PE E te iloa o ai na tamaloloa ma o ā a latou mea na e fai? O loo o i le taua, ma o loo pepese i latou o i luma. Ae atonu e te fesili faapea: ‘Aiseā e le avea ai ni a latou pelu, ma ni tao e tau ai?’ Sei o tatou vaai.

O Iosefatu o le tupu o le ituaiga e lua o le malo o Isaraelu. Na ola o ia i le vaitaimi na i ai le tupu o Aapo ma Iesepela i le ituaiga e 10 o le malo i matu. Ae o se tupu lelei Iosefatu, ma lona tamā o Asa. O lea mo ni tausaga se tele, na fiafia ai tagata o le ituaiga e lua o le malo i saute i se olaga lelei.

Ua tupu nei se mea. Ua fefefe foi tagata. Na ripotia e avefeau i a Iosefatu: ‘O se vaegaau tele mai Moapi, Amoni ma le Mauga o Seira o loo o mai e osofai iā te oe.’ Ua faapotopoto nei Isaraelu e saili atu mo se fesoasoani a Ieova. Na o atu i le malumalu, ma o i ina na tatalo ai Iosefatu: ‘Ieova e lo matou Atua, ua matou le iloa se mea e fai. E le mafai ona matou tau ma lenei autau e toatele. Matou te vaavaai atu iā te oe mo le fesoasoani.’

Na faafofoga mai Ieova, ma na taʻuina atu e sana auauna faapea: ‘O le taua, e lē a outou ae o le Atua. Tou te le tau. Na ona outou vaavaai lava, pe faapefea ona faaolaina outou e Ieova.’

O lea, i le isi taeao na taʻu atu ai e Iosefatu e faapea: ‘Ia outou faalagolago i a Ieova!’ Ona ia tuuina atu lea o e pepese i luma o ana fitafita, a o savavali i latou na usuina viiga i a Ieova. Pe e te iloa le mea na tupu ina ua latalata i latou i le taua? Na faatupuina e Ieova ia fetauaʻi vaega a le fili lava ia. Ma na taunuu atu Isaraelu, ua feoti uma fitafita a le fili!

Pe e le poto ea Iosefatu i lona faalagolago i a Ieova? E popoto foi i tatou pe a tatou faalagolago i a te Ia.