Mataupu Sefulufitu

Le Iloaina o Tagata Tapuaʻi Moni i le Vaitaimi o le Iʻuga

1. E tusa ai ma le mataupu e 7 o le Tanielu, o ā mea mataʻutia e ao ona oo i se vaega itiiti lē faaauupegaina o tagata?

UA OSOFAʻIA ma le sauā e se malo malosi o le lalolagi, se vaega itiiti lē faaauupegaina o tagata. Ua faasaoina mai i latou ma ua toe faafouina foʻi; e lē ona o lo latou lava malosi, ae ona e pele i latou iā Ieova le Atua. Na valoia mai nei mea tutupu i le mataupu e 7 o le Tanielu, lea na tutupu i pōpōfou o le senituri lona 20. O ai la nei tagata? I le mataupu lava lea o le tusi o Tanielu, o loo taʻua ai i latou o “le ʻau paia a lē Silisili ese,” po o Ieova le Atua. O loo faaalia ai foʻi e faapea, o le a iʻu ina avea i latou nei ma ē pule faatasi ma Keriso i le Malo o le Mesia!—Tanielu 7:13, 14, 18, 21, 22, 25-27.

2. (a) O le ā le lagona o Ieova agaʻi i ana auauna faauuina? (e) O le ā le gaoioiga atamai e ao ona faia i lenei taimi o le iʻuga?

² E pei ona tatou aʻoaʻoina i le mataupu e 11 o le Tanielu, o le a oo lava le iʻuga o le tupu o le itu i mātū, pe a māeʻa ona ia osofaʻia le nuu malupuipuia faaleagaga o tagata faamaoni nei. (Tanielu 11:45; faatusatusa i le Esekielu 38:18-23.) Ioe, e puipuimalu Ieova i ona tagata faamaoni faauuina. Ua faapea mai le Salamo 105:14, 15: “Ua ia aʻoaʻi atu foʻi i tupu ona o i latou. Ua faapea atu i ai, Aua le tago i ē ua ou faauuina, aua foʻi le agaleaga atu i aʻu perofeta.” Pe e te lē ioe ea e faapea, i nei taimi faigata, e atamai tele mo le “motu o tagata e toʻatele” lea ua faatuputupulaʻia, ona ʻaufaatasi vavalalata ma le ʻaupaia i le tele e mafai ai? (Faaaliga 7:9;  Sakaria 8:23) Na fautuaina e Iesu Keriso tagata o ē pei o ni mamoe ina ia faia faapea; ia ʻaufaatasi ma ona uso faauuina faaleagaga e ala i le lagolagoina o i latou i la latou galuega.—Mataio 25:31-46; Kalatia 3:29.

3. (a) Aiseā e lē faigofie ai ona iloa soo faauuina o Iesu ma auaufaatasi ma i latou? (e) O le a faapefea ona fesoasoani mai le mataupu e 12 o le Tanielu i lenei tulaga?

³ Peitaʻi ane, o loo tau se taua malosi e Satani le Fili o le Atua faasaga i le vaega faauuina. Ua ia faaauilumaina lotu sesē, ma ua tumu ai le lalolagi i Kerisiano faatagafai. O le iʻuga, e toʻatele ua faasesēina ai. O nisi ua siliga lo latou faamoemoe i le mauaina o i latou o loo faatinoina le tapuaʻiga moni. (Mataio 7:15, 21-23; Faaaliga 12:9, 17) E oo foʻi iā i latou ua iloa le “lafu mamoe itiiti” ma auaufaatasi atu iai, e tatau ona tauivi malosi e faatumauina lo latou faatuatua, auā o loo saʻili pea lenei lalolagi e faaleaga le faatuatua o tagata. (Luka 12:32) Ae faapefea oe? Po ua e iloa ea “le ʻau paia a lē Silisili ese,” ma auaufaatasi ma i latou? Po o e iloaina faamaoniga maumaututū e faamaonia ai, o i latou ua e iloa, o tagata moni lava ia ua filifilia e le Atua? E mafai e lenā faamaoniga ona faamalosia ai lou faatuatua. E mafai foʻi ona fesoasoani iā te oe i le aʻoaʻoina o isi ina ia latou iloa le sesē o faigā faalotu i aso nei. O loo maua i le Tanielu mataupu e 12 le tele o lenei poto faasaoola.

UA GAOIOI LE ALII SILI

4. (a) O ā mea e eseese e lua ua valoia mai e le Tanielu 12:1, e faatatau iā Mekaeli? (e) I le Tanielu, o le ā e masani ona uiga atu i ai le “tulaʻi” o se tupu?

⁴ Ua faapea mai le Tanielu 12:1: “O ona pō foʻi ia e tulaʻi ai Mekaeli, o le alii sili, o lē na te tulaʻi ona o tagata o lou nuu.” Ua valoia mai i lenei fuaiupu mea eseese nei e lua e faatatau iā Mekaeli: muamua, “na te tulaʻi,” o loo faasino atu i se tulaga o mea e faasolosolo mo se vaitaimi; o lona lua, “e tulaʻi,” e faasino atu i se mea e tupu a o faagasolo lenā vaitaimi. Muamua lava, tatou te fia iloa le vaitaimi ‘na te tulaʻi  ai ona o tagata o le nuu [o Tanielu].’ Ia manatua foʻi o Mekaeli o le igoa lea ua faasino iā Iesu, e tusa ma lana matafaioi o se Tupu faalelagi. O le faaupuga “na te tulaʻi,” ua faamanatu mai ai iā i tatou le auala ua faaaogāina ai lenei faaupuga i isi vaega o le tusi a Tanielu. E masani ona faasino atu i gaoioiga a se tupu e pei o le nofoia o lona nofoalii.—Tanielu 11:2-4, 7, 20, 21.

5, 6. (a) O Mekaeli, na te tulaʻi mai a o faagasolo le ā le vaitaimi? (e) “E tulaʻi” afea Mekaeli ma e faapefea, atoa ai ma le ā le iʻuga?

⁵ E manino o loo faasino atu le agelu i inei i se vaitaimi o loo taʻua maʻoti mai i isi valoaga i le Tusi Paia. Ua taʻua e Iesu lenei mea, o lona “faatasi mai,” (NW) (i le gagana Eleni, pa·rou·siʹa), pe a nofo tupu o ia i le lagi. (Mataio 24:37-39) E taʻua foʻi lea vaitaimi o “aso e gata ai” ma “ona pō o le iʻuga.” (2 Timoteo 3:1; Tanielu 12:4, 9) Talu mai lava le amataga o lenā vaitaimi i le 1914, o loo tulaʻi ai pea Mekaeli o se Tupu i le lagi.—Faatusatusa i le Isaia 11:10; Faaaliga 12:7-9.

⁶ A o afea “e tulaʻi” mai ai Mekaeli? Pe a tulaʻi mai e faataunuu se gaoioiga faapitoa. O le a faia e Iesu lenei gaoioiga i le lumanaʻi. O loo faamatala faavaloaga mai e le Faaaliga 19:11-16 Iesu, o se Tupu malosi Faa-Mesia o loo taʻitaʻia mai ʻau o agelu, ma faaooina mai le faaumatiaga i fili o le Atua. Ua faaauau mai le Tanielu 12:1: “E oo mai foʻi aso vale, e leai sona tusa talu ona faatoʻā tupu o nuu, ua oo i ia lava aso.” I le avea ma Faaoosala Sili a Ieova, o le a faaumatia ai e Iesu Keriso lenei faiga amio leaga uma o mea i le taimi o le “puapuaga tele” ua valoia mai.—Mataio 24:21; Ieremia 25:33; 2 Tesalonia 1:6-8; Faaaliga 7:14; 16:14, 16.

7. (a) O le ā le faamoemoe ua iai mo tagata faamaoni uma pe a oo i le “aso vale”? (e) O le ā le tusi a Ieova, ma aiseā e tāua ai le tusia o o tatou igoa i lea tusi?

⁷ O le a faapeʻī le tulaga o tagata o ē e faaalia le faatuatua pe a oo i lea taimi sili ona faigatā? Na taʻu atili atu iā Tanielu e faapea: “O ona pō foʻi ia e laveaʻiina ai ou tagata, o i latou uma o ē ua tusia i le tusi.” (Faatusatusa i le Luka 21:34-36.)  O le ā lenei tusi? O lona uiga moni lava, ua faaata mai ai le manatuaina e Ieova le Atua o i latou e faia lona finagalo. (Malaki 3:16; Eperu 6:10) O i latou uma e tusia o latou igoa i lenei tusi o le ola, o ni tagata e sili ona malupuipuia i le lalolagi, auā latou te maua le puipuiga a le Atua. Po o ā lava lamatiaga e ono oo iā i latou, e mafai ma o le a aveesea. E tusa lava foʻi pe oo le oti iā i latou a o leʻi oo mai lea “aso vale,” e malutia pea i latou i le finagalo o Ieova. O le a ia manatua ma faatutūina i latou i le taimi o le Afe Tausaga o le Pulega a Iesu Keriso.—Galuega 24:15; Faaaliga 20:4-6.

UA “ALA MAI” LE ʻAUPAIA

8. O le ā le faamoemoe matagofie ua ofoina mai i le Tanielu 12:2?

⁸ O se faamāfanafanaga moni lava le faamoemoe o le toetū. Ua taʻua lenei faamoemoe i le Tanielu 12:2 e faapea: “E toʻatele foʻi o ē momoe i le efuefu o le eleele latou te ala mai, o isi i le ola e faavavau, a o isi i le faalumaina ma le inosia e faavavau.” (Faatusatusa i le Isaia 26:19.) Ua faamanatu mai iā i tatou e nei upu le folafolaga faafiafia loto a Iesu Keriso e uiga i le toetutū o tagata o i tuugamau. (Ioane 5:28, 29) O se faamoemoe e maofa tele ai! Seʻi tau ina mafaufau i uō pele ma tauaiga ua maliliu, o le a latou mauaina se avanoa e toe feola ai i le lumanaʻi! Ae o le folafolaga lea o loo taʻua i le Tanielu, e faasino faapitoa atu lava i se isi ituaiga o toetū, le toetū lea ua uma ona faataunuuina. Na faapefea ona tupu lea mea?

9. (a) Aiseā e talafeagai ai ona faatalitalia le faataunuuina o le Tanielu 12:2 i aso e gata ai? (e) O le ā le ituaiga o toetū lea e faasino atu i ai le valoaga, ma e faapefea ona tatou iloa?

⁹ Seʻi iloilo faamatalaga o loo siʻomia ai. O le fuaiupu muamua o le Tanielu mataupu e 12, e pei ona tatou iloa, e lē gata e faatatau atu i le iʻuga o lenei faiga o mea, ae faapena foʻi le vaitaimi atoa o aso e gata ai. O le mea moni, o le vaega tele o le mataupu lea e faataunuu a o faagasolo taimi o le iʻuga, ae e lē i le parataiso faalelalolagi o loo fotuaʻi mai. Pe na iai  se toetū a o faagasolo lenei vaitaimi? Na tusi le aposetolo o Paulo e uiga i le toetū o “ē o iā Keriso” e taunuu “i lona faatasi mai.” Peitaʻi ane, o i latou e faatutūina i le ola i le lagi, o le a faatutū mai ma le “ola pea.” (1 Korinito 15:23, 52) E leai lava se tasi o i latou ua faatūina i “le faalumaina ma le inosia e faavavau” o loo valoia mai i le Tanielu 12:2. Pe e iai se isi ituaiga o toetū? I le Tusi Paia, o le toetū i nisi taimi, e iai sona uiga faaleagaga. O se faataʻitaʻiga, ua maua i le Esekielu ma le Faaaliga fuaitau faavaloaga o loo faatatau atu i se toe faaolaolaina faaleagaga, po o se toetū.—Esekielu 37:1-14; Faaaliga 11:3, 7, 11.

10. (a) I le ā le uiga na toe faatutūina mai ai le vaega totoe faauuina i le vaitaimi o le iʻuga? (e) Sa faapefea i nisi o le ʻaufaauuina o ē na toe faaolaolaina mai ona toe ala mai i le “faalumaina ma le inosia e faavavau”?

¹⁰ Pe na iai ea se toe faaolaolaina faaleagaga o auauna faauuina a Ieova i le vaitaimi o le iʻuga? Ioe! Na tupu moni lava i le 1918, ina ua avea se vaega totoe toʻaitiiti o Kerisiano faamaoni ma taulaʻiga o osofaʻiga, lea na faalavelaveina ai la latou galuega talaʻi i le lautele sa faamaopoopoina. E ui lava sa foliga mai e lē mafai ona toe faaauau, ae i le 1919, na toe faafoʻisia ai i latou i le ola i se tulaga faaleagaga. O nei mea moni uma na tutupu ua fetaui lelei ma le faamatalaina o le toetū sa valoia i le Tanielu 12:2. O nisi sa toe “ala mai” faaleagaga i lenā taimi ma mulimuli ane ai. Ae e faanoanoa lava, ona e lē o le ʻaupaia uma na tutumau i le ola faaleagaga. O i latou na toe feala mai, ma na filifili e teena le Tupu Faa-Mesia ma tuua le auaunaga iā Ieova, ua fetaui iā i latou le “faalumaina ma le inosia e faavavau” o loo faamatalaina i le Tanielu 12:2. (Eperu 6:4-6) Peitaʻi, sa faaaogāina tatau e le vaega faauuina faamaoni lo latou tulaga toe faaolaolaina mai faaleagaga, i le lagolagoina ma le faamaoni o le Tupu Faa-Mesia. O le iʻuga, o le a taʻitaʻiina atu i latou i le “ola e faavavau” e pei ona taʻua i le valoaga, ona o lo latou faamaoni. I aso nei, o lo latou malosi faaleagaga i taimi o teteega, ua fesoasoani iā i tatou e mātaulia ai i latou.

 LATOU TE ‘FEPULAFI E PEI O FETU’

11. O ai “ē popoto” i aso nei, ma ua faapefea ona fepulafi e pei o fetu?

¹¹ O isi fuaiupu e lua o loo sosoo mai ai o le mataupu e 12 o le Tanielu, ua fesoasoani tele i le iloaina o “le ʻau paia a lē Silisili ese.” I le fuaiupu e 3, na taʻu atu ai e le agelu iā Tanielu e faapea: “O ē popoto foʻi, e fepulafi i latou faapei o le pupula o le lagi; o i latou foʻi ua faaliliu ai tagata e toʻatele ia amiotonu, e pei o fetu i latou e faavavau faavavau lava.” O ai “ē popoto” i aso nei? E tusa ai o faamaoniga, o loo faasino atu foʻi i “le ʻau paia a lē Silisili ese.” Ia manatua, e na o le vaega totoe faamaoni faauuina na iai le poto e iloa ai o Mekaeli, le Alii Sili, na amata ona tulaʻi o se Tupu i le 1914. E ala i le talaʻiina o nei upu moni atoa ai ma le tausisia o amioga faa-Kerisiano, ua avea ai i latou ma “mea e faamalamalama aʻi” i lenei lalolagi pogisa faaleagaga. (Filipi 2:15; Ioane 8:12) Na valoia e Iesu e faatatau iā i latou e faapea: “Ona pupula ai lea o ē amiotonu e pei o le lā i le malo o lo latou Tamā.”—Mataio 13:43.

12. (a) Ua faapefea ona aofia le vaega faauuina i le ‘faaliliuina o tagata e toʻatele ia amiotonu,’ i le vaitaimi o le iʻuga? (e) E faapefea ona faaliliuina e le ʻaufaauuina tagata e toʻatele ia amiotonu ma ‘fepulafi e pei o fetu’ a o faagasolo le Afe Tausaga o le Pulega a Keriso?

¹² O loo taʻu mai foʻi e le Tanielu 12:3 iā i tatou le galuega e faia e nei Kerisiano faauuina i le taimi o le iʻuga. Latou te “faaliliu ai tagata e toʻatele ia amiotonu.” Na amata lava i le aoaoina e le vaega totoe faauuina, o ē na totoe o le 144,000, o suli faatasi ma Keriso. (Roma 8:16, 17; Faaaliga 7:3, 4) Ina ua māeʻa lenā galuega, pe tusa o le ogatotonu o vaitausaga o le 1930-⁠1939, ona latou amata aoaoina loa lea o le “motu o tagata e toʻatele” o “isi mamoe.” (Faaaliga 7:9; Ioane 10:16) Ua faatuatua foʻi i latou nei i le taulaga togiola a Iesu Keriso. O lea la, ua mafai ona latou maua se tulaga mamā i le silafaga a Ieova. I aso nei ua oo atu i le faitau miliona le aofaʻi o i latou o loo iai le faamoemoe o le faasaoina i le faaumatiaga o loo fotuaʻi mai o lenei lalolagi amio leaga. A o faagasolo le  Pulega a Keriso mo le Afe Tausaga, o le a faasafua mai ai e Iesu ma le 144,000 o tupu ma ositaulaga, i tagata usiusitai i le lalolagi aogā atoatoa o le togiola. O lenei gaoioiga o le a fesoasoani iā i latou uma lava e faatuatua, ina ia auliuligia mai so o se aafiaga o le agasala na tuufaasolo mai iā Atamu. (2 Peteru 3:13; Faaaliga 7:13, 14; 20:5, 6) I se tulaga e sili atu ona atoatoa, o le a auai le ʻaufaauuina i le ‘⁠faaliliuina o tagata e toʻatele ia amiotonu,’ ma o le a ‘⁠fepulafi e pei o fetu i le lagi.’ Pe e te talisapaia le faamoemoe o le ola i le lalolagi i le pulega o le malo mamalu faalelagi o Iesu Keriso ma i latou e pule faatasi ma ia? O se faaeaga matuā manaia lava le galulue faatasi ma “le ʻau paia” i le talaʻia o lenei tala lelei o le Malo o le Atua!—Mataio 24:14.

LATOU TE “FETAUFETULIAʻI”

13. I le ā le uiga na faamaufaailoga ai ma pupuni upu o le tusi a Tanielu?

¹³ O le faalauiloaga a le agelu iā Tanielu lea na amata mai lava i le Tanielu 10:20, ua faaiʻu mai i upu faamāfanafanaloto nei: “A o oe Tanielu e, ia e pupuni o ia upu, ma faamaufaailogaina le tusi, seʻia oo i ona pō o le iʻuga; e fetaufetuliaʻi tagata e toʻatele, e tupu tele foʻi le malamalama.” (Tanielu 12:4) O le tele lava o mea na faagaeeina Tanielu e tusi, na faamaufaailogaina moni lava ma pupuni mai i le malamalamaga faaletagata. Ioe, e oo lava iā Tanielu, na mulimuli ane tusi mai: “Na aʻu faalogo foʻi, a ua ou lē lagona.” (Tanielu 12:8) O le uiga lenei sa faamaufaailogaina ai pea le tusi a Tanielu mo le tele o tausaga. Ae ā aso nei?

14. (a) O ai o loo “fetaufetuliaʻi” i “ona pō o le iʻuga,” ma i fea? (e) O ā faamaoniga o iai i le faamanuia a Ieova i lenei ‘fetaufetuliaʻiga’?

¹⁴ Amuia i tatou auā o loo tatou ola i “ona pō o le iʻuga” lea na valoia mai i le tusi o Tanielu. E pei ona valoia mai, e toʻatele tagata faamaoni ua “fetaufetuliaʻi” i le Afioga a le Atua. O le ā le iʻuga? Ua faatuputeleina le poto saʻo ona o le faamanuia a Ieova. Ua faamanuiaina Molimau faauuina faamaoni a Ieova i le poto, ua mafai ai ona latou  malamalama e faapea, na avea le Atalii o le tagata ma tupu i le 1914, ua latou iloa manu feʻai o le valoaga a Tanielu, ua mafai ai ona lapataʻi atu faasaga i “le mea inosia e faatafunaina ai”—ua na o nisi ia o faataʻitaʻiga. (Tanielu 11:31) O lea la, o le faatuputeleina o lenei poto, o se isi lea faailoga vaaia o “le “au paia a lē Silisili ese.” Peitaʻi, na maua atili e Tanielu se isi faamaoniga.

E “FAATAAPEAPEINA” I LATOU

15. O le ā le fesili ua lāgā nei e se agelu, ma o ai e ono toe faamanatu mai iā i tatou e lenei fesili?

¹⁵ E manatua, o lea na maua e Tanielu feʻau nei mai i le agelu i le auvai o “le vaitafe tele” o Hitekelu, e lauiloa foʻi iā Tikarise. (Tanielu 10:4) Ua ia iloa atu ai nei i inā agelu e toʻatolu, ona ia faapea mai lea: “O aʻu o Tanielu, na aʻu vaai atu, faauta foʻi, o isi e toʻalua ua tutū mai, o le tasi i le auvai i le itu vai mai o le vaitafe, a o le tasi i le auvai i lelā itu o le vaitafe. Ona faapea atu lea o le tasi i le tagata ua ofu i le ie lino, ua i luga o le vai o le vaitafe, Pe oo mai afea le iʻuga o ia mea e ofo ai?” (Tanielu 12:5, 6) O le fesili lea na lāgā i inei e le agelu, e ono toe faamanatu mai ai iā i tatou “le ʻau paia a lē Silisili ese.” I le amataga mai o “ona pō o le iʻuga” i le 1914, na latou manatu mamafa ai i le fesili po o le ā le umi o totoe ona faataunuuina lea o folafolaga a le Atua. O le tali i le fesili lenei ua faaalia ai o loo taulaʻi atu le valoaga iā i latou.

16. O le ā le valoaga na folafola mai e le agelu, ma na faapea ona ia faamautinoa mai lona fataunuuina?

¹⁶ Ua faaauau mai le tala a Tanielu: “Ona aʻu faalogo lea i le tagata ua ofu i le ie lino, ua i luga o le vai o le vaitafe, ua sii i luga i le lagi lona lima taumatau ma lona lima tauagavale, ua tautō foʻi o ia i lē soifua e faavavau, [“e oo ia mea i le taimi, ma taimi, ma le ʻafa taimi atofaina,” NW]; a uma foʻi ona faataapeapeina le malosi o le nuu paia, ona taunuu foʻi lea o na mea uma.” (Tanielu 12:7) O se gaoioiga mamalu tele lea. Na sisii uma lima o le agelu i lana tautōga,  atonu ina ia iloa mai e agelu e toʻalua sa i auvai taʻitasi o le vai telē. I lenei auala na ia faamautinoa mai ai le faataunuuga o lenei valoaga. O fea tonu le taimi e faatatau i ai nei taimi atofaina? E faigofie lava ona maua le tali.

17. (a) O ā mea e tutusa ai valoaga o loo faamauina i le Tanielu 7:25, Tanielu 12:7, ma le Faaaliga 11:3, 7, 9? (e) O le ā le umi o le tolu ma le ʻafa taimi?

¹⁷ O le valoaga lenei, e tutusa lelei ma isi valoaga e lua. Muamua, o lea sa tatou talanoaina i le Mataupu e 9 o le tusi lenei, o loo maua i le Tanielu 7:25; a o le isi, o loo maua i le Faaaliga 11:3, 7, 9. Seʻi mātau mai nisi o mea e tutusa ai. O loo taulaʻi uma atu i le vaitaimi o le iʻuga. O valoaga uma nei e faatatau i auauna paia a le Atua, o loo faaalia ai le sauāina o i latou ma le lē mafai ona faaauauina mo sina taimi la latou galuega talaʻi. Ua faaalia i valoaga taʻitasi le toe faaolaolaina mai o auauna a le Atua, le toe faaauauina o la latou galuega, ma lo latou manumalo mai i ē na sauāina i latou. O loo taʻua foʻi i valoaga taʻitasi le umi o le taimi e feagai ai le ʻaupaia ma mea faigatā. O loo faatatau atu foʻi valoaga uma e lua i le Tanielu (7:25 ma 12:7) i ‘le taimi, ma taimi, ma le ʻafa taimi.’ E masani lava ona manatu tagata aʻoga o le Tusi Paia i lenei faitauga, o le tolu ma le ʻafa taimi. O loo faasino atu le tusi o Faaaliga i le vaitaimi lava lea e tusa e 42 masina, po o le 1,260 aso. (Faaaliga 11:2, 3) Ua faamautinoa mai e lenei mea, o le tolu ma le ʻafa taimi i le Tanielu, e faasino atu i le tolu ma le ʻafa tausaga e taʻi 360 aso i le tausaga. Ae o anafea na amata ai aso nei e 1,260?

18. (a) E tusa ai ma le Tanielu 12:7, o le ā o le a faailogaina ai le iʻuga o le 1,260 aso? (e) O anafea na faataapeapeina ai “le malosi o le nuu paia,” ma na faapefea ona tupu? (i) O anafea na amata ai le 1,260 aso, ma na faapefea ona “vavalo i ie talatala” le ʻaupaia a o faagasolo lenā vaitaimi?

¹⁸ O loo manino le valoaga i le taimi e faaiʻuina ai le 1,260 aso, pe a “uma foʻi ona faataapeapeina le malosi o le nuu paia.” I le ogatotonu o le 1918, na molia ai i ni tuuaʻiga sesē ē na taʻimua o le Sosaiete o le Olomatamata, e  aofia ai ma lona peresitene o J. F. Rutherford, na faasalaina ma faafalepuipuiina mo ni vaitaimi uumi. Na vaai moni lava le ʻaupaia a le Atua i le ‘faataapeapeina’ o a latou galuega, ma uma ai lo latou malosi. Pe a faitau la le tolu ma le ʻafa tausaga mai le ogatotonu o le 1918 agaʻi i tua, tatou te taunuu ai i le faaiʻuga o le 1914. O le taimi lenā na faamalosia ai e le vaega itiiti o le ʻaufaauuina i latou lava mo sauāga ogaoga. Na pa le Taua Muamua a le Lalolagi i le taimi lea ma faateteleina ai teteega i la latou galuega. I le tausaga e 1915, na oo ina faavae la latou mau o le tausaga i le fesili lea na fesili ai Iesu i ona soo: “Pe mafai ea ona outou inu i laʻu ipu?” (Mataio 20:22) E pei ona valoia i le Faaaliga 11:3, o le 1,260 aso na mulimuli mai ai, o se taimi faanoanoa lea mo le ʻaufaauuina—ua pei ai sa latou vavalo i ie talatala. Na faasolo ina mamafa sauāga. O nisi o i latou sa faafalepuipuiina, o nisi na osofaʻia e ni faapotopotoga o tagata, ae sa faia faiga faataugā i isi. E toʻatele sa loto vaivai i le maliu o le peresitene muamua o le Sosaiete o C. T. Russell i le 1916. Pe a uma ona faaiʻuina lenei taimi o le faanoanoa i le fasiotia o le ʻaupaia i lo latou tulaga o se faalapotopotoga talaʻi, o le ā e ao ona tupu?

19. Ua faapefea ona faamautinoa i tatou e le valoaga i le Faaaliga mataupu 11 e faapea, e lē umi se taimi e faalologo ai le ʻaufaauuina?

¹⁹ O le valoaga talitutusa lea o loo maua i le Faaaliga 11:3, 9, 11, ua faaalia ai e faapea, a uma ona fasiotia “molimau e toʻalua,” e maliliu mo na o sina taimi—e tolu ma le ʻafa aso—seʻia oo ina toe faaolaina mai. I se tulaga tutusa, ua faaalia mai e le valoaga i le Tanielu mataupu 12 e faapea, e lē faaauau ai pea ona faalologo le ʻaupaia peitaʻi e tele galuega mo i latou i le lumanaʻi.

UA ‘FAAMAMĀINA, FAASINASINAINA, MA TOFOTOFOINA’ I LATOU

20. E tusa ai ma le Tanielu 12:10, o ā faamanuiaga e oo mai i le ʻaufaauuina pe a mavae o latou puapuaga?

²⁰ E pei ona mātauina muamua, na tusia e Tanielu upu  nei ae e leʻi malamalama i le uiga. E ui i lea, atonu na tau mānatu Tanielu pe o le a faaumatia moni lava le ʻaupaia e tagata e sauāina i latou, auā na ia fesili atu, “Pe se ā le iʻuga o ia mea?” Na tali mai le agelu: “Tanielu e, inā alu ia; auā ua punitia ma faamaufaailogaina o upu seʻia oo i ona pō o le iʻuga. E toʻatele e faamamāina, ma faasinasinaina, ma tofotofoina; a e agasala o ē agasala, e lē lagona foʻi so latou e toʻatasi o ē agasala; a o ē popoto e lagona lava i latou.” (Tanielu 12:8-10) Sa iai moni se faamoemoe mautinoa mo le ʻaupaia! Na i lo le faaumatia o i latou, e faasinasinaina ma faamanuiaina i latou i se tulaga mamā i luma o Ieova le Atua. (Malaki 3:1-3) O lo latou malamalamaga i mea faaleagaga ua mafai ai ona latou tausia le mamā i le silafaga a le Atua. I le tuufaafeagai, e lē mananaʻo ē amioleaga e saʻili le malamalamaga i mataupu faaleagaga. Peitaʻi, o afea e tutupu uma ai nei mea?

21. (a) O ā tuutuuga e ao ona taunuu muamua ona amata ai lea o le vaitaimi lea na valoia mai i le Tanielu 12:11? (e) O le ā na faasino atu i ai “le taulaga e fai i aso fai soo,” ma o anafea na aveesea ai? (Tagaʻi i le pusa i le itulau e 298.)

²¹ Na faailoa atu iā Tanielu e faapea: “E afua i ona pō e aveeseina ai le taulaga e fai i aso fai soo, e oo foʻi i le tuuina atu o le mea inosia e faatafunaina ai, e atoa aso e tasi le afe, ma le lua o selau ma le ivagafulu.” E iai la tuutuuga e ao ona taunuu muamua ona amata ai lea o le vaitaimi lenei. E ao ona aveesea muamua “le taulaga e fai i aso fai soo.” (Tanielu 12:11) O le ā le taulaga lea na uiga i ai le agelu? E lē o taulaga i manu ia sa masani ona ofoina i malumalu faalelalolagi. Auā foʻi, e oo lava i le malumalu lea sa tū muamua i Ierusalema, ua na o se “faatusa lea o le mea moni,” o le malumalu sili faaleagaga o Ieova, lea na amata ona faagaoioia ina ua avea Keriso ma ona Ositaulaga Sili i le 29 T.A.! I lenei malumalu faaleagaga, o loo faaata mai ai le faatulagaga a Ieova mo le tapuaʻiga mamā, e le manaʻomia ai taulaga faifai pea mo agasala, auā “ua tasi lava  ona avatua o [Keriso] ma taulaga, ina ia aveina ai agasala a le toʻatele.” (Eperu 9:24-28) Ae peitaʻi, o loo ofoina atu e Kerisiano moni taulaga i le malumalu lenei. Na tusi le aposetolo o Paulo: “O lenei, o ia [Keriso] tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.” (Eperu 13:15) O le tuutuuga muamua la lenei o le valoaga, le aveesea o “le taulaga e fai i aso fai soo,” na faataunuuina i le ogatotonu o le 1918 ina ua toeititi lava taofia atoatoa ai le galuega talaʻi.

22. (a) O le ā le “mea inosia” e faatafunaina ai, ma o anafea na faatūina ai? (e) O anafea na amata ai le vaitaimi o loo valoia i le Tanielu 12:11, ma o anafea na iʻu ai?

²² Ae faapefea le tuutuuga lona lua, le “tuuina,” po o le faatūina o “le mea inosia e faatafunaina ai”? E pei ona  tatou iloa mai i le talanoaina o le Tanielu 11:31, o le mea inosia lenei na faatatau muamua atu i Malo Sosoo ona toe manu aʻe mulimuli lea o Malo Aufaatasi. Ua inosia uma nei malo ona ua faalauiloaina faalapotopotoga nei e faapea na pau lea o le faamoemoe mo le filemu i le lalolagi. O le iʻuga, ua faatuatua ai le toʻatele i nei faalapotopotoga na i lo le Malo o le Atua! Na amata fuafuaina aloaia Malo Sosoo iā Ianuari 1919. I lenā la taimi, na taunuu faatasi ai vala e lua o loo taʻua i le Tanielu 12:11. O lea la, na amata le 1,290 aso i le amataga lava o le 1919 ma faasolo mai ai seʻia oo i le tau e afu ai mea (i le Itu i Mātū o le lalolagi) i le 1922.

23. Na faapefea ona agaʻigaʻi i luma le ʻaupaia a le Atua i le tulaga o le faamamāina a o faagasolo le 1,290 aso sa valoia i le Tanielu mataupu 12?

²³ Pe sa agaʻigaʻi i luma le ʻaupaia ina ia faasinasinaina ma faamamāina i le silafaga a le Atua a o faagasolo lenā vaitaimi? E mautinoa sa latou faia faapea! Iā Mati 1919, na toe faasaʻoloto mai ai le peresitene o le Sosaiete o le Olomatamata ma ana aumea vavalalata mai le falepuipui. Na mulimuli ane taʻumamāina i latou mai tuuaʻiga sesē uma faasaga iā i latou. Na latou iloa e leʻi oo i le taimi e māeʻa ai la latou galuega, ma vave gaoioi loa e faamaopoopoina se tauaofiaga iā Setema i le 1919. I le tausaga lava lea, na lomia ai le uluaʻi lomiga o se mekasini e fai ma soa o Le Olomatamata (faa-Peretania). Na taʻua muamua o le Golden Age (le Ala Mai! i le taimi nei), ma ua leva ona lagolagosua i Le Olomatamata i le faaalialia ma le lē fefe o faiga faapiʻopiʻo a lenei lalolagi, ma fesoasoani i tagata o le Atua e tausia le mamā. E oo mai i le faaiʻuga o le 1,290 aso na valoia, ua leva ona amata gaoioi le ʻaupaia i le tulaga o le faamamāina ma le toe faafoʻisiaina. Iā Setema 1922, i le taimi tonu lava na iʻu ai le vaitaimi lenei, na latou faia ai se tauaofiaga iloga i Cedar Point i Ohio, i le Iunaite Setete o Amerika. Na avea o se uunaʻiga malosi tele mo le galuega talaʻi. Peitaʻi ane, sa iai pea le manaʻoga mo le agaʻigaʻi atili i luma. Na faatali lea mea mo le isi vaitaimi faailogaina.

 AMUIA LE ʻAUPAIA

24, 25. (a) O le ā le vaitaimi o loo valoia i le Tanielu 12:12, ma o anafea e foliga mai na amata ma faaiʻuina ai? (e) O le ā le tulaga faaleagaga o le vaega totoe faauuina mai i le amataga o le 1,335 aso?

²⁴ Na faaiʻu mai e le agelu a Ieova lana valoaga e uiga i le ʻaupaia i upu nei: “Amuia o lē faatalitali atu ma aulia atu ona aso e afe ma le tolu o selau, ma le tolugafulu ma le lima.” (Tanielu 12:12) E lē o aumaia e le agelu se faamaoniga e uiga i le taimi e amata ma faaiʻu ai lea vaitaimi. A fua i le talafaasolopito o tagata o Ieova, e foliga mai e sosoo lava ma le vaitaimi na muamua atu. Pe a fua atu i le tulaga lenā, e amata faitau mai la i le tau e afu ai mea o le 1922, ma faasolo mai ai i le faaiʻuga o le tau e totogo ai mea i le 1926 (o le Itu i Mātū o le Lalolagi). Pe sa iai le ʻaupaia i se tulaga fiafia i le faaiʻuga o lenā vaitaimi? Ioe, i tulaga tāua faaleagaga.

²⁵ E oo lava foʻi ina ua māeʻa le tauaofiaga i le 1922 (o loo faaalia i le itulau 302), na iai pea nisi o le ʻaupaia a le Atua sa moomoo i aso ua mavae. Sa avea pea le Tusi Paia ma faavae o mataupu sa suʻesuʻeina i a latou sauniga, atoa ai ma tusi faa-Peretania o Suʻesuʻega i le Tusi Paia, na tusia e C. T. Russell. I le taimi lenā, e toʻatele sa manatu ma faasino atu i le 1925 e faapea o le tausaga e amata ai le toetū, ma toe faafoʻisia mai ai le Parataiso i le lalolagi. O lona uiga, e toʻatele sa auauna ma le faamoemoe i lenā aso. O nisi na iai le manatu faasausili, e lē fia talaʻi atu i tagata lautele. O se tulaga lea sa faavaivaia ai.

26. A o faagasolo le 1,335 aso, na faapefea ona suia le tulaga faaleagaga o le ʻaupaia?

²⁶ Ae ui lava i lea, a o faagasolo le 1,335 aso, na amata ona suia lenei tulaga atoa. Na faasilisilia le talaʻiga ina ua faatulagaina fuafuaga faifai pea mo tagata uma, ina ia auai i le faiva i le fanua. Na faatulaga foʻi sauniga ina ia suʻesuʻeina ai Le Olomatamata i vaiaso taʻitasi. I le lomiga o Mati 1, 1925, na iai le mataupu tāua tele faa-Peretania o le “Fanau mai o se Nuu,” ma na maua ai e tagata o le Atua se  malamalamaga atoatoa, i mea na tutupu i le vaitaimi o le 1914 e oo i le 1919. Ina ua mavae atu le 1925, e leʻi toe auauna le ʻaupaia i le Atua ma se faamoemoe i se taimi patino e uma ai le galuega. Na i lo lea, sa matuā tāua iā i latou le faapaiaina o le suafa o Ieova. Na sili ona faamatilatila mai lenei upu moni tāua i Le Olomatamata o Ianuari 1, 1926, i le mataupu faa-Peretania “O Ai o le a Faapaiaina Ieova?” I le tauaofiaga iā Me 1926, na tatalaina ai le tusi i le gagana faa-Peretania o le Laveaʻiina. (Tagaʻi i le itulau e 302.) O se tasi lenei o tusi o le faasologa o tusi sa fuafuaina e sui ai tusi ia sa taʻua o le Suʻesuʻega i le Tusi Paia. E leʻi toe tepa i tua le ʻaupaia. Sa latou tepa taulaʻi atu ma le mautinoa i le lumanaʻi ma i le galuega o loo faatalitalia mo i latou. E pei lava ona valoia, o se tulaga fiafia na iai i le iʻuga o le 1,335 aso mo le ʻaupaia.

27. Ua faapefea ona fesoasoani mai le aotelega o le Tanielu mataupu 12 iā i tatou, ina ia iloa lelei po o ai le ʻaufaauuina a Ieova?

²⁷ E moni, e leʻi mafai e i latou uma ona onosaia lenei taimi o faigatā. E lētioa ona faamamafa mai e le agelu le tāua o le “faatalitali atu.” O i latou sa onosai ma faatalitali atu pea na latou maua le manuia. Ua faamanino mai lenei mea i le otootoga o le Tanielu mataupu e 12. E pei ona valoia, sa toe faaolaola mai le ʻaufaauuina, pe toe faatutū mai i se uiga faaleagaga. Na tuuina atu iā i latou le malamalamaga ma le utaga loloto i le Afioga a le Atua, ma toe maua le malosi e “fetaufetuliaʻi” ai i le Tusi Paia ma taʻitaʻiina e le agaga paia, ina ia faamalamalamaina mealilo ua leva ona natia. Na faamamāina i latou e Ieova, ma faapupulaina faaleagaga i latou e pei o le pupula o fetu. O le iʻuga, na latou aumaia ai le toʻatele i se tulaga amiotonu i le silafaga a Ieova.

28, 29. O le ā le faaiʻuga e tatau ona tatou faia a o tau faaiʻuiʻu “ona pō o le iʻuga”?

²⁸ Pe a manatu atu i nei faailoga faavaloaga uma e iloa ai le “ʻau paia a lē Silisili ese,” e leai se isi faamolemolega mo  lo tatou lē iloaina o i latou ma auaufaatasi ma i latou. O loo iai faamanuiaga matagofie ua saunia mo le motu o tagata e toʻatele, o ē o loo aufaatasi ma lenei vasega faauuina ua faasolo ina faaitiitia, i le auauna atu iā Ieova. E tatau iā i tatou uma ona faatalitali atu pea i le faataunuuga o folafolaga a le Atua. (Sapakuka 2:3) Ua tele tausaga, talu ona tulaʻi Mekaeli, le Alii Sili i o tatou aso mo tagata o le Atua. Ua toe lava o se aga ona gaoioi loa lea, o se faaoosala ua tofia e le Atua mo lenei faiga o mea. Pe a oo mai le taimi e gaoioi ai o ia, o le ā tonu le tulaga o le a tatou iai?

²⁹ E faalagolago le tali o lea fesili, pe afai tatou te filifili e ola i se olaga faamaoni i le taimi lenei. Ina ia faamausalīina la tatou faaiʻuga o le faia faapea a o tau faaiʻuiʻu “ona pō o le iʻuga,” seʻi o tatou iloiloina le fuaiupu mulimuli o le tusi a Tanielu. O lo tatou talanoaina o lea vala i le mataupu o sosoo mai, o le a tatou iloa ai le auala sa tulaʻi ai Tanielu i luma o lona Atua ma le auala o le a ia tulaʻi ai i Ona luma i le lumanaʻi.

O Ā MANATU AOGĀ NA E MAUA MAI?

• O Mekaeli “na te tulaʻi” mai a o faagasolo le ā le vaitaimi ma e faapefea ma o afea “e tulaʻi” ai?

• O le ā le ituaiga toetū o loo faasino atu i ai le Tanielu 12:2?

• O ā aso e faailogaina ai le amataga ma le faaiʻuga o le

tolu ma le ʻafa taimi o loo taʻua i le Tanielu 12:7?

1,290 aso na valoia mai i le Tanielu 12:11?

1,335 aso na valoia mai i le Tanielu 12:12?

• Ua faapefea i le uaʻi atu i le mataupu e 12 o le tusi o Tanielu, ona fesoasoani iā i tatou ia iloaina tagata tapuaʻi moni o Ieova?

[Fesili mo le Suʻesuʻega]

[Pusa i le itulau 298]

LE AVEESEA O LE TAULAGA E FAI I ASO FAI SOO

I le tusi o Tanielu, e faalima ona maua le faaupuga “taulaga e fai i aso fai soo.” O loo faasino atu i se taulaga o viiga, “le fua lea o tatou laugutu,” lea e masani ona ofo atu iā Ieova le Atua e ana auauna. (Eperu 13:15) O le valoia mai o lona aveesea o loo faasino atu i ai le Tanielu 8:11, 11:31, ma le Tanielu 12:11.

I le taimi o taua e lua a le lalolagi, na matuā sauāina ai tagata o Ieova e atunuu na pulea e “le tupu o le itu i mātū, ma “le tupu o le itu i toga.” (Tanielu 11:14, 15) Na aveesea “le taulaga e fai i aso fai soo” a o tau faaiʻuiʻu le Taua Muamua a le Lalolagi, ina ua taofia le galuega talaʻi mo sina vaitaimi i le ogatotonu o le 1918. (Tanielu 12:7) A o faagasolo le Taua Lona Lua a le Lalolagi, na faapena foʻi ona “aveesea le taulaga e fai i aso fai soo” mo le 2,300 aso e le Malo Malosi o le Lalolagi, o Amerika ma Peretania. (Tanielu 8:11-14; tagaʻi i le Mataupu 10 o le tusi lenei.) Na aveesea foʻi e “ʻau” a Nasi le taulaga mo se vaitaimi e lē o taʻua patino mai e le Tusi Paia.—Tanielu 11:31; tagaʻi i le Tanielu 15 o le tusi lenei.

 [Siata/Ata i le itulau 301]

O VAITAIMI FAAVALOAGA I LE TUSI O TANIELU

Taimi e fitu (2,520 tausaga): Oketopa 607 T.L.M. e oo iā

Tanielu 4:16, 25 Oketopa 1914 T.A.

(Faavaeina le Malo Faa-Mesia.

Tagaʻi i le Mataupu 6 o lenei tusi.)

Tolu ma le ʻafa taimi Tesema 1914 e oo iā Iuni 1918

(1,260 aso): (Faatigāina ai Kerisiano faauuina.

Tanielu 7:25; 12:7 Tagaʻi i le Mataupu 9 o lenei tusi.)

2,300 afiafi ma taeao: Iuni 1 po o le 15, 1938, e oo iā

Tanielu 8:14 Oketopa 8 po o le 22, 1944 (Aliaʻi le

‘motu o tagata e toʻatele,’ ua faateleina.

Tagaʻi i le Mataupu 10 o lenei tusi.)

70 vaiasosa (490 tausaga): 455 T.L.M. e oo mai i le 36 T.A.

Tanielu 9:24-27 (Faaalia mai o le Mesia ma lana faiva

i le lalolagi.

Tagaʻi i le Mataupu 11 o lenei tusi.)

1,290 aso: Ianuari 1919 e oo iā

Tanielu 12:11 Setema 1922

(Ala mai o Kerisiano faauuina ma le

agaʻigaʻi i luma faaleagaga.)

1,335 aso: Setema 1922 e oo iā Me 1926

Tanielu 12:12 (Kerisiano faauuina i le ausia o se

tulaga fiafia.)

 [Ata i le itulau 287]

O auauna taʻimua a Ieova sa faafalepuipuiina ma le lē tonu i Atlanta, Georgia, i le Iunaite Setete o Amerika. Mai le tauagavale i le taumatau: (nonofo) A. H. Macmillan, J. F. Rutherford, W. E. Van Amburgh; (tutū) G. H. Fisher, R. J. Martin, G. DeCecca, F. H. Robison, ma C. J. Woodworth

 [Ata i le itulau 299]

Tauaofiaga iloga sa faia i Cedar Point i Ohio, i le Iunaite Setete o Amerika, i le 1919 (luga) ma le 1922 (lalo)

 [Ata i le itulau 302]