I se tasi Sapati, ua asiasi atu ai Iesu i se sunako atonu i Kalilaia, ma ua ia maua atu ai se tamāloa ua pē lona lima. (Luka 6:6) Ua mataʻi e le ʻautusiupu ma le ʻau Faresaio Iesu. Aiseā? Ua faaalia o latou faanaunauga moni ina ua latou fesili e faapea: “Pe e taga i le tulafono ona faamālōlō i le sapati?”—Mataio 12:10.

E talitonu taʻitaʻi lotu Iutaia, seʻiloga e lamatia le ola o se tagata ona faatoʻā mafai lea ona faia faamālōlōga i le Sapati. O se faaaʻoaʻoga, e faasā ona faasaʻo se ponaivi pe fusi se vae ua mapeva i le Sapati. E vaai i na vala e lē o ni tulaga e lamatia ai le ola o se tagata. O lea, e lē o fesiligia e le ʻautusiupu ma le ʻau Faresaio Iesu, ona e latou te manatu mamafa i le tamāloa ma ona mafatiaga. Peitaʻi, o loo latou taumafai e suʻe se mea e molia ai Iesu.

Ua silafia e Iesu o latou manatunatuga sesē. Ua latou taliaina se manatu e lē faavaeina mai Tusitusiga Paia, i mea e aofia ai i le solia o le tulafono e faatatau i galuega e faasā ona faia i le Sapati. (Esoto 20:8-10) E lē o le taimi muamua lea ua ia fesagaʻia ai faitioga e faatatau i galuega lelei sa ia faia. O lea, ua sauni nei Iesu mo se fetaiaʻiga mataʻina i lo latou va ma taʻitaʻi lotu, e ala i le faapea atu i le tamāloa ua pē lona lima, ʻe tū i luga ma sau i le ogatotonu.’—Mareko 3:3.

Ua ia faliu atu i le ʻautusiupu ma le ʻau Faresaio ma fetalai atu iā i latou: “Pe e iai se isi o outou e iai se mamoe e tasi, ma pe afai e paʻū lenā mamoe i le lua i le sapati, pe e lē alu atu ea o ia ma ave aʻe i luga?” (Mataio 12:11) I le vaaiga a tagata Iutaia, o le mamoe o le auala lea e maua ai a latou tupe. O lea, e latou te lē tuua ai pea se mamoe i le lua, auā atonu e oo atu i le aso e sosoo ai ua pē ma lē maua ai sa latou tupe. O loo taʻua foʻi i Tusitusiga Paia: “E tausia faapelepele e le tagata amiotonu le ola o lana manu lata.”—Faataoto 12:10.

Ua faaauau le fetalaiga a Iesu i le faia o se faatusatusaga e faapea: “E sili atu ai la ona tāua le tagata i lo o le mamoe! O lea, e taga i le tulafono ona fai le mea lelei i le sapati.” (Mataio 12:12) O lea la, o le faamālōlōina e Iesu o le lima o le tamāloa, e lē faapea ai ua ia solia le Sapati. Ua lē mafai ona faamaonia e taʻitaʻi lotu Iutaia a latou tuuaʻiga e faapea, e sesē lenei fetalaiga logolelei ua faia e Iesu, ona o lona tigā alofa. Ua lē mautali i latou.

O le toʻatamaʻi ma le faanoanoa o Iesu i o latou manatu sesē, ua ia silasila atu ai iā i latou ma faapea atu i le tamāloa: “Ia faaloaloa mai lou lima.” (Mataio 12:13) Ua faia faapea e le tamāloa ma ua toe lelei ai lona lima. Ua fiafia o ia i le mea ua tupu, ae o le ā le aafiaga iā i latou o loo taumafai e molia Iesu?

Nai lo o le fiafia ua toe lelei le lima o le tamāloa, ae ua ō le ʻau Faresaio ma ua taupulepule “ma ē e ʻau ma Herota, ina ia maua se mea e fasioti ai Iesu.” (Mareko 3:6) E aofia ai i “ē e ʻau ma Herota” (o se vaega faapolotiki) sui o le ʻau Satukaio. E masani lava e iai le feteenaʻiga i le va o le ʻau Satukaio ma le ʻau Faresaio. Peitaʻi, o lea ua latou autasi nei e tetee atu iā Iesu.