Mataupu Sefulutasi

‘Ia Muai Saili Pea le Malo’

1. (a) Aiseā na uunaʻia malosi ai e Iesu lana ʻaufaalogologo ina ia muaʻi saʻili le Malo? (e) O le ā le fesili e tatau ona tatou fesiligia ai i tatou lava?

I LE silia ma le 1,900 tausaga ua mavae i se lauga na faia i Kalilaia, na uunaʻia malosi ai e Iesu lana ʻaufaalogologo: “A ia outou muai saili [pea le] malo [o le Atua] ma lana amiotonu.” Ae aiseā na soona faanatinati ai faapea? Pe e lē o le taimi ea mo le mauaina e Keriso o le mana o le Malo, e leʻi taitai lava ona oo ane? E saʻo, peitaʻi ane o le Malo Faa-Mesia, o le auala lea e faaeaea ai e Ieova lana pule silisili ese, ma faataunuuina ai lana fuafuaga matagofie mo le lalolagi. So o se tasi lava sa ia malamalama lelei i le tāua o na mea, sa ia faamuamuaina le Malo i lona olaga. Pe afai sa moni lenā tulaga i le uluaʻi senituri, maʻeu la le sili atu foʻi ona moni i aso nei, aemaise o lea ua fai Keriso ma Tupu! O le fesili la, Po o faaalia ea i loʻu olaga e faapea, o loo oʻu muaʻi saʻili le Malo o le Atua?—Mataio 6:33.

2. O ā mea o loo naunau tagata e saʻilia?

² O le mea moni, e faitau miliona tagata i le lalolagi atoa i aso nei, o loo latou muaʻi saʻilia le Malo. O loo faaalia la latou lagolago i le pulega a le Malo, e ala i le faaautū o o latou olaga i le faia o le finagalo o Ieova, ma tuuina atu i latou lava iā te ia. Ae i le isi itu, o le vaega toʻatele o tagata, o loo naunau pea e saʻilia mea o le olaga nei. E saʻilia e tagata tupe ma mea e mafai ona maua mai ai, o meafaitino ma faafiafiaga. Po o le alu uma foʻi o lo latou  malosi e faalautele atili ai a latou matātā faapitoa tau galuega. O le ituaiga o olaga o loo latou ola ai, e faaalia mai ai le alu uma o lo latou malosi iā i latou lava, i meafaitino, ma faafiafiaga. Ua latou faatulagalua le Atua i o latou olaga, pe afai lenā o latou talitonu iā te ia.—Mataio 6:31, 32.

3. (a) O ā ituaiga ʻoa sa faalaeiauina e Iesu ona soo ina ia saʻilia, ma aiseā? (e) Aiseā e lē manaʻomia ai ona soona popolevale i meafaitino?

³ Peitaʻi ane, na tuuina mai e Iesu le fautuaga lenei i ona soo: “Aua tou te toloʻaʻi oa mo outou i le lalolagi,” auā e augapiu ma se mea o na meafaitino e tumau e faavavau. Ona ia toe fetalai mai lea: “A ia outou toloʻaʻi oa mo outou i le lagi” e ala i le auauna atu iā Ieova. Na faalaeiauina e Iesu ona soo ina ia “lelei [“faafaigofie,” NW]” pea la latou vaai e ala i le uaʻi atu o manatu ma le malosi i le faia o le finagalo o le Atua. Na ia fetalai mai iā i latou: “Tou te le mafaia ona auauna i le Atua atoa ma le oa.” Ae faapefea manaʻoga faaletino—e pei o meaʻai, lavalava, ma fale? Na fautua mai Iesu: “Aua neʻi outou popole.” Sa ia faasino i latou i manufelelei—na e fafagaina e le Atua. Sa timaʻia e Iesu ona soo ina ia latou aʻoaʻoina se lesona mai fugalaau—na e faaofuina e le Atua. Pe lē sili atu ea la ona tāua auauna faaletagata atamamai a Ieova, i lo nei mea? Ona fetalai mai lea o Iesu: “A ia outou muai saili lona malo ma lana amiotonu; ona faaopoopoina atu lea o ia mea [talafeagai] uma ia te outou.” (Mataio 6:19-34, LF) Po o faaalia ea i au gaoioiga e te talitonu i lenā folafolaga?

Aua Neʻi Fetinaʻiina le Upu Moni o le Malo

4. Pe afai e soona faatāua e se tagata meafaitino, o le ā e mafai ona iʻu i ai?

⁴ O se mea talafeagai le manatu mamafa ina ia lava mea e tausi ai manaʻoga faaletino o se tasi ma lona aiga. Peitaʻi,  pe afai o le a soona popolevale se tasi i meafaitino, e mafai ona mataʻutia iʻuga e oo i ai. E ui atonu e faapea mai o ia e talitonu i le Malo, ae afai e ese isi mea o loo ia faamuamua i lona loto, e oo ai lava ina fetinaʻiina le upu moni o le Malo. (Mataio 13:18-22) Mo se faaaʻoaʻoga, i se tasi taimi na fesili atu ai se pule talavou iā Iesu: “Se a se mea ou te faia ina ia ou maua ai le ola [e] faavavau?” Sa ola o ia i se olaga mamā ma sa ia tausi lelei atu i isi, peitaʻi sa pipii tele lona loto i ana meafaitino. Sa lē mafai ona ia tuua na mea ina ia mafai ai ona avea o ia o se soo o Keriso. O lea na ia melea ai le avanoa na semanū e la te faatasi ai ma Keriso i le Malo faalelagi. O inā na fetalai ai Iesu: “E matuā faigata ona sao atu o e mauoa i le Malo o le Atua.”—Mareko 10:17-23.

5. (a) O ā mea na faalaeiau mai ai Paulo iā Timoteo ina ia lotomalie i ai, ma aiseā? (e) E faapefea ona faaaogā e Satani “le manao i tupe” e avea o se mailei mataʻutia?

⁵ I tausaga mulimuli ane, na tusi mai ai le aposetolo o Paulo iā Timoteo, o lē sa iai i Efeso, o se aai sa olaola ai faiga faapisinisi. Na faamanatu mai e Paulo iā te ia: “Tatou te lei au mai lava se mea e tasi i le lalolagi, ua mautinoa foi tatou te le mafai ona ave ese ai o se mea. Afai ua maua e i tatou o mea e aai ai ma mea e oofu ai, ia gata ai o tatou manao.” O le galue o se tasi ina ia maua “mea e aai ai ma mea e oofu ai” mo ia ma lona aiga, o se tulaga talafeagai lea. Peitaʻi na lapataʻi mai Paulo: “O e manao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia.” E taufaaʻoleʻole tele Satani. Atonu e muamua ona ia maileia se tagata i ni mea laiti. Ona sosoo mai loa lea ma ni omiga tetele, atonu o se avanoa e siitia ai i se tulaga maualuga, po o se galuega e sili atu ona lelei ma telē se totogi,  peitaʻi o le a tāpā mai ai le taimi lea ua uma ona faatulaga ese mo mataupu faaleagaga. Pe a tatou lē mataala la, e mafai e “le manao i tupe” ona tineia atu ai manaʻoga o le Malo, na e sili mamao atu ona tāua. Na faaupu faapenei e Paulo: “Ua mananao tele i ai nisi, ona sese ai lava lea o i latou i le faatuatua, ua tuʻia ai ua ati i latou e i latou i puapuaga e tele.”—1 Timoteo 6:7-10, LF.

6. (a) Ina ia ʻalofia le mailei o le manaʻo tele i meafaitino, o le ā e ao ona tatou faia? (e) O le ā le faamautinoaga ua mafai ona tatou maua e ui i le tulaga tau tamaoaiga o le lalolagi i aso nei?

⁶ Ona o le alofa moni i lona uso Kerisiano, na ʻaiʻoi mai ai Paulo iā Timoteo: “Ia e sola ese i ia mea” ma, “Ia e tau le taua lelei i la le faatuatua.” (1 Timoteo 6:11, 12) E manaʻomia taumafaiga filigā pe afai tatou te lē fia aafia i le uiga o le manaʻo tele i meafaitino a lenei lalolagi. Peitaʻi, afai tatou te faamalolosi e ōgatusa ma lo tatou faatuatua, o le a lē taitai ona tuulafoaʻia i tatou e Ieova. E ui lava i le taugatā o le soifuaga ma le taatele o le leai o ni galuega, ae o le a ia faamautinoa ua tatou maua mea tatou te manaʻomia moni. Na tusi mai Paulo: “Ia aunoa a outou amio ma le matapeapea; ia gata ia o outou manao i mea ua ia te outou; auā ua fetalai mai [le Atua], Ou te le tuua lava oe, ou te le tuulafoai lava ia te oe. O le mea lea tatou te mafai ai ona fai atu ma le lototele, O [Ieova] o loʻu fesoasoani ia, ou te le fefe lava i se mea e faia e tagata ia te au.” (Eperu 13:5, 6, LF) Na tusi mai foʻi le tupu o Tavita: “Ua ou toeaina aʻu nei, sa aʻu taulealea; a ou te lei iloa se tagata amiotonu na lafoaiina, po o ana fanau ua ʻaiisi i latou.”—Salamo 37:25.

Ua Aumaia e Uluaʻi Soo se Faaaʻoaʻoga

7. O ā faatonuga e faatatau i le talaʻiga na ave e Iesu i ona soo, ma aiseā na talafeagai ai nei faatonuga?

⁷ Ina ua uma ona ave e Iesu i ona aposetolo le toleniga  talafeagai, ona ia aauina atu lea o i latou i Isaraelu e talaʻi le tala lelei ma folafola atu: “Ua latalata mai le malo o le lagi.” Maʻeu se feʻau faafiafia loto! Sa iai faatasi ma i latou Iesu Keriso, le Tupu Faa-Mesia. Talu ai sa tuutoina atu le ʻauaposetolo i le auaunaga i le Atua, na uunaʻia ai i latou e Iesu ina ia talitonu o le a tausia i latou e le Atua. O lea na ia fetalai atu ai: “Aua tou te ave se mea i le malaga, po o tootoo, po o se taga, po o mea e ʻai, po o se tupe, aua foi neʻi tailua ofutino. O se fale foi tou te ulu atu i ai, ia nonofo ai i le tou o ai lava.” (Mataio 10:5-10; Luka 9:1-6) Sa faamautinoa e Ieova o le a faamalieina o latou manaʻoga tatau e ala mai i o latou uso Isaraelu, auā o le aganuu masani lea a Isaraelu o le talimālō i tagata ese.

8. (a) Aiseā na aumai ai e Iesu ni faatonuga fou mo le talaʻiga a o latalata lava i lona maliu? (e) O le ā sa tatau pea ona faamuamua i olaga o soo o Iesu?

⁸ Ae ina ua latalata lava i lona maliu, na lapataʻia ai e Iesu ona aposetolo e faapea, i se taimi mulimuli ane o le a suia ai tulaga o mea e latou te galulue ai. Ona o teteega a ē o pulea faigāmalo i la latou galuega, atonu ai o le a lē tele se agaga talimālō e faaali ane iā i latou i Isaraelu. E lē gata i lea, ua lē o toe umi ona latou avatu lea o le feʻau o le Malo i vaipanoa o Nuu Ese. O le taimi la lea sa tatau ai ona latou ō ma ave se “ete tupe” ma se “ʻato.” E ui i lea, sa tatau pea ona latou muaʻi saʻilia le Malo o Ieova ma lana amiotonu, i le mautinoa o le a faamanuiaina e le Atua a latou taumafaiga, ia maua mea e aai ma oofu ai.—Luka 22:35-37.

9. Na faapefea ona faamuamua e Paulo le Malo i lona olaga, a o ia tausia foʻi ona manaʻoga faaletino, ma o ā fautuaga na ia aumaia e tusa ai o lenei mataupu?

⁹ Sa avea le aposetolo o Paulo ma faaaʻoaʻoga lelei o sē  na faatatauina fautuaga a Iesu. Sa faaautū atu le olaga o Paulo i lana faiva. (Galuega 20:24, 25) Ina ua alu atu o ia i se vaipanoa e talaʻi ai, sa ia tausia ona lava manaʻoga faaletino, na oo lava ina galue i le faia o faleʻie. E na te leʻi faatalitalia isi e tausi maia o ia. (Galuega 18:1-4; 1 Tesalonia 2:9) Peitaʻi, sa ia talia ma le faafetai le agaga talimālō ma meaalofa, ina ua faaali ane e nisi lo latou alofa i lenā auala. (Galuega 16:15, 34; Filipi 4:15-17) Sa timaʻia e Paulo uso Kerisiano, ina ia aua neʻi lafoaʻia o latou tiute faaleaiga ona o le talaʻiga, ae ia faapaleni lelei o latou tiute tauave eseese. Sa ia fautuaina i latou ina ia galulue, ia alolofa i o latou aiga, ma ia tufa atu a latou mea i isi. (Efeso 4:28; 2 Tesalonia 3:7-12) Sa ia faalaeiauina i latou ina ia latou faamoemoe i le Atua, ae lē i meafaitino, ma ia faaaogā o latou olaga i se auala e faaalia ai, o loo latou iloa moni mea e sili atu ona tāua. I le ōgatusa ma aʻoaʻoga a Iesu, sa faauiga atu lenā faalaeiauga i le muaʻi saʻilia o le Malo o le Atua ma lana amiotonu.—Filipi 1:9-11.

Ia Faamuamua Pea le Malo i Lou Olaga

10. O le ā le uiga o le muaʻi saʻilia o le Malo?

¹⁰ O le ā le tele o loo tatou talaʻiina atu ai le tala lelei o le Malo i isi? O lenā mea e fuafua lava i o tatou tulaga ma le loloto o lo tatou talisapaia. Ia manatua sa leʻi faapea mai Iesu, ‘Ia saʻili le Malo pe a leai nisi au mea e fai.’ I lona silafiaina o le tāua o le Malo, na ia faailoa mai ai le finagalo o lona Tamā, i le faapea mai: “Ia outou saili [“pea,” NW] lona malo.” (Luka 12:31, LF) E ui o le toʻatele o i tatou e manaʻomia ona galulue auā o tatou lava manaʻoga faapea o tatou aiga, ae afai ua iā i tatou le faatuatua, o le a faaautū atu ai la o tatou olaga i le auaunaga o le Malo lea na tuuina mai e le Atua iā i tatou. Ae i le taimi e tasi, o le a tatou tausia foʻi o tatou tiute tauave faaleaiga.—1 Timoteo 5:8.

11. (a) Na faapefea ona faaalia mai e Iesu, e lē o tagata uma o le a tutusa uma mea e mafai ona latou faia i le faasalalauina atu o le feʻau o le Malo? (e) O ā māfuaaga o le a fua i ai le tele o mea e mafai ona faia e se tasi?

 ¹¹ E iai nisi o i tatou e tele atu se taimi e mafai ona tatou talaʻia ai le tala lelei o le Malo na i lo o isi. Peitaʻi, i lana faataoto e uiga i ituaiga eseese o eleele, na faaalia ai e Iesu faapea, o ē uma e pei o latou loto o ni eleele lelei o le a fuaina mai ni fua. I le ā le tele? E eseese lava tulaga o tagata taʻitoʻatasi. O nisi o māfuaaga, o le aafia i le soifuaga matua, le lē lelei o le soifua mālōlōina, ma tiute tauave faaleaiga. Peitaʻi pe afai e iai se agaga talisapaia moni, o le a tele mea e mafai ona faataunuuina.—Mataio 13:23.

12. O le ā le sini faaleagaga e aogā ua faalaeiauina faapitoa ai talavou e mafaufau i ai?

¹² E lelei pe a faataatitia ni sini o le a fesoasoani iā i tatou e faalautele atu ai lo tatou sao i le faiva o le Malo. E tatau i ē talavou ona mafaufau loloto i le faaaʻoaʻoga sili ona lelei a le talavou Kerisiano maelega o Timoteo. (Filipi 2:19-22) O le ā se isi mea e sili atu ona lelei mo i latou, na i lo o le ulu atu i le faiva faataimi atoa pe a māeʻa a latou aʻoaʻoga? O le a maua foʻi e tagata matutua ni aogā pe a latou faataatitia ni sini faaleagaga e lelei.

13. (a) O ai e filifilia po o ā mea e mafai ona tatou taʻitoʻatasi ona faia i le auaunaga o le Malo? (e) Pe afai tatou te muaʻi saʻilia moni le Malo, o le ā ua tatou faamaonia atu ai?

 ¹³ Na i lo o le faitioina o ē tatou te manatu e tele atu ni mea latou te mafai ona faia, e tatau ona uunaʻia i tatou e le faatuatua e faia ni o tatou lava faaleleiga, ina ia mafai ona tatou auauna atu i le Atua i se telē e mafai ona tatou faia e tusa i o tatou lava tulaga. (Roma 14:10-12; Kalatia 6:4, 5) E pei ona faaalia i le tulaga o Iopu, o loo finau mai Satani e faapea, o o tatou faanaunauga autū o a tatou meafaitino, lo tatou olaga sologa lelei, ma so tatou lava lelei totino, ma e manatu faapito le uunaʻiga e ala ai ona tatou auauna i le Atua. Ae pe afai tatou te muaʻi saʻilia moni le Malo, ua faia ai so tatou sao i le faamaonia atu o le matuā pepelo o le Tiapolo. Ua tatou faamaonia ai, o loo faamuamua i o tatou olaga, le auaunaga i le Atua. O lea, e ala i a tatou upu ma gaoioiga, e tatou te faamaonia atu ai le loloto o lo tatou alofa mo Ieova, le faamaoni o la tatou lagolagosua i lana pule silisili ese, ma lo tatou alofa mo uso a tagata.—Iopu 1:9-11; 2:4, 5; Faataoto 27:11.

14. (a) Aiseā e aogā ai pe a fai se faasologa mo le faiva i le fanua? (e) O le ā le tele o loo faia ai e le toʻatele o Molimau so latou sao i le faiva i le fanua?

¹⁴ O le faia o se faasologa e mafai ona fesoasoani iā i tatou ina ia tele ai mea e mafai ona tatou faataunuuina, i lo mea na semanū tatou te faia. O Ieova lava ia e iai ana taimi ‘ua tuupoina’ e faataunuu ai lana fuafuaga. (Esoto 9:5; Mareko 1:15) Pe afai e mafai, e lelei pe a faatulaga se taimi e tasi pe sili atu foʻi i vaiaso taʻitasi, e faia ai se sao i le faiva i le fanua. E faitau selau afe Molimau a Ieova i le lalolagi aoao ua auauna o ni paeonia lagolago, ma faaaluina le tusa ma le lua itula i aso taʻitasi i le talaʻia o le tala lelei. E faitau selau afe isi o loo auauna o ni paeonia sauatoa, e faaaluina ai le tusa o le lua ma le ʻafa itula i aso  taʻitasi e folafola atu ai le feʻau o le Malo. O paeonia faapito ma misionare ua latou faaaluina ni taimi e sili atu ona tele i le auaunaga o le Malo. E mafai foʻi ona tatou saʻilia avanoa e faaalia atu ai le faamoemoe o le Malo i ni tulaga lē fuafuaina, i so o se tasi o le a fia faalogo mai. (Ioane 4:7-15) E tatau ona avea ma o tatou faanaunauga le faia o se sao atoatoa i lenā galuega pe a tusa ai ma o tatou tulaga, auā na muaʻi taʻua e Iesu e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:14; Efeso 5:15-17.

15. E tusa ai o la tatou faiva, aiseā e te manatu ai ua matuā talafeagai lelei ma le taimi nei le fautuaga o loo i le 1 Korinito 15:58?

¹⁵ I se uiga autasi, i itu uma o le lalolagi, ua faia ai e Molimau a Ieova so latou sao i lenei faaeaga o le auaunaga, e tusa lava po o fea le atunuu o loo latou nonofo ai. Ua latou faatatauina iā i latou lava le fautuaga faagaeeina a le Tusi Paia: “Ia outou tumau, ma le le faagaeetia, ia alualu lo outou faamalosi i le galuega a le Alii ma le le aunoa, ina ua outou iloa e le se mea faaleaoga lo outou tautiga i le Alii.”—1 Korinito 15:58.

Talanoaga Autalu

• Ina ua fetalai mai Iesu ia “muai saili [pea] le malo,” o le ā na ia faaalia mai e tatau ona faatulagalua?

• O le ā le manatu e tatau ona iā i tatou i le tausia o manaʻoga faaletino mo i tatou lava ma o tatou aiga? O le ā le fesoasoani o le a foaʻi mai e le Atua iā i tatou?

• O ā vala o le auaunaga o le Malo e mafai ona fai ai so tatou sao?

[Fesili mo le Suʻesuʻega]

[Ata i le itulau 107]

I atunuu uma, o loo talaʻia ai i aso nei e Molimau a Ieova le tala lelei, a o leʻi oo mai le iʻuga