroko wan dei èn a masra fu en di no de na bribi, wani taki a tan na oso. A masra e taigi en taki den no ben abi so furu ten gi makandra den dei di pasa èn taki a wani du wan sani makandra nanga en. Kande a sisa e prakseri wan tu Bijbeltekst di abi fu du nanga a situwâsi disi. A kan taki a e prakseri den tekst di e taki dati a musu gi yesi na Gado èn taki a abi a frantwortu fu meki disipel (Mat. 28:19, 20; Tori 5:29). Ma a musu hori na prakseri tu taki a musu saka ensrefi na ondro en masra èn taki a musu fiti ensrefi (Ef. 5:22-24; Fil. 4:5). A de so taki en masra no wani taki a e teki prati na a preikiwroko srefisrefi, noso na fu a wán dei dati nomo a wani taki a du wan tra sani? Wi musu luku san na a yoisti sani fu du te wi e pruberi fu gi yesi na Gado èn fu abi wan bun konsensi.

18. Fa yu kan kisi wini te yu e luku den tori fu den fo kownu di wi luku na ini na artikel disi?

¹⁸ Fu di wi abi sondu, meki wi kan meki den fowtu tu di den fo kownu fu Yuda ben meki. Fu eksempre: (1) Kande wi e frutrow na tapu a koni fu libisma, (2) kande wi e moksi nanga sma di no lobi Yehovah (3) kande wi e kisi heimemre, noso (4) kande wi e teki bosroiti sondro fu luku san na a wani fu Gado. Wi breiti taki Yehovah e si bun na ini wi, neleki fa a si bun na ini den fo kownu! Yehovah e si tu o furu lobi wi abi gi en èn fa wi e angri fu dini en nanga wi heri ati. Dati meki a gi wi eksempre di de leki wan warskow gi wi, so taki wi no meki seryusu fowtu. Meki wi denki dipi fu den Bijbel tori disi èn meki wi de nanga tangi taki Yehovah poti den tori dati na ini Bijbel gi wi.