Ua faateʻia fafine ina ua taunuu atu i le tuugamau ua leai se tino o Iesu. Ua tamoʻe atu Maria le Makatala iā “Simona Peteru ma le isi soo [le aposetolo o Ioane] o lē ua alofa faapelepele i ai Iesu.” (Ioane 20:2) Peitaʻi ua vaaia e isi fafine o loo i le tuugamau se agelu. O loo i totonu foʻi o le tuugamau le isi agelu, “o loo ofu i se ofu talaloa paʻepaʻe.”—Mareko 16:5.

Ua faapea atu se tasi o agelu iā i latou: “Aua tou te ofo. O loo outou saʻilia Iesu le Nasareta lea na tutuʻi i luga o le laau. E lē o i inei o ia auā ua toe faatūina. Vaai i le mea na latou tuuina ai o ia. Ia ō ma taʻu atu i ona soo ma Peteru e faapea, ʻUa muamua atu o ia iā te outou i Kalilaia; o i inā tou te iloa ai o ia e pei ona fetalai atu ai iā te outou.’” (Mareko 16:6, 7) O le “gatete ma [le] ofo tele” o nei fafine, ua tamomoʻe atu ai i le ʻausoo ma faamatala atu i ai nei mea.—Mareko 16:8.

O le taimi lea ua oo atu Maria iā Peteru ma Ioane. Ua faapea atu o ia: “Ua latou aveese le Alii mai i le tuugamau, ma ua matou lē iloa le mea ua latou tuuina ai o ia.” (Ioane 20:2) O lea ua taufetuli atu ai loa Peteru ma Ioane, ma ua muamua taunuu Ioane i le tuugamau ona e saoasaoa atu o ia. Ua autilo o ia i totonu o le tuugamau ma iloa atu ai ʻie o loo taatitia mai, ae e leʻi ulu atu o ia i totonu.

Ua taunuu atu nei Peteru ma ua alu saʻo i totonu o le tuugamau. Ua ia vaaia ai ʻie lino ma le ʻie na ufiufi ai le ao o Iesu. O le taimi lea ua alu atu ai foʻi ma Ioane i totonu o le tuugamau, ma ua ia talitonu ai i le faamatalaga a Maria. E ui lava i le fetalaiga a Iesu i le taimi ua teʻa e faapea o le a toe faatūina o ia, ae e lē o malamalama Peteru ma Ioane o le mea lenā ua tupu. (Mataio 16:21) O lea, ua fememeaʻi ai i laʻua ma toe foʻi i o la aiga. Ae ua toe foʻi mai Maria ma nofo ai pea i le mea o loo iai le tuugamau.

O le taimi lea, ua faanatinati atu ai isi fafine e taʻu i le ʻausoo ua toe faatūina Iesu. A o latou taufetuli atu, ua latou feiloaʻi ma Iesu. Ua fetalai atu Iesu, e lē tatau ona latou fefefe. Ae e tatau ona latou ō ma taʻu atu i ona soo, e tatau ona latou ō atu i Kalilaia ina ia feiloaʻi ai ma ia i inā.—Mataio 28:9, 10; Luka 24:8-10.

I le taimi na lūlū ai le mafuiʻe ma vaaia ai agelu i le tuugamau, na “tetemū” fitafita ʻma pei ai o ni tagata ua feoti.’ Ina ua latou teteʻi ane ma iloa le mea ua tupu, ona latou ō atu ai lea i le aai ma “taʻu atu i le ʻaufaitaulaga sili mea uma ua tutupu.” Ua faia se talanoaga a le ʻaufaitaulaga ma le ʻautoeaina o Iutaia. Ua latou faia se faaiʻuga e totogi tupe nei fitafita, e aua le faamatalaina atu mea ua tutupu, ae ia faapea atu: “Na ō mai ona soo i le pō ma gaoia lona tino a o matou momoe.”—Mataio 28:4, 11, 13.

E mafai ona faasalaina i le oti fitafita Roma pe afai e momoe i le taimi o o latou tiute. O lea ua folafola atu ai e le ʻaufaitaulaga: “Afai e faalogo i ai le kovana [i la latou pepelo e faapea na momoe], ona matou faaōleōle lea o ia, ma tou te lē afāina ai.” (Mataio 28:14) Ua talia e fitafita le tupe ma ua latou faia e pei ona faatonuina e le ʻaufaitaulaga. O lea, ua oo ina salalau atu lenei faamatalaga sesē e faatatau i le gaoia o le tino o Iesu i tagata Iutaia.

O loo faanoanoa pea Maria le Makatala a o iai i le tuugamau. Ua punou o ia ma autilo atu i totonu o le tuugamau, ma ua iloa atu ai agelu e toʻalua i ofu papaʻe. O loo nonofo i laʻua i le mea na tuu ai le tino o Iesu, o le tasi e i ulu, a o le tasi e i vae. Ua fesili atu nei agelu iā Maria: “Le mafine e, aiseā ua e tagi ai?” Ua tali mai o ia: “Ua latou aveesea loʻu Alii, ma ou te lē iloa le mea ua latou tuuina ai o ia.” Ua faliu atu o ia i tua ma vaaia ai se tasi o loo tū mai. Ua toe fai atu e lenā tagata le fesili sa faia e agelu, ma ua ia fesili atu foʻi: “O ai o loo e saʻilia?” Ua manatu Maria o le tagata faitogālaau lea, ma ua ia faapea atu: “Lau susuga e, afai ua e aveesea o ia, ia taʻu mai iā te aʻu le mea ua e tuuina ai o ia, ina ia ou alu atu e ave o ia.”—Ioane 20:13-15.

O le mea moni, o loo talanoa atu Maria iā Iesu ua toe faatūina mai. Peitaʻi, e lē o iloa e Maria o Iesu lea. Ae ina ua ia faapea atu “Maria e!” ona iloa ai lea e Maria o Iesu lea, ona o le auala lea e masani ona ia valaau ai o ia. Ua tali mai Maria ma le olioli tele: “Raponi e!” (o lona uiga “le Aʻoaʻo e!”) Peitaʻi, o le popole o Maria e faapea ua toeitiiti afio Iesu i le lagi, ua ia pipiimau atu ai iā te ia. Ae ua fetalai atu Iesu: “Aua e te pipii mai iā te aʻu. Auā ou te leʻi alu aʻe i le Tamā. A ia e alu i oʻu uso ma fai atu iā i latou, ʻOu te alu aʻe i loʻu Tamā, ma lo outou Tamā, i loʻu Atua ma lo outou Atua.’”—Ioane 20:16, 17.

Ua tamoʻe atu Maria i le nofoaga o loo faapotopoto ai le ʻauaposetolo ma isi soo. Ua faapea atu o ia: “Ua ou vaai i le Alii!” Ua faaopoopo atu le faamatalaga a Maria i lipoti sa latou faalogo ai mai i isi fafine. (Ioane 20:18) Peitaʻi, ua “pei o ni talafatu” na faamatalaga iā i latou.—Luka 24:11.