Tapu sonde 20 november 2022, den kaba hori wan bigi konmakandra (COP27 klimaatconferentie fu den Verenigde Naties) pe difrenti kondre luku makandra san den kan du so taki a weer no e tyari moro rampu kon na grontapu. Den tiriman nanga sabiman di ben kon na a konmakandra disi ben teki a prenspari bosroiti fu gi den pôti kondre moni fu yepi den nanga den rampu di miti den fu di a weer e kenki. Ma furu sma e frustan tu taki moni no o lusu a heri problema disi.

•   „Mi breiti taki wi bosroiti fu poti moni na wan sei fu yepi den sma di kisi fu du nanga den sortu rampu disi”, na so António Guterres, a secretaris-generaal fu den Verenigde Naties taki tapu 19 november 2022. „Ma wi sabi taki disi no o lusu a problema . . . A planeiti fu wi siki seryusu.”

•   „Heri esi wan bigi rampu kan pasa na heri grontapu.”​—Mary Robinson di ben de a president fu Ierland fosi èn a Hei Komsarsi fu den Verenigde Naties di ben e opo taki gi den reti fu libisma, 20 november 2022.

 Spesrutu den yongu sma e frede san kan pasa nanga a grontapu fu wi. Ma yu denki taki den kondre kan wroko makandra fu sorgu taki den sortu rampu disi no e pasa moro soleki fa den bosroiti? San Bijbel e taki?

 Bijbel e sori taki den kondre no o man lusu a problema disi, awinsi fa den e wroko tranga èn awinsi omeni muiti den du fu meki grontapu kon bun baka. Luku fu san ede den no o man:

•   „A sani di meki kron, no kan meki kon reti baka.”​—Preikiman 1:15.

   San disi wani taki: Den tiriman no man du ala san den wani du, fu di libisma no ben meki fu tiri makandra (Yeremia 10:23). Awinsi den difrenti kondre ben o wroko makandra èn awinsi den ben o du ala muiti, toku den no ben o man lusu den problema na grontapu.

•   „Bika sma o lobi densrefi nomo. Den o lobi moni. . . . Den no o wani meki kruderi.”​—2 Timoteyus 3:2, 3.

   San disi wani taki: Bun langa kaba Bijbel sori krin taki furu sma na ini a ten fu wi ben o denki den srefi nomo èn den no ben o wani wroko makandra fu meki sani kon moro bun gi ala sma.

 A no de na libisma fu taki san o pasa nanga grontapu. Gado poti wan tiriman gi grontapu di o seti ala sani kon bun baka. A tiriman disi na Yesus Krestes. Bijbel e taki fu en:

•   „A o du a wroko fu wan granman. Den o kari en Gran Raiman, Tranga Gado, Têgo Papa, èn Granman fu Freide.”​—Yesaya 9:6.

 Yesus na a Kownu fu Gado Kownukondre. Dati na a regering fu Gado na hemel (Mateyus 6:10). Nanga en heri ati, a wani sorgu gi grontapu nanga den sma di e libi na grontapu èn a abi a makti nanga a koni fu du dati tu (Psalm 72:12, 16). A tiriman disi o meki a regering fu en puru ala den sma „di e pori grontapu” èn a o meki grontapu kon bun baka.​—Openbaring 11:18; Yesaya 35:1, 7.

 Efu yu wani sabi moro fu a fasi fa grontapu o kenki kon bun baka, dan leisi na artikel „Suma o kibri grontapu?”