Kownukondre Preikiman E Fruteri

A Feni San A Ben Suku na Yeye Sei

SIPRUS na wan èilanti na a noord-oostsei uku fu a Mindrikondre Se. Na ini Bijbel ten, sma ben sabi a kondre Siprus bun fu di a kondre ben abi furu kopro nanga heri bun udu. Paulus nanga Barnabas ben meki a bun nyunsu fu a Kownukondre drape bekènti na a fosi preikiwaka fu den leki zendeling (Tori fu den Apostel 13:4-12). A bun nyunsu abi wan bun krakti ete tapu a libi fu furu sma fu Siprus na ini a ten disi. Sondro tweifri disi pasa nanga Lukas, wan man di pasa 40 yari. A e fruteri:

„Mi gebore ini wan famiri fu seibi pikin na wan burugron pe den e kweki skapu. Sensi di mi ben de wan pikin boi, mi ben lobi leisi srefisrefi. A buku di mi ben lobi, na wan pikin uitgave fu den Kresten Griki Buku fu Bijbel. Di mi ben abi tin yari, dan mi nanga wan tu mati ben studeri Bijbel leki wan pikin grupu. Ma dati no ben teki langa, bika wan tu fu den moro owru sma fu a dorpu ben feni taki wi na sma di e bribi sani di de kontrari son kerki leri.

Baka ten, di mi ben go na skoro na Amerkankondre, mi ben miti sma di kweki nanga furu difrenti kerki. Dati ben meki taki mi ben wani sabi kerki sani baka. Furu dei mi ben de na ini a bibliotheek fu na universiteit fu ondrosuku den tori fu den difrenti kerki. Mi ben go tu na wan lo kerki, ma toku nanga ala den muiti di mi ben meki, mi no ben kisi satisfaksi na yeye fasi.

Di mi kaba mi skoro, mi drai go baka na Siprus fu wroko leki wan driktoro fu wan laboratorium fu dresi tori. Wan Kotoigi fu Yehovah, wan owru man di nen Antonis, ben gwenti kon luku mi na mi wrokope. Ma den sma fu a Griki Orthodox Kerki ben si taki a ben kon na mi.

Heri esi, wan domri ben kon luku mi èn a ben taigi mi taki a moro betre fu no taki nanga Yehovah Kotoigi. Fu di den ben leri mi, sensi di mi ben yongu, taki a Griki Orthodox Kerki ben abi a waarheid, meki mi du soleki fa a domri ben taki. Mi no ben teki mi ten moro fu taki nanga Antonis, èn mi bigin taki fu Bijbel nanga a domri. Mi ben go luku den furu oso fu den pater nanga non na ini Siprus tu. Mi ben go srefi na a noordsei fu Grikikondre èn mi ben go luku na Atosbergi di sma e si leki a moro santa bergi fu na Ortodox Kresten Kerki. Ma toku mi no ben kisi piki ete tapu den Bijbel aksi fu mi.

Ne mi begi Gado fu a yepi mi fu feni a waarheid. Syatu baka dati, Antonis ben kon luku mi baka na mi wrokope, èn mi ben si dati leki wan piki tapu den begi fu mi. So bun mi no ben go taki nanga a domri moro èn mi ben bigin studeri Bijbel nanga Antonis. Mi ben tan go na fesi, èn na ini oktober 1997 mi gi misrefi abra na Yehovah fu di mi teki dopu na ini watra.

Biginbigin mi wefi nanga den tu moro owru umapikin fu unu — wan abi 14 yari, a trawan 10 — ben gens mi. Ma fu di mi ben tyari misrefi na wan bun fasi meki mi wefi ben teki a bosroiti fu go na den konmakandra na a Kownukondre zaal. San ben naki en ati trutru na a switi fasi fu den Kotoigi èn so srefi taki den ben wani sabi trutru fa a e go nanga en. Ma san ben naki en ati spesrutu tu na a fasi fa den e gebroiki Bijbel. Dati meki mi wefi èn so srefi den tu moro owru umapikin fu mi ben bigin studeri Bijbel nanga Yehovah Kotoigi. Mi ben breiti srefisrefi di den dri dopu na „A Profeiti Wortu fu Gado” Distrikt Kongres na ini 1999!

Iya, mi e prisiri fu di mi feni waarheid baka di mi suku en. Now wi heri osofamiri, so srefi mi wefi nanga den fo pikin, de na ini a soifri anbegi fu Yehovah.”