Ondrofenitori

Wi abi a fasti bosroiti fu dini Yehovah

SOLEKI FA RAIMO KUOKKANEN FRUTERI

Na ini 1939, a di fu Tu Grontapufeti bigin na ini Europa, èn a Sovyet-Unie ben kon feti teige Fensikondre, a kondre pe mi gebore. Mi papa ben gowe libi oso fu go na ini a legre fu Fensikondre. Heri esi, den opolani fu a legre fu Rosiakondre ben e lusu bom na tapu a foto pe wi ben e tan, èn mi mama seni mi fu go libi nanga mi granmama pe feti no ben de.

NA INI 1971, mi ben e dini leki zendeling na ini Uganda, wan kondre fu Owstu-Afrika. Wan dei di mi ben e preiki oso fu oso, wan bigi grupu sma lon pasa mi fu di den ben frede fu wan sani. Mi ben yere sma e sutu nanga gon, ne mi bigin lon go na a sei fu mi oso. Di mi yere taki den sma di ben e sutu nanga gon ben kon moro krosibei, dan mi dyompo go na ini wan gotro di ben de na seipasi. Mi kroipi go na oso, aladi kugru ben e frei pasa mi ede.

Mi no ben man wai pasi gi den takru bakapisi fu a di fu Tu Grontapufeti, ma fu san ede mi nanga mi wefi go na Owstu-Afrika aladi wi ben kan lasi wi libi? A piki tapu na aksi disi abi furu fu du nanga a fasti bosroiti di wi abi fu dini Yehovah.

A fosi tron di mi kisi a deki-ati fu teki a fasti bosroiti fu dini Gado

Mi gebore na ini 1934 na ini Helsinki, wan foto fu Fensikondre. Mi papa ben de wan ferfiman, èn wan dei a ben musu go ferfi a bijkantoro fu Yehovah Kotoigi na ini Fensikondre. Den Kotoigi ben fruteri en fu den gemeente konmakandra di  den ben hori. Di a doro oso, a fruteri mi mama fu den konmakandra dati. Mi mama no ben go na den konmakandra na a ten dati, ma bakaten a bigin taki fu Bijbel tori nanga wan Kotoigi di ben e wroko makandra nanga en. Heri esi mi mama bigin du san a ben e leri, èn na ini 1940 a teki dopu leki wan Kotoigi fu Yehovah.

Syatu bifo mi mama teki dopu, mi go libi nanga mi granmama di ben e tan na wan boitipresi. Mi tan drape teleki a di fu Tu Grontapufeti kaba. Mi mama, di ben e tan na Helsinki, bigin seni brifi gi mi granmama èn gi mi tanta. Na ini den brifi disi a ben e fruteri den fu den sani di Yehovah Kotoigi e bribi. Den ala tu ben lobi san den ben e leri, èn den ben e taki nanga mi fu den sani dati tu. Opziener fu Yehovah Kotoigi di e go na difrenti gemeente, ben e fisiti mi granmama na oso èn den ben e gi wi deki-ati, ma mi no ben teki a fasti bosroiti ete fu dini Gado.

Mi bigin kisi leri di yepi mi fu dini Gado

Di a feti kaba na ini 1945, mi drai go baka na Helsinki, èn mi mama bigin tyari mi go na den konmakandra fu Yehovah Kotoigi. Son leisi mi ben e go luku kino, na presi fu go na den konmakandra. Ma mi mama ben e fruteri mi fu den publikitaki di a yere na den konmakandra, èn ibri tron baka a ben sori mi krin: Armagedon de krosibei srefisrefi. Te fu kaba mi kon bribi taki a sani dati tru, èn mi bigin go na ala den konmakandra. O moro mi kon frustan den tru tori fu Bijbel, o moro mi ben e angri fu teki prati na ala den sani di a gemeente ben seti.

Mi ben lobi spesrutu den bigi konmakandra. Na ini 1948, mi go na a distrikt kongres di ben hori na ini a birti pe mi granmama ben e tan. Na a ten dati, mi ben go tan nanga en fu di mi ben abi fakansi. Wan mati fu mi ben o teki dopu na a kongres dati, èn a ben aksi mi efu mi no wani teki dopu tu. Mi taigi en taki mi no ben tyari swen-bruku kon, ma a taki dati mi ben kan gebroiki a di fu en, baka te a dopu. Mi ben feni dati bun èn mi teki dopu tapu 27 yuni 1948 di mi ben abi 13 yari.

Baka a kongres, wan tu mati fu mi mama taigi en taki mi dopu. A tra leisi di mi miti nanga mi mama, a aksi mi fu san ede mi teki so wan prenspari bosroiti sondro fu taki nanga en fosi. Mi fruteri en taki mi ben frustan den prenspari leri fu Bijbel èn taki mi ben sabi taki mi ben o abi fu gi frantwortu na Yehovah fu a fasi fa mi e tyari misrefi.

Mi e kisi wan moro fasti bosroiti

Den brada na ini a gemeente yepi mi fu kisi wan moro fasti bosroiti fu dini Yehovah. Den ben e wroko makandra nanga mi na ini na oso-fu-oso preikiwroko èn pikinmoro ibri wiki den ben gi mi difrenti prati fu hori na den konmakandra (Tori fu den Apostel 20:20). Di mi ben abi 16 yari, mi hori mi fosi publikitaki. Heri esi baka dati, den poti mi na wroko leki Bijbelstudie dinari na ini a gemeente fu wi. Ala den sani disi di mi ben e du na ini a diniwroko fu Yehovah, yepi mi fu tron wan lepi brada. Ma mi ben frede gi sma, èn mi ben musu basi a firi dati ete.

A pisi ten dati, wi ben e gebroiki bigi pisi karton fu meki a publikitaki fu a kongres bekènti. Na tapu den karton disi, wi ben skrifi sani di abi fu du nanga a publikitaki, èn den karton disi ben anga nanga titei abra wi skowru, so taki wan pisi ben anga na wi baka èn wan tra pisi ben anga na fesisei.

Wan leisi, mi ben tanapu na tapu wan uku fu wan strati nanga den tu pisi karton na mi skin. Ne mi si wan grupu pikin fu mi klas e waka kon leti pe mi ben de. A fasi fa den ben e luku mi di den waka pasa, ben frede mi. Mi begi Yehovah fu gi mi deki-ati, èn mi tan tanapu na wán presi nanga den karton. Na a ten dati, mi leri fu basi a frede di mi ben e frede gi sma, èn dati ben yepi mi fu pasa wan moro bigi tesi. Mi ben o abi fu weigri fu no teki prati na orloku.

Bakaten, granlanti kari mi nanga wan tu tra yongu Kotoigi fu go na ini legre. Wi go na a legrekampu soleki fa den komanderi wi, ma na wan lespeki fasi wi taigi den taki wi no ben o go na ini a legre. Den ofsiri hori wi na a kampu, èn syatu baka dati, wan krutubangi seni wi go na strafu-oso gi siksi mun. Boiti dati, wi ben musu koti strafu gi den aiti mun di wi ben o abi fu go na ini a legre. Sobun, ala nanga ala wi tan 14 mun na ini strafu-oso fu di wi no ben wani go na ini a legre.

 Ibri dei wi ben miti na ini den strafu-oso kamra fu poti prakseri na Bijbel. Na ini den mun dati, furu fu wi leisi a heri Bijbel tu tron. Di den 14 mun pasa, furu fu wi komoto na strafu-oso nanga wan moro fasti bosroiti fu dini Yehovah. Te na a dei fu tide, furu fu a grupu yongu Kotoigi dati e dini Yehovah na wan getrow fasi ete.

Baka di mi komoto na strafu-oso, mi go libi baka nanga mi papa nanga mi mama. Syatu baka dati, mi kon leri sabi Veera, wan fayafaya Kotoigi di no ben dopu langa ete. Wi trow na ini a yari 1957.

Wan mofoneti, wan sani pasa di kenki wi libi

Wan mofoneti, di wi go luku wan tu fu den brada di ben teki fesi na a bijkantoro, wan fu den brada aksi wi efu wi ben wani go na ini a kringwroko. Baka di mi begi heri neti, mi bel a bijkantoro èn mi piki den taki wi ben wani go. Fu man go na ini a furuten diniwroko, mi ben musu libi a wroko pe mi ben kisi bun pai, ma wi ben abi a fasti bosroiti fu poti a Kownukondre na a fosi presi ini wi libi. Di mi bigin nanga a kringwroko na ini december 1957, mi ben abi 23 yari èn Veera ben abi 19 yari. Dri yari langa wi ben fisiti den gemeente fu a pipel fu Yehovah na ini Fensikondre, èn wi ben prisiri fu gi den deki-ati.

Na a kaba fu a yari 1960, mi kisi wan kari fu go na a Waktitoren Bijbelskoro Gilead na ini Brooklyn, New York. Dri brada fu Fensikondre ben go fu leri fa sani musu waka na wan bijkantoro, èn a skoro ben teki tin mun langa. Den wefi fu wi no ben go nanga wi, ma den tan na ini Fensikondre fu wroko na a bijkantoro.

Syatu bifo a skoro kaba, mi ben musu go na a kantoro fu Nathan H. Knorr. Na a ten dati, Brada Knorr ben e teki fesi na a wroko fu Yehovah Kotoigi na heri grontapu. Brada Knorr aksi mi efu mi nanga mi wefi ben wani go dini leki zendeling na ini Malagasy Republiek, di nen Madagaskar now. Mi skrifi Veera fu aksi en fa a e prakseri fu a tori, èn wantewante a piki, „Iya”. Di mi drai go baka na Fensikondre, wi sreka sani esi-esi fu go na Madagaskar.

Sani di meki wi prisiri èn sani di meki wi brokosaka

Na ini yanuari 1962, wi frei go na Antananarivo, a mamafoto fu Madagaskar. Fu di wi komoto na ini Fensikondre na ini a kowru pisi ten fu a yari, meki wi ben weri ati nanga deki dyakti fu hori wi skin waran. Ma heri esi wi bigin weri tra sortu krosi fu di a son faya na ini Madagaskar. A fosi zendeling-oso fu wi ben pikin, èn a ben abi wán sribikamra nomo. Wan tra zendeling trowpaar ben e tan drape kaba, èn dati meki mi nanga Veera ben e sribi na tapu a balkon.

Wi bigin leri taki Fransitongo, wan tongo di sma e leri na den skoro fu Madagaskar. Disi ben muilek pikinso, fu di wi no ben taki a srefi tongo leki sisa Carbonneau di ben e gi wi leri. A sisa ben taki Ingrisitongo te a ben e leri wi Fransitongo, ma Veera no ben sabi taki Ingrisitongo. Sobun, te sisa Carbonneau ben taigi wi wan sani, dan mi ben fruteri Veera na ini Fensitongo san a sisa taki. Bakaten wi ben e leri fa fu taki sani soleki fa Fransiman gwenti taki. Ma Veera no ben e frustan den sani disi te mi ben e fruklari den na ini Fensitongo. Mi ben musu fruklari den na ini Sweidsitongo gi en. Heri esi wi bigin frustan a Fransitongo èn baka dati wi bigin leri Malagasytongo, a tongo di furu sma drape e taki.

A fosi bijbelstudie di mi ben abi, ben de wan man di ben man taki soso Malagasytongo. Mi ben suku  den bijbeltekst na ini a Fensi Bijbel fu mi, èn baka dati wi ben e suku den tekst na ini a Malagasy Bijbel fu en. Mi no ben man taki furu fu den tekst, ma heri esi a man disi bigin kisi warderi gi den tru tori na ini Bijbel, èn te fu kaba a teki dopu.

Na ini 1963, Milton Henschel fu na edekantoro fu Yehovah Kotoigi na ini Brooklyn, kon na Madagaskar. Syatu baka dati, wan nyun bijkantoro seti na ini Madagaskar, èn mi kisi a frantwortu fu dini leki bijkantoro-opziener, boiti taki mi ben e dini leki kring-opziener nanga distrikt-opziener. A heri pisi ten dati, Yehovah gi wi furu blesi. Fu 1962 te go miti 1970, a nomru fu Kownukondre preikiman na ini Madagaskar kren fu 85 te go miti 469.

Wan leisi na ini 1970, di wi komoto na a preikiwroko, wi feni wan brifi na wi mofodoro. Na ini a brifi wi leisi taki ala den zendeling fu Yehovah Kotoigi ben musu go na a kantoro fu a Ministeria fu Kondre Afersi. Di wi doro na a kantoro, wan lantiman taigi wi taki a tirimakti taki dati wi musu gowe libi a kondre wantewante. Di mi aksi sortu ogri mi du, dan a lantiman taki: „Masra Kuokkanen, yu no du nowan ogri.”

„Wi de dyaso aiti yari kaba”, na so mi taigi en. „Na dya wi e libi now. Wi no kan gowe libi a kondre disi wantronso.” Aladi wi meki furu muiti fu kan tan na ini a kondre, toku ala den zendeling ben kisi wán wiki nomo fu gowe libi a kondre. Lanti ben tapu a bijkantoro, èn wan brada fu a kondre srefi bigin teki fesi na ini a preikiwroko. Fosi wi gowe libi wi lobi brada nanga sisa na ini Madagaskar, wi kisi fu yere taki wi ben musu go dini na ini Uganda.

Wi e go dini na wan nyun presi

Wan tu dei baka di wi komoto na ini Madagaskar, wi doro na ini Kampala, a mamafoto fu Uganda. Wantewante wi bigin leri taki Lugandatongo. A tongo disi moi fu yere, bika te sma e taki en, a gersi leki den e singi. Ma a muilek srefisrefi fu leri taki a tongo disi. Tra zendeling ben yepi Veera fu taki Ingrisitongo fosi, èn wi ben abi bun bakapisi te wi ben e preiki na ini a tongo dati.

Fu di a ben faya èn banawtu na ini Kampala, meki Veera kon siki. Fu dati ede, wi kisi fu yere taki wi ben kan go dini na ini Mbarara, wan foto na ini Uganda pe a son no faya so. Wi ben de den fosi Kotoigi drape, èn a fosi dei di wi go na ini a preikiwroko, wi ondrofeni wan moi sani di gi wi deki-ati trutru. Mi ben e taki nanga wan man na ini na oso fu en. Ne en wefi di nen Margaret waka  komoto na ini a kukru. A heri pisi ten dati a arki di mi ben e taki nanga en masra. Veera bigin studeri Bijbel nanga Margaret, èn a ben kon frustan den leri fu Gado bun. A teki dopu èn a tron wan fayafaya Kownukondre preikiman.

Sma e feti na strati

Na ini 1971, dyugudyugu ben de na ini Uganda fu di sma fu a kondre bigin feti nanga makandra. Wan dei, sma ben e feti leti na ini a birti fu a zendeling-oso na ini Mbarara. Na fu a pisi ten dati mi ben e taki na ini a bigin.

Veera ben de na a zendeling-oso kaba di mi doro. Wan langa pisi fu a pasi, mi kroipi na ini wan gotro so taki den srudati no ben kan si mi. Na ini wan uku fu na oso, wi seti wan tu matrasi, tafra, sturu, nanga kasi na so wan fasi taki den tron wan sortu „fortresi”. Wan heri wiki langa wi tan na ini na oso, aladi wi ben e arki nyunsu tapu radio. Son leisi, kugru ben e skefti pasa na a oso skin, aladi wi ben e kibri na ini a fortresi di wi meki. Te neti wi no ben e leti nowan faya, fu di wi no ben wani meki sma sabi taki wi de na ini na oso. Wan leisi, srudati kon na a fesidoro èn den bigin bari. Wi tan tiri, èn wi begi Yehovah safri. Di a feti ben kaba, den birtisma kon na wi èn den taki wi tangi fu di noti no pasa nanga den. Den ben bribi taki Yehovah kibri wi alamala, èn wi ben agri nanga den.

Wan heri pisi ten dyugudyugu no ben de, teleki wi yere wan mamanten tapu radio taki a tirimakti fu Uganda tapu a wroko fu Yehovah Kotoigi. A sma di ben e taki tapu radio, ben taki dati ala sma di tron Yehovah Kotoigi, ben musu drai go baka na a bribi di den ben abi fosi. Mi pruberi fu taki-go-taki-kon nanga den lantiman, ma mi no ben abi bun bakapisi. Baka dati, mi go na a kantoro fu Presidenti Idi Amin, èn mi aksi efu mi ben kan miti en. A sekretarsi taigi mi taki a presidenti ben abi furu fu du. Mi go baka omeni leisi, ma noiti mi kisi na okasi fu taki nanga a presidenti. Te fu kaba, wi ben abi fu gowe libi Uganda na ini yuli 1973.

Wán yari e tron tin yari

Neleki fa wi ben e sari di wi ben musu gowe libi Madagaskar, na so wi ben e sari tu di wi ben musu gowe libi den lobi brada nanga sisa fu wi na ini Uganda. Disi leisi den seni wi go na Senegal, ma bifo wi go drape, wi go na Fensikondre fosi. Di wi doro drape, wi kon yere taki wi no ben abi fu go na Senegal moro, ma taki wi ben musu tan na ini Fensikondre. A ben gersi leki wi no ben o du zendelingwroko moro. Na ini Fensikondre, wi ben e dini leki spesrutu pionier èn wi bigin du a kringwroko baka.

Na a pisi ten fu 1990, sma no ben e gens a preikiwroko so furu moro na ini Madagaskar. Na edekantoro na ini Brooklyn aksi wi efu wi ben wani go dini drape fu wán yari. Wi no ben fruwakti dati srefisrefi. Wi ben wani go, ma wi ben abi tu bigi problema. Mi papa di ben owru kaba, ben abi sorgu fanowdu, èn Veera ben abi problema ete nanga a gosontu fu en. Mi ben sari trutru di mi papa dede na ini november 1990, ma a ben go moro bun nanga a gosontu fu Veera, èn dati gi wi a howpu taki wi ben kan du a zendelingwroko baka. Wi drai go na Madagaskar na ini september 1991.

Wi ben musu tan na ini Madagaskar wán yari, ma te fu kaba wi tan drape tin yari langa. Na ini a pisi ten dati, a nomru fu preikiman kren fu 4000 te go miti 11.600. Mi prisiri trutru fu dini leki zendeling. Ma son leisi mi ben firi brokosaka, fu di mi ben prakseri taki kande mi no ben e poti nofo prakseri na a gosontu fu mi lobi wefi, èn na a fasi fa a ben e firi. Ma Yehovah gi wi ala tu a krakti fu horidoro. Te fu kaba na ini 2001, wi drai go baka na Fensikondre. Drape wi go wroko na a bijkantoro. Wi e tan wroko fayafaya gi a Kownukondre fu Gado, èn wi e prakseri Afrika ete. Wi abi a fasti bosroiti fu du a wani fu Yehovah, awansi pe a e seni wi go.—Yesaya 6:8.

[Karta na tapu bladzijde 12]

(Efu yu wani si pe den sani disi skrifi, luku a tijdschrift)

FENSIKONDRE

EUROPA

[Karta na tapu bladzijde 14]

(Efu yu wani si pe den sani disi skrifi, luku a tijdschrift)

AFRIKA

MADAGASKAR

[Karta na tapu bladzijde 15]

(Efu yu wani si pe den sani disi skrifi, luku a tijdschrift)

AFRIKA

UGANDA

[Prenki na tapu bladzijde 14]

A trowdei fu wi

[Prenki na tapu bladzijde 14, 15]

Baka di wi du a kringwroko na ini Fensikondre, na ini a yari 1960 . . .

. . wi go du zendelingwroko na ini Madagaskar, na ini a yari 1962

[Prenki na tapu bladzijde 16]

Mi nanga Veera now