O le ā e Tatau Ona Fai e Kerisiano i Aso Nei?

O KERISIANO moni i aso nei e lē auai i faiga faapolotiki. Aiseā? Ona e latou te mulimuli i le faaaʻoaʻoga a Iesu. Na ia faapea mai e uiga ia te ia lava: “E lē o aʻu o se tagata o le lalolagi,” ma na faapea mai o ia e uiga i ona soo, “e lē o ni tagata o le lalolagi outou.” (Ioane 15:19; 17:14) Mātau nisi o māfuaaga e lē tatau ai ona auai Kerisiano i faiga faapolotiki.

1. E gata mai tomai o tagata. Ua faaalia mai i le Tusi Paia, e lē o iai i tagata le tomai ma le aiā e pulea ai i latou lava. Na tusi le perofeta o Ieremia: “E lē o i le tagata foʻi e savali, ona faatonuina le mea e ui ai o ia.”—Ieremia 10:23.

E pei lava ona leʻi foafoaina tagata ina ia felelei e pei o manulele, ua faapena foʻi ona leʻi foafoaina i latou ina ia taulau manuia a latou lava pulega. Na tusi le tusitala o talafaasolopito o David Fromkin e uiga i mea e gata mai ai le malosi o faigāmalo: “O faigāmalo e faia e tagata, e lē taulau a latou taumafaiga ma e faapena foʻi lo latou lumanaʻi. E iai lo latou malosi, ae e faatapulaaina.” (The Question of Government) E lētioa lapataʻia i tatou e le Tusi Paia, e aua neʻi tuu atu lo tatou faatuatuaga i tagata!—Salamo 146:3.

2. O loo iai aafiaga o agaga leaga i le taimi nei. Ina ua ofo atu e Satani iā Iesu le pule i le lalolagi atoa, e leʻi teena e Iesu le mea moni o loo iai i le Tiapolo le pule e ofo atu ai malo uma o le lalolagi. O le mea moni, na taʻua e Iesu i se isi taimi Satani o “le pule o le lalolagi.” Na taʻua e le aposetolo o Paulo i nai tausaga mulimuli ane, o Satani o “le atua o lenei faiga o mea a le lalolagi.” (Ioane 14:30; 2 Korinito 4:4) Na tusi Paulo i tagata Korinito: ʻTatou te tau ma taʻitaʻi o le lalolagi o loo pulea lenei lalolagi pogisa, ma agaga leaga uma i mea o i le lagi.’ (Efeso 6:12) O le mea moni, e lē o iloa e tagata, o agaga leaga ia o loo pulea moni le lalolagi. E faapefea i lenā mea moni ona aafia ai lo tatou manatu e tusa ai o faiga faapolotiki?

Seʻi manatu i lenei faatusatusaga: E pei lava ona taaʻina e ni peau malolosi ni vaa lāiti, e  faapena foʻi ona taaʻina e agaga leaga ia faiga faapolotiki a tagata. Ma e pei lava ona leai se mea e mafai ona faia e tagata folau ina ia suia ai peau malolosi, e faapena foʻi ona leai se mea e mafai ona faia e tagata faipolotiki, e suia ai taaʻiga a agaga leaga. E maumauaʻi nei agaga leaga e faaleagaina tagata ma faapogaia auēga i le lalolagi. (Faaaliga 12:12) Peitaʻi, e iai se tasi e mafai ona aumaia suiga moni, ma e na o ia e sili atu lona malosi nai lo o Satani ma ana temoni. O Ia lenā o Ieova le Atua.—Salamo 83:18; Ieremia 10:7, 10.

3. E na o le Malo o le Atua e lagolago e Kerisiano moni. Na iloa lelei e Iesu ma ona soo, e iai se taimi atofaina o le a faatūina ai e le Atua se malo i le lagi, ina ia pule mai i le lalolagi atoa. O loo taʻua i le Tusi Paia lenei malo, o le Malo o le Atua, ma ua faailoa mai ai ua faauuina Iesu Keriso e avea ma Tupu. (Faaaliga 11:15) Talu ai e iai aafiaga o lenā Malo i tagata uma lava, o lea na avea ai “le tala lelei o le malo o le Atua,” ma autū o le talaʻiga a Iesu. (Luka 4:43) Na ia aʻoaʻo foʻi ona soo ina ia tatalo e faapea: “Ia oo mai lou malo.” Aiseā? Ona e ala i lenā Malo, o le a mautinoa ai le faataunuuina o le finagalo o le Atua i le lagi ma le lalolagi.—Mataio 6:9, 10.

O le ā o le a tupu i malo faaletagata? Ua tali mai le Tusi Paia, o le a faaumatia malo “o le lalolagi uma.” (Faaaliga 16:14; 19:19-21) Pe afai e talitonu se tasi o le a aveesea e le Malo o le Atua faiga faapolotiki a tagata o loo iai, o le a lē lagolagoina la e ia na faiga faapolotiki. Auā o le mea moni, afai e lagolago e se tasi faigāmalo a tagata ia o le a faaumatia, ua fouvale la o ia i le Atua.

Po o lona uiga la e lē o manatu mamafa Kerisiano moni mo le lelei o vaipanoa o loo nonofo ai, ona e lē o auai i faiga faapolotiki? Mātau le tali o loo taʻua i le mataupu o sosoo mai.

[Faamatalaga faaopoopo i le itulau 7]

O loo lagolago atoatoa e Molimau a Ieova le Malo o le Atua, ae e lē o faiga faapolotiki